ປະທານາທິບໍດີອິນໂດເນເຊຍສະເໜີເປັນຄົນກາງ ນຳສານຈາກທ່ານ ເຊເລນສກີ ສົ່ງເຖິງທ່ານ ປູຕິນ
ວັນທີ 29 ມິຖຸນາ 2022, ປະທານາທິບໍດີ ໂຈໂກ ວີໂດໂດ ແຫ່ງອິນໂດເນເຊຍ ໄດ້ເຂົ້າພົບປະທານາທິບໍດີ ໂວໂລດິເມຍ ເຊເລນສກີ ແຫ່ງຢູເຄຣນ ໃນນະຄອນຫລວງກຽບ ໂດຍສະເໜີຂໍເປັນຄົນກາງນຳສານຈາກຜູ້ນຳຢູເຄຣນສົ່ງເຖິງປະທານາທິບໍດີ ວະລາດິເມຍ ປູຕິນ ແຫ່ງຣັດເຊຍ.
“ຂ້າພະເຈົ້າຂໍສະເໜີເປັນຄົນກາງຈະນຳເອົາສານຈາກປະທານາທິບໍດີ ເຊເລນສກີ ໄປສົ່ງໃຫ້ປະທານາທິບໍດີ ປູຕິນ ເຊິ່ງຂ້າພະເຈົ້າຈະເດີນທາງໄປພົບທ່ານ ປູຕິນ ໃນມໍ່ໆນີ້” ທ່ານ ວີໂດໂດ ກ່າວ. ພ້ອມເນັ້ນວ່າ: ອິນໂດເນເຊຍເຄົາລົບໃນອະທິປະໄຕຂອງປະເທດ ແລະ ເຊື່ອໝັ້ນໃນການແກ້ໄຂບັນຫາຄວາມຂັດແຍ່ງລະຫວ່າງຣັດເຊຍ ແລະ ຢູເຄຣນດ້ວຍສັນຕິວິທີ.
ເຖິງຢ່າງໃດກໍຕາມ, ປັດຈຸບັນຍັງບໍ່ໄດ້ມີລາຍງານອອກມາຈະແຈ້ງວ່າ: ທ່ານ ເຊເລນສກີ ຕອບຮັບຂໍ້ຄວາມຂອງທ່ານ ວີໂດໂດ ແນວໃດ ຫລື ທ່ານ ເຊເລນສກີ ໄດ້ຝາກສານໄປກັບທ່ານ ວີໂດໂດ ຫລື ບໍ່.
ທ່ານ ວີໂດໂດ ເດີນທາງເຖິງນະຄອນຫລວງກຽບໃນເຊົ້າວັນທີ 29 ມິຖຸນາ ກ່ອນຈະເຂົ້າພົບທ່ານ ເຊເລນສກີ ຢູ່ພະລາດຊະວັງມາຣິນສກີ ໃນຕອນບ່າຍ ໂດຍພາຍຫລັງກອງປະຊຸມສຳເລັດ ທ່ານໄດ້ເດີນທາງກັບໄປໂປແລນ ແລະ ກຽມເດີນທາງຕໍ່ໄປຣັດເຊຍໃນວັນທີ 30 ມິຖຸນາ ເພື່ອເຂົ້າພົບປະທານາທິບໍດີ ປູຕິນ ເຊິ່ງຄາດວ່າຈະມີການພະຍາຍາມຊັກຊວນໃຫ້ຜູ້ນຳຣັດເຊຍເຫັນພ້ອມໃຊ້ຂໍ້ກຳນົດຢຸດຍິງ ຫລັງການເຈລະຈາສັນຕິພາບລະຫວ່າງຢູເຄຣນ ແລະ ຣັດເຊຍຢຸດສະງັກ ເນື່ອງຈາກບໍ່ມີຝ່າຍໃດຈະຍອມປານີປານອມໃຫ້ເງື່ອນໄຂຂອງອີກຝ່າຍ.
ໃນລະຫວ່າງກອງປະຊຸມ, ທ່ານ ວີໂດໂດ ຍັງໄດ້ກ່າວເຖິງບົດບາດສຳຄັນຂອງຢູເຄຣນໃນຕ້ອງໂສ້ອຸປະທານອາຫານທົ່ວໂລກ “ເປັນເລື່ອງສຳຄັນຫລາຍທີ່ທຸກຝ່າຍຈະຕ້ອງສ້າງຫລັກປະກັນເຖິງຄວາມໝັ້ນຄົງວ່າ: ຢູເຄຣນຈະສາມາດສົ່ງອອກອາຫານໄດ້ຢ່າງລາບລື່ນ ເຊິ່ງລວມທັງການສົ່ງສິນຄ້າຜ່ານທາງທ່າເຮືອ” ທ່ານ ວີໂດໂດ ກ່າວ. “ຂ້າພະເຈົ້າສະໜັບສະໜູນຄວາມພະຍາຍາມຂອງອົງການສະຫະປະຊາຊາດໃນບັນຫານີ້”.
ທັງນີ້, ອົງການສະຫະປະຊາຊາດ (UN) ກຳລັງຢູ່ລະຫວ່າງການເຈລະຈາກັບຢູເຄຣນ, ຣັດເຊຍ ແລະ ຕວກກີ ເພື່ອຈັດຕັ້ງເສັ້ນພິເສດທາງສຳລັບສົ່ງອອກເຂົ້າສາລີຂອງຢູເຄຣນໃນທະເລດຳໄປຕະຫລາດອື່ນໆທົ່ວໂລກ.
ກ່ອນໜ້າທີ່ຣັດເຊຍຈະເຂົ້າບຸກໂຈມຕີຢູເຄຣນເມື່ອວັນທີ 24 ກຸມພານັ້ນ ຢູເຄຣນເປັນໜຶ່ງໃນປະເທດທີ່ສົ່ງອອກເຂົ້າສາລີໃຫ້ອິນໂດເນເຊຍຫລາຍທີ່ສຸດ, ແຕ່ສົງຄາມທີ່ເກີດຂຶ້ນໄດ້ຂັດຂວາງການສົ່ງອອກຂອງຢູເຄຣນໃນທະເລດຳ ເຊິ່ງຜົນກະທົບຕໍ່ວິກິດອາຫານໂລກນຳ.
ທ່ານ ເຊເລນສກີ ຂານຮັບການເດີນທາງຢ້ຽມຢາມຢູເຄຣນຂອງທ່ານ ວີໂດໂດ ໂດຍກ່າວວ່າ: “ການອຳນວຍຄວາມສະດວກຂອງປະທານ ແລະ ສະມາຊິກກຸ່ມ G20 ມີຄວາມສຳຄັນຢ່າງຍິ່ງຕໍ່ການຟື້ນຟູສັນຕິພາບ”.
ຜູ້ນຳທັງສອງຍັງໄດ້ຫາລືເຖິງໂອກາດຂອງການຟື້ນຟູຢູເຄຣນຫລັງສົງຄາມ “ຂ້າພະເຈົ້າຂໍເຊີນຊາວອິນໂດເນເຊຍ, ບໍລິສັດສັນຊາດອິນໂດເນເຊຍ ແລະ ຜູ້ຊ່ຽວຊານໃຫ້ເຂົ້າຮ່ວມການດຳເນີນໂຄງການນີ້ ເຊິ່ງເປັນໂຄງການທາງເສດຖະກິດໃຫຍ່ທີ່ສຸດໃນຍຸກຂອງເຮົາໃນເອີຣົບ” ທ່ານ ເຊເລນສກີ ກ່າວ.
ພ້ອມກັນນີ້, ທ່ານ ວີໂດໂດ ຍັງກ່າວອີກວ່າ: ອິນໂດເນເຊຍເນັ້ນຈະຮັດແໜ້ນການຮ່ວມມືລະດັບທະວີພາຄີກັບຢູເຄຣນ ໂດຍອິນໂດເນເຊຍຈະຈັດຫາອຸປະກອນການຢາທີ່ຈຳເປັນ ແລະ ຊ່ວຍສ້າງໂຮງໝໍທີ່ໄດ້ຮັບຄວາມເສຍຫາຍຈາກການໂຈມຕີຂອງຣັດເຊຍຂຶ້ນມາໃໝ່.
ໃນຖານະປະທານກອງປະຊຸມກຸ່ມ G20 ປີນີ້, ທ່ານ ວີໂດໂດ ໄດ້ເຊີນໃຫ້ທ່ານ ເຊເລນສກີ ເຂົ້າຮ່ວມກອງປະຊຸມທີ່ຈະໄຂຂຶ້ນຢູ່ເກາະບາຫລີໃນເດືອນພະຈິກ ໂດຍຜູ້ນຳຢູເຄຣນໄດ້ຕອບຮັບຄຳເຊີນດັ່ງກ່າວ, ແຕ່ອາດຈະຕ້ອງພິຈາລະນາສະຖານະການໃນປະເທດອີກວ່າໃນເວລານັ້ນຈະສາມາດເດີນທາງໄປໄດ້ ຫລື ບໍ່.
ອ້າງອີງ:
- https://www.reuters.com/world/asia-pacific/indonesian-president-visits-ukraine-peace-mission-2022-06-29/
- https://asia.nikkei.com/Politics/Ukraine-war/Indonesia-s-Jokowi-offers-to-broker-peace-in-meeting-with-Zelenskyy
