ສສຊ ປະກອບຄຳເຫັນໃສ່ຮ່າງກົດໝາຍວ່າດ້ວຍຊັບສິນຂອງລັດສະບັບປັບປຸງ

ກອງຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ IX ໃນວັນທີ 1 ກໍລະກົດ 2022 ພາຍໃຕ້ການເປັນປະທານຂອງທ່ານນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ, ທ່ານ ສົມສັກ ແສງສັກດາ ສະມາຊິກສະພາແຫ່ງຊາດເຂດເລືອກຕັ້ງ 15 ແຂວງຈໍາປາສັກ ແລະ ບັນດາສະມາຊິກສະພາແຫ່ງຊາດເຂດເລືອກຕັ້ງຕ່າງໆໄດ້ປະກອບຄໍາເຫັນໃສ່ຮ່າງກົດໝາຍວ່າດ້ວຍຊັບສິນຂອງລັດ ສະບັບປັບປຸງ ໂດຍຮ່າງກົດໝາຍສະບັບນີ້ ໄດ້ປັບປຸງເນື້ອໃນ 41 ມາດຕາ, ເພີ່ມເຂົ້າໃໝ່ 3 ມາດ ຕາ, ຕັດອອກ 12 ມາດຕາ ເຮັດໃຫ້ໂຄງຮ່າງສະບັບປັບປຸງ ປະກອບມີ 9 ພາກ, 7 ໝວດ ແລະ 65 ມາດຕາ ເພື່ອໃຫ້ມີເນື້ອໃນຄົບຖ້ວນ, ຮັດກຸມ ແນໃສ່ເຮັດໃຫ້ສອດຄ່ອງກັບການຈັດຕັ້ງປະຕິບັດຕົວຈິງ.

ແນວໃດກໍດີເມື່ອກົດໝາຍວ່າດ້ວຍຊັບສິນຂອງລັດສະບັບນີ້ ຖືກຮັບຮອງ ແລະ ປະກາດໃຊ້ແລ້ວ
– ຈະເປັນບ່ອນອີງດ້ານນິຕິກໍາທີ່ໜັກແໜ້ນໃຫ້ແກ່ການເຄື່ອນໄຫວຂອງອົງການລັດຂັ້ນສູນກາງ, ທ້ອງຖິ່ນ ແລະພາກ ສ່ວນກ່ຽວຂ້ອງຕໍ່ການຄຸ້ມຄອງຊັບສິນຂອງລັດ;
– ສ້າງຄວາມເຊື່ອໝັ້ນໃຫ້ແກ່ສັງຄົມ, ນິຕິບຸກຄົນ ແລະ ສາກົົນກ່ຽວກັບການຄຸ້ມຄອງຊັບສິນຂອງລັດ;
– ຮັບປະກັນການຄຸ້ມຄອງຊັບສິນຂອງລັດ ໃຫ້ຖືກຕ້ອງ, ໂປ່ງໃສ, ລວມສູນ ແລະ ເປັນເອກະພາບ ລວມທັງການຈັດຕັ້ງປະຕິບັດກົດໝາຍໃຫ້ເປັນເອກະພາບ, ສອດຄ່ອງກັບພາລະບົດບາດ, ສິດ ແລະ ໜ້າທີ່ຂອງຂະແໜງການທີ່ກ່ຽວຂ້ອງ;
– ຮັບປະກັນການຄຸ້ມຄອງລາຍຮັບຈາກຊັບສິນຂອງລັດຢ່າງຖືກຕ້ອງ ແລະ ລວມສູນເພື່ອຮັບປະກັນການປະຕິບັດການຄຸ້ມຄອງລາຍຮັບສອດຄ່ອງກັບກົດໝາຍ, ຈໍາກັດການຮົ່ວໄຫຼງົບປະມານແຫ່ງລັດ;
– ເພີ່ມທະວີບົດບາດ, ສິດ, ໜ້າທີ່ ແລະ ຄວາມຮັບ ຜິດຊອບການຄຸ້ມຄອງຊັບສິນຂອງລັດຂອງບັນດາຂະແໜງການໃຫ້ສູງຂຶ້ນ ແລະ ສອດຄ່ອງກັບຄວາມເປັນຈິງ;
– ພະນັກງານລັດຖະກອນ, ພາກສ່ວນກ່ຽວຂ້ອງເຂົ້າໃຈ ແລະ ເປັນເອກະພາບຈັດຕັ້ງປະຕິບັດກົດໝາຍສະບັບນີ້ສູງຂຶ້ນ;
– ການຄຸ້ມຄອງຊັບສິນຂອງລັດຈະແຈ້ງກວ່າເກົ່າ ແລະ ສາມາດຕິດຕາມ, ກວດກາການຄຸ້ມຄອງຊັບສິນຂອງລັດມີປະສິດທິຜົນ, ໂປ່ງໃສ, ຍຸຕິທໍາ ແລະ ກວດສອບໄດ້.