ເຊເຣຍອາ ກຽມໃຫ້ຜູ້ຕັດສິນຍິງລົງເປົ່າເກມຊາຍຄັ້ງທຳອິດ

ການແຂ່ງຂັນ ກັລໂຊ ເຊເຣຍ ອາ ກຽມສົ່ງກຳມະການຍິງລົງເປ່ົາຕັດສິນເກມລີກຄັ້ງທຳອິດ.

ມາເຣຍ ໂຊເລ ແຟຣີເອຣີ ກາປູຕິ ຜູ້ຕັດສິນສາວອາຍຸ 31 ປີ ຈະກາຍເປັນຜູ້ຕັດສິນຍິງຄົນທຳອິດໃນການແຂ່ງຂັນບານເຕະ ກັລໂຊ ເຊເຣຍ ອາ ອິຕາລີ ໂດຍຈະໄດ້ເຮັດຫນ້າທີ່ຕັດສິນຕັ້ງແຕ່ລະດູການ 2022-23 ຫລັງຈາກທີ່ໄດ້ລອງເຮັດຫນ້າທີ່ເກມໂຄປາ ອິຕາລີ ລະຫວ່າງກາຍາຣີກັບຊິດຕາເດລລາ ເມື່ອປີກ່ອນມາແລ້ວ.

ອັລເຟຣໂດ ເທຣນຕາລານເຢ ປະທານຄະນະກຳມະການຜູ້ຕັດສິນອິຕາລີກ່າວວ່າ : ມັນເປັນໄລຍະເວລາທີ່ສວຍງາມຫລາຍ ແລະ ເປັນຫນຶ່ງໃນສິ່ງທີ່ຫນ້າຍິນດີຫລາຍ ມັນເປັນເວລາແຫ່ງປະຫວັດສາດ ແຕ່ການທີ່ລາວໄດ້ມາເຮັດຫນ້າທີ່ນີ້ ມາຈາກຄວາມສາມາດບໍ່ໄດ້ມາຈາກສິທິພິເສດ.

ແຟຣີເອຣີ້ ເຂົ້າຮ່ວມສະມາຄົມຜູ້ຕັດສິນເມື່ອປີ 2007 ເລີ່ມງານໃນລີກລະດັບແຂວງ ແລະ ລະດັບພູມພາກ ກ່ອນເລີ່ມເຮັດຫນ້າທີ່ໃນເຊເຣຍ ດີ ປີ 2015 ເລື່ອນໄປອີກໃນປີ 2019 ເປົ່າຕັດສິນເກມຊີງແຊ໊ມຢູໂຣຍິງ ຮອບຄັດເລືອກ ຈາກນັ້ນປີ 2020 ເລີ່ມເປັນຜູ້ຕັດສິນໃນເຊເຣຍ ຊີ ແລະ ເຊເຣຍ ບີ.