ກົມງົບປະມານແຫ່ງລັດ ສະຫຼຸບວຽກງານຈຸດສຸມ 6 ເດືອນຕົ້ນປີ ແລະ ທິດທາງ 6 ເດືອນທ້າຍປີ 2022
ໃນວັນທີ 30 ມິຖຸນາ 2022 ນີ້, ກົມງົບປະມານແຫ່ງລັດ ກະຊວງການເງິນ, ໄດ້ຈັດກອງປະຊຸມສະຫຼຸບການຈັດຕັ້ງປະຕິບັດວຽກງານຈຸດສຸມ 6 ເດືອນຕົ້ນປີ ແລະ ທິດທາງວຽກງານຈຸດສຸມ 6 ເດືອນທ້າຍປີ 2022, ໂດຍການເປັນປະທານຂອງທ່ານ ພູວົງ ກິດຕະວົງ ຫົວໜ້າກົມງົບປະມານແຫ່ງລັດ ກະຊວງການເງິນ, ມີຕາງຫນ້າຈາກກົມນະໂຍບາຍການເງິນ, ຫ້ອງການກະຊວງ, ກົມເຕັກໂນໂລຊີຂໍ້ມູນຂ່າວສານການເງິນ, ຄັງເງິນແຫ່ງຊາດ, ຫົວໜ້າພະແນກ-ຮອງຫົວໜ້າພະແນກ, ພ້ອມດ້ວຍພະນັກງານວິຊາການເຂົ້າຮ່ວມ.
ໃນກອງປະຊຸມທ່ານ ນາງ ເພັດສະໝອນ ພອນສະຫວັນ ຮອງຫົວໜ້າກົມງົບປະມານແຫ່ງລັດ ໄດ້ຜ່ານບົດ ສະຫຼຸບການຈັດຕັ້ງປະຕິບັດວຽກງານຂອງກົມງົບປະມາແຫ່ງລັດ 6 ເດືອນຕົ້ນປີ ແລະ ທິດທາງແຜນວຽກຈຸດສຸມ 6 ເດືອນທ້າຍປີ 2022; ໃນຕະຫຼອດໄລຍະ 6 ເດືອນຜ່ານມາ, ກົມງົບປະມານແຫ່ງລັດໄດ້ເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ແກ່ບັນດາສະມາຊິກພັກ, ຈັດຕັ້ງເຊື່ອມຊືມແນວທາງ, ແຜນນະໂຍບາຍ, ມະຕິ, ຄຳສັ່ງ, ກົດລະບຽບຂອງພັກ, ກົດໝາຍ ແລະ ລະບຽບການຕ່າງໆໃຫ້ພະນັກງານ-ລັດຖະກອນຕາມແຜນການເຄື່ອນໄຫວຂອງກົມ. ໂດຍໄດ້ຖືເອົາການລົງຮ່ວມເຮັດວຽກກັບແຕ່ລະພະແນກ, ເພື່ອຮັບຟັງການລາຍງານກ່ຽວກັບການຈັດຕັ້ງປະຕິບັດວຽກ ງານວິຊາສະເພາະປະຈຳເດືອນ ແລະ ງວດ, ອັນທີ່ພົ້ນເດັ່ນ: ວຽກວິຊາສະເພາະຄະນະກົມໄດ້ລົງເລິກໃກ້ສິດ-ຕິດແທດ ໃນການນຳພາ-ຊີ້ນຳແຕ່ລະພະແນກໃນການຈັດຕັ້ງປະຕິບັດວຽກງານຈຸດ, ສຸມຕະຫຼອດໄລຍະ 06 ເດືອນຜ່ານມາດ້ວຍຄວາມເປັນເຈົ້າການໂດຍເຂົ້າຮ່ວມເຮັດວຽກກັບບັນດາພະແນກ, ເພື່ອຮັບຟັງການລາຍງານກ່ຽວກັບການຈັດຕັ້ງປະຕິບັດວຽກງານວິຊາສະເພາະໃນແຕ່ລະໄລຍະ ແລະ ສືບຕໍ່ນຳພາ-ຊີ້ນຳຈັດຕັ້ງປະຕິບັດແຜນວຽກຈຸດສຸມໃນຕໍ່ໜ້າໃຫ້ສຳເລັດຕາມຄາດໝາຍທີ່ກຳນົດໄວ້.
ພ້ອມກັນນັ້ນ, ຍັງໄດ້ຜ່ານແຜນວຽກຈຸດສຸມ 06 ເດືອນທ້າຍປີ 2022 ພ້ອມທັງໄດ້ວາງມາດຕະການໃນການ ຈັດຕັ້ງປະຕິບັດເປັນຕົ້ນ: ເອົາໃຈໃສ່ດ້ານການເມືອງ-ແນວຄິດ, ດ້ານວຽກງານການຈັດຕັ້ງ ແລະ ພະນັກງານ, ດ້ານວຽກງານວິຊາສະເພາະ, ວຽກງານນິຕິກຳວຽກງານສ້າງແຜນ, ວຽກງານຕິດຕາມ ແລະ ຄຸ້ມຄອງການຈັດຕັ້ງປະຕິບັດລາຍຈ່າຍ, ວຽກງານຫັນເປັນທັນສະໄໝ,ເອົາໃຈໃສ່ມາດຕະການໃນການຈັດຕັ້ງປະຕິບັດວຽກງານສຶກສາອົບຮົມການເມືອງແນວຄິດ,ຕິດຕາມກວດກາການເຄື່ອນໄຫວ ຂອງພະນັັກງານ-ລັດຖະກອນ, ເອົາໃຈໃສ່ປະສານສົມທົບກັບບັນດາກົມພາຍໃນກະຊວງ, ຈັດຕັ້ງປະຕິບັດວຽກງານໃຫ້ໄປຕາມແຜນຈຸດສຸມຂອງກົມທີ່ກຳນົດໄວ້, ຕິດຕາມ, ກວດກາ, ແນະນຳ ການຈັດຕັ້ງປະຕິບັດແຜນງົບປະມານແຫ່ງລັດຢູ່ຂັ້ນສູນກາງ ແລະ ທ້ອງຖິ່ນຢ່າງເປັນປົກກະຕິ, ພ້ອມນັ້ນຍັງໄດ້ສະເໜີບົດຮຽນຈາກການໄປຝຶກອົບຮົມໃນຫົວຂໍ້ທັກສະການເປັນຄູຝຶກ, ການສະເໜີວຽກງານການຫຼຸດຜ່ອນຂັ້ນຕອນຂອດຂັ້ນຂອງການອະນຸມັດງົບປະມານສຳລັບຂັ້ນສູນກາງໂດຍໄດ້ກຳນົດເອົາບາງກະຊວງເຮັດທົດລອງ.
ໃນກອງປະຊຸມຜູ້ເຂົ້າຮ່ວມ, ຕາງໜ້າຕ່າງໜ້າຈາກກົມນະໂຍບາຍການເງິນ, ຫ້ອງການກະຊວງ, ກົມເຕັກໂນໂລຊີຂໍ້ມູນຂ່າວສານການເງິນ ແລະ ຄັງເງິນແຫ່ງຊາດໄດ້ພ້ອມກັນປະກອບຄຳຄິດເຫັນ ແລະ ແລກປ່ຽນບົດຮຽນໃສ່ການສະຫຼຸບການຈັດຕັ້ງປະຕິບັດວຽກງານຂອງກົມງົບປະມາແຫ່ງລັດ 6 ເດືອນຕົ້ນປີ ແລະ ທິດທາງແຜນວຽກຈຸດສຸມ 6 ເດືອນທ້າຍປີ 2022 ໃຫ້ຊັດເຈນ ແລະ ລົງເລິກບັນຫາສໍາຄັນ, ເພື່ອປັບປຸງໃນຄັ້ງຕໍ່ໄປອີກດ້ວຍ.
