ຂ່າວລື ໂຣນັລໂດ ກຽມລາ ແມນຢູ ພ້ອມເປີດຕົວທີມໃຫມ່ 7 ກໍລະກົດນີ້

ອັນເຈໂລ ດິ ລີວີໂອ ອະດີດນັກເຕະຂອງ ໂຣມາ ສະໂມສອນເກ່ັງແຫ່ງ ກັລໂຊ ເຊເຣຍ ອາ ອິຕາລີ ອ້າງວ່າ ຄຣິສຕຽນໂນ ໂຣນັລໂດ ກອງຫນ້າທີມຊາດໂປຣຕຸເກສ ຂອງ ແມນເຊສເຕີ ຢູໄນເຕັດ ພວມຈະຍ້າຍໄປຮ່ວມທີມ ໂຣມາ ແລະ ຈະມີການເປີດຕົວໃນວັນທີ 7 ກໍລະກົດນີ້.

ສຳລັບ ໂຣນັລໂດ ອາຍຸ 37 ປີ ຕົກເປັນຂ່າວໃນໄລຍະຫລັງວ່າອາດຈະຍ້າຍທີມໃນລະດູການນີ້ ເນື່ອງຈາກບໍ່ຄ່ອຍພໍໃຈການເສີມທີມທີ່ ຫລ້າຊ້າຂອງສະໂມສອນ ທີ່ເບິ່ງວ່າຈະບໍ່ມີຄວາມທະເຍີທະຍານໃນການໄລ່ລ່າຄວາມສຳເລັດໃນລະດູການຫນ້າ ແລະ ຊື່ຂອງ ໂຣມາ ທີ່ມີ ໂຈເຊ ມູຣິນໂຢ ອະດີດເຈົ້ານາຍເກ່ົາຂອງ ໂຣນັລໂດ ທີ່ ຣຽວ ມາດຣິດ ເປັນຜູ້ຈັດການທີມກໍເປັນທີມທີ່ຖືກດຶງມາພົວພັນ ເຊິ່ງຫລ້າສຸດ ອະດີດາວຍິງຂອງ ໂຣມາ ບອກວ່າ ໂຣນັລໂດ ຈະຍ້າຍມາ ໂຣມາ ແນ່ນອນ.

‘‘ ຂ້ອຍຮູ້ມາຈາກຫລາຍແຫລ່ງຂ່າວວ່າ ໂຣມາ ພະຍາຍາມເຊັນສັນຍາ ໂຣນັລໂດ ແລະ ໃນວັນທີ 7 ກໍລະກົດນີ້ ຫນ້າຈະເປັນວັນຖະ ແຫລງຂ່າວ ເພາະວັນທີ 7 ສອດຄ້ອງກັບເບີເສື້ອທີ່ມັກຂອງ ໂຣນັລໂດ ’’.

ທັງນີ້ ໂຣມາ ພາຍໃຕ້ການຄຸມທີມຂອງ ມູຣິນໂຢ ຫາກໍຄວ້າແຊ໊ມ ຢູໂຣປາ ຄອນເຟີເຣນ ລີກ ໃນລະດູການທີ່ຜ່ານມາ.