ພະລັງຄວາມສາມັກຄີຄືພະລັງແຫ່ງການຜ່ານຜ່າຄວາມຫຍຸ້ງຍາກ

ພາລະກິດປົກປັກຮັກສາ, ສ້າງສາ ແລະ ພັດທະນາປະເທດຊາດ ເປັນພັນທະໜ້າທີ່ລວມຂອງຄົນລາວທັງຊາດ ປະເທດຊາດຈະໝັ້ນຄົງ, ເສດຖະກິດ-ສັງຄົມ ຈະພັດທະນາ ລ້ວນແຕ່ຂຶ້ນກັບຄວາມສາມັກຄີ, ຄວາມເປັນຈິດໜຶ່ງໃຈດຽວຂອງປະຊາຊົນລາວບັນດາເຜົ່າ.

ພວກເຮົາມີມູນເຊື້ອທີ່ດີເລີດຄືສາມັກຄີ ແລະ ພ້ອມກັນເສຍສະລະຜົນປະໂຫຍດສ່ວນຕົວຕໍ່ສູ້ປົດປ່ອຍຊາດ ຊຶ່ງນີ້ຄືກໍາລັງແຮງສັງລວມທີ່ມະຫາສານສາມາດເຮັດໃຫ້ປະເທດຊາດໄດ້ຮັບການປົດປ່ອຍຢ່າງສົມບູນໃນປີ 1975 ແລ້ວສ້າງຕັ້ງສາທາລະນະລັດ ປະຊາທິປະ ໄຕ ປະຊາຊົນລາວ. ພາຍຫລັງປະເທດຊາດໄດ້ຮັບການປົດປ່ອຍຢ່າງສົມບູນແລ້ວ ພວກເຮົາກໍຍັງຜະເຊີນອຸປະສັກ ແລະ ສິ່ງກີດຂວາງຕ່າງໆຕໍ່ການພັດທະນາປະເທດຊາດ, ແຕ່ພາຍໃຕ້ການນຳພາຂອງພັກ ສົມ ທົບກັບຄວາມເປັນຈິດໜຶ່ງໃຈດຽວ ແລະ ຄວາມສາມັກຄີຂອງຄົນໃນຊາດຈຶ່ງຜ່ານຜ່າຄວາມຫຍຸ້ງຍາກຕ່າງໆໄດ້ຢ່າງສຳເລັດ.

ຕະຫລອດ 40 ກວ່າປີແຫ່ງການປະຕິບັດພາລະກິດພາລະກິດສ້າງສາ ແລະ ພັດທະນາປະເທດ ໃນຍຸກແຫ່ງການປ່ຽນແປງໃໝ່, ຍຸກແຫ່ງການພົວພັນເຊື່ອມໂຍງກັບພາກພື້ນ, ສາກົນຢ່າງກວ້າງຂວາງ ແລະໜັກ ແໜ້ນນັ້ນ, ພວກເຮົາມີທັງຈຸດດີ ຈຸດອ່ອນ, ອຸປະສັກຫຍຸ້ງຍາກຫລາຍປັດໄຈທີ່ກີດຂວາງບາດກ້າວເດີນຂອງຊາດບໍ່ວ່າຈະເປັນໄພທໍາມະຊາດ, ພະຍາດລະບາດ ແລະວິກິດຕ່າງໆຢ່າງລຽນຕິດໂດຍສະເພາະສິ່ງທີ່ພວກ ເຮົາພວມຜະເຊີນຄືບັນຫາເງິນເຟີ້, ນໍ້າມັນແພງ, ລາຄາສິນຄ້າແພງແຕ່ລະມື້ ຊຶ່ງເກີດຈາກປັດໄຈພາຍໃນແດ່ ພາຍນອກນໍາ ມາກະທົບໃສ່ ເປັນຕົ້ນປັດໄຈພາຍໃນ, ຄົນລາວເຮົາຍັງນິຍົມໃຊ້ເງິນຕາຕ່າງປະເທດເກີນໄປ ບໍ່ວ່າຈະເປັນເງິນບາດເງິນໂດລາ, ການຜະລິດສິນຄ້າບໍ່ເຂັ້ມແຂງ, ການນໍາເຂົ້າສິນຄ້າຫລາຍກວ່າການສົ່ງອອກ ຊຶ່ງເປັນບັນຫາຊໍາເຮື້ອມາດົນນານ.

ຂະນະທີ່ປັດໄຈພາຍນອກນັ້ນເປັນຜົນມາຈາກຕະຫລາດ ນໍ້າມັນໂລກລາຄາຜັນຜວນ, ເກີດຄວາມຂັດແຍ່ງລະຫວ່າງປະເທດມະຫາອໍານາດ, ການຂວໍ້າບາດຂອງປະ ເທດທີ່ຢາກເປັນເຈົ້າໂລກ ແລະ ຄວາມຂັດແຍ່ງອື່ນໆແບບບໍ່ສິ້ນສຸດ. ສະພາບທັງພາຍນອກ ແລະ ພາຍໃນດັ່ງກ່າວຍ່ອມສົ່ງຜົນກະທົບຕໍ່ສປປ ລາວ ຢ່າງໃຫຍ່ຈົນເກີດວິກິດຕ່າງໆຕາມມາ ແລະ ຈາກເງື່ອນໄຂປັດໄຈດັ່ງກ່າວ, ຈິດໃຈຮັກຊາດ ແລະ ພັດທະນາ ຈຶ່ງເປັນສິ່ງສໍາຄັນ ໂດບຕ້ອງໄດ້ອອກແຮງກັນຜະລິດສິນຄ້າໃຫ້ຫລາຍເພື່ອເປັນສິນຄ້າສົ່ງອອກ, ຫັນມານິຍົມໃຊ້ເງິນກີບຊື້ຂາຍກັນຢູ່ພາຍໃນປະເທດ, ຫັນມານໍາໃຊ້ຜະລິດຕະພັນຂອງຄົນລາວທີ່ຜະລິດເອົາເອງໄດ້ ແລະ ອື່ນໆທີ່ປິ່ນອ້ອມ ຈຶ່ງຈະເຮັດໃຫ້ປະເທດເຮົາຜ່ານພົ້ນວິກິດນີ້ໄປໄດ້.

ແນວໃດກໍດີ, ສະພາບທີ່ເກີດຂຶ້ນແຕ່ລະໄລຍະ ຮຽກຮ້ອງໃຫ້ພວກເຮົາ ຕ້ອງສາມັກຄີກັນປະຕິບັດແຜນພັດ ທະນາເສດຖະກິດ-ສັງຄົມແຕ່ລະໄລຍະ, ຕ້ອງເຂັ້ມງວດການບໍລິຫານໃຫ້ສັກສິດເດັດຂາດໂດຍການນຳໃຊ້ກົດໝາຍຄຸ້ມຄອງລັດ, ຄຸ້ມຄອງສັງຄົມ ຈຶ່ງຈະເຮັດໃຫ້ສັງທົ່ວສັງຄົມມີຄວາມສະຫງົບສຸກ ປະເທດຊາດຮັ່ງມີ ເຂັ້ມແຂງ ປະຊາຊົນ ຢູ່ດີກິນດີ ສາມາດຜ່ານຜ່າອຸປະສັກ ຄວາມຫຍຸ້ງຍາກດັ່ງທີ່ເປັນຢູ່ໄດ້.