ຢາເສບຕິດ ໜຶ່ງໃນອະບາຍະມຸກ ທີ່ອັນຕະລາຍເບື່ອເມົາສັງຄົມ

“ອະບາຍະມຸກ” ຄຳນີ້ຫລາຍທ່ານຮູ້ດີເມື່ອໃດທີ່ເຮົາຢູ່ໃນວັງວົນຂອງມັນ ລ້ວນແຕ່ຈິບຫາຍວາຍວອດ ແລະ ການຍົກບັນຫານີ້ເພື່ອບໍ່ຢາກໃຫ້ໃຜຕົກລົງຂຸມຂອງຄວາມຈິບຫາຍ ແລະ ສຸດທ້າຍຊີວິດຈະເລີນເມື່ອເຮົາກັບໃຈ ໄວ ທັນ ແລະ ເຕັມໄປດ້ວຍຄວາມຫວັງ.

ບັນຫາຢາເສບຕິດ ເປັນໜຶ່ງໃນປາກົດການຫຍໍ້ທໍ້ໃນສັງຄົມ ແລະ ເປັນໜຶ່ງໃນອະບາຍະມຸກທີ່ຜິດກົດໝາຍມັນໄດ້ສ້າງຄວາມຈິບຫາຍໃຫ້ທັງຜູ້ພົວພັນກັບມັນ, ຄອບຄົວ ແລະ ສັງຄົມມາແລ້ວ, ມັນເປັນເປັນພິດໄພຕໍ່ ການພັດທະນາແທ້ໆ.

ແນວໃດກໍດີການທີ່ຈະຊະນະມັນ ປາບມັນໃຫ້ໝົດບາດໜຶ່ງຍາມດຽວ ບໍ່ແມ່ນເລື່ອງງ່າຍດາຍ… ແຕ່ຂະນະດຽວກັນກໍບໍ່ໝົດຫວັງດອກ ຖ້າເຮັດຖືກລວງ, ທຸກຄົນພາຍໃນປະເທດຮ່ວມມື ລວມທັງການຮ່ວມມືຈາກພາຍນອກ ປະເທດເຮົາກໍມີພູມຕ້ານທານທີ່ເຂັ້ມແຂງແມ່ນບໍ່ລະ? ແລະ ຄວາມຈິງແລ້ວ ຖ້າຕິດຕາມຂ່າວເລື່ອງການແກ້ໄຂບັນຫານີ້ ກໍເຫັນຜົນສຳເລັດຂອງການແກ້ໄຂ ດັ່ງໃນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ IX, ຂະແໜງການກ່ຽວຂ້ອງໄດ້ລາຍງານການປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດທີ່ປະສົບຜົນສໍາເລັດຫລາຍປະການບໍ່ວ່າຈະເປັນການສ້າງ-ປັບປຸງກົດໝາຍ, ນິຕິກໍາກ່ຽວຂ້ອງ;
ການປັບປຸງກົງຈັກການຈັດຕັ້ງ-ຍົກລະດັບຄວາມສາມາດການເຮັດໜ້າທີ່ການເມືອງຂອງອົງການສອບສວນສືບສວນ, ອົງການໄອຍະການປະຊາຊົນ, ອົງການສານປະຊາຊົນ,ອົງ ການປະຕິບັດຄໍາຕັດສິນຂອງສານກໍຄືບັນດາພາກສ່ວນກ່ຽວຂ້ອງກັບການແກ້ໄຂບັນຫາຢາເສບຕິດ; ການຍົກສູງປະສິດທິພາບການຄຸ້ມຄອງ-ຊີ້ນໍາການປະຕິບັດຮອບດ້ານແກ້ໄຂບັນຫາຢາເສບຕິດ; ການເພີ່ມຂີດຄວາມສາມາດຂອງລະບົບການເມືອງແຕ່ລະຂັ້ນເພື່ອຊີ້ນໍາ-ນໍາພາການແກ້ໄຂບັນຫາຢາເສບຕິດທີ່ເກີດຂຶ້ນຢູ່ໃນຂອບເຂດຄວາມຮັບຜິດຊອບຂອງຕົນ ແລະ ການເພີ່ມທະວີການຮ່ວມມືສາກົນ. ທີ່ພົ້ນເດັ່ນຄືສາມາດກວາດລ້າງກຸ່ມ, ບຸກຄົນທີ່ພົວພັນກັບຢາເສບຕິດທັງຢຶດຢາເສບຕິດປະເພດຕ່າງໆໄດ້ຢ່າງຫລວງຫລາຍເຮັດໃຫ້ກຸ່ມຄ້າຂາຍ-ຂົນສົ່ງ ແລະ ເສບຢາເສບຕິດ ຢ້ານກົວ.

ທັງນີ້ການກໍານົດນະໂຍບາຍເອົາການແກ້ໄຂບັນ ຫາຢາເສບຕິດ ເປັນວາລະແຫ່ງຊາດ ໄດ້ຮັບການຕີລາຄາຢ່າງພາວະວິໄສວ່າ ເປັນນະໂຍບາຍທີ່ຖືກທິດທີ່ສຸດແລ້ວ, ປະເທດເພື່ອນມິດ ແລະ ສາກົນ ກໍສະໜັບສະໜູນ.

ການແກ້ໄຂບັນຫາຢາເສບຕິດ ລໍາພັງແຕ່ພາກສ່ວນໃດໜຶ່ງ ຫລື ຜູ້ກ່ຽວຂ້ອງ ບໍ່ພໍ ຊຶ່ງທົ່ວສັງຄົມຕ້ອງປະ ກອບສ່ວນ ເລີ່ມຈາກທຸກຄົນ, ທຸກຄອບຄົວ. ເມື່ອຈຸລັງສໍາຄັນ ສັງຄົມມີພູມຕ້ານທານຢາເສບຕິດຢ່າງແຂງແຮງ, ຢາເສບຕິດ ກໍບໍ່ສາມາດເຈາະເຂົ້າເຮົາ ກໍຄືຄອບຄົວໄດ້.

ແນວໃດກໍດີນອກຈາກບັນຫາຢາເສບຕິດແລ້ວ, ພວກເຮົາຍັງຕ້ອງໄດ້ຮ່ວມກັນອອກແຮງສະກັດກັ້ນບັນດາປາກົດການຫຍໍ້ທໍ້ທີ່ເປັນອະບາຍະມຸກທັງ ຫລາຍໃຫ້ຫ່າງໄກສັງຄົມເຮົາ ເພາະວ່າ ອະບາຍະມຸກ ແມ່ນທາງແຫ່ງຄວາມຈິບຫາຍ, ເຫດແຫ່ງຄວາມວຸ້ນວາຍ ບໍ່ວ່າຈະເປັນອະບາຍະມຸກ 4 ໄດ້ແກ່ການເປັນນັກເລງແມ່ຍິງ, ເປັນນັກເລງສຸລາ, ເປັນນັກເລງຫລິ້ນການພະນັນ, ເອົາຄົນຊົ່ວເປັນມິດ, ອະບາຍະມຸກ 6 ໄດ້ແກ່ ດື່ມເຫລົ້(ສູບຝິ່ນກິນກັນຊາ-ຢາເສບຕິດ), ທ່ຽວສໍາລານຍາມກາງຄືນ, ທ່ຽວເບິ່ງການຫລິ້ນທີ່ບໍ່ເປັນປະໂຫຍດ, ຫລິ້ນການພະນັນ, ເອົາຄົນຊົ່ວມາເປັນມິດ ແລະ ຂີ້ຄ້ານເຮັດວຽກ.