ຝຶກອົບຮົມ ການປະກອບເອກະສານລາຍຈ່າຍ ງົບປະມານແຫ່ງລັດ ແລະ ນິຕິກໍາຕ່າງໆທີ່ຕິດພັນ
ວັນທີ 29 ມິຖຸນາ 2022 ນີ້, ກະຊວງການເງິນ ຈັດຝຶກອົບຮົມກ່ຽວກັບການປະກອບເອກະສານລາຍຈ່າຍງົບປະມານແຫ່ງລັດ ແລະ ນິຕິກໍາຕ່າງໆທີ່ຕິດພັນ ໂດຍການເປັນປະທານຂອງ ທ່ານ ນາງ ຄໍາຂວັນ ສີຊານົນ ຮອງຫົວໜ້າຫ້ອງການກະຊວງ, ມີຫົວໜ້າພະແນກ ແລະ ວິຊາການ ທີ່ຮັບຜິດຊອບວຽກງານການເງິນ ຈາກບັນດາກົມອ້ອມຂ້າງກະຊວງການເງິນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ. ທັງນີ້, ກໍເພື່ອປະຕິບັດວຽກງານການເງິນໃຫ້ມີຄວາມໂປ່ງໃສ, ຍຸຕິທຳຢ່າງຮອບດ້ານ, ພ້ອມທັງໃຫ້ເຂັ້ມງວດທາງດ້ານກົດໝາຍ ແລະ ນິຕິກຳໄດ້ກຳນົດ, ເອົາໃຈໃສ່ຍົກສູງຄວາມຮັບຜິດຊອບ ແລະ ຈັນຍາບັນຂອງພະນັກງານທີ່ຮັບຜິດຊອບວຽກງານການເງິນ ເພື່ອກວດກາ, ຕິດຕາມການນຳໃຊ້ງົບປະ ມານຂອງລັດຢ່າງປະຢັດ ແລະ ມີປະສິດທິຜົນສູງສຸດຕາມຄໍາສັ່ງຂອງນາຍົກລັດຖະມົນຕີເລກທີ 09/ນຍ, ລົງວັນທີ 19 ພຶດສະພາ 2017 ໃນຂອບເຂດຄວາມຮັບຜິດຊອບຂອງຕົນຢ່າງເປັນຮູບປະທຳ.
ທ່ານ ນາງ ຄໍາຂວັນ ສີຊານົນ ໄດ້ໃຫ້ຮູ້ວ່າ: ຊຸດອົບຮົມຄັ້ງນີ້, ຜູ້ເຂົ້າຮ່ວມຈະໄດ້ ແລກປ່ຽນບົດຮຽນ ກ່ຽວກັບການປະກອບເອກະສານ ລາຍຈ່າຍງົບປະມານແຫ່ງລັດ ທີ່ຕິດພັນກັບບັນດາກົມ ທີ່ໄດ້ປະກອບເອກະສານຜ່ານມາ ໃຫ້ມີຄວາມເປັນເອກະພາບ ແລະຮັບປະກັນການປະກອບເອກະສານລາຍຈ່າຍງົບປະມານໃຫ້ຖືກຕ້ອງ, ສອດຄ່ອງກັບນິຕິກຳໄດ້ກຳນົດ, ບໍ່ໃຫ້ເອກະສານກັບໄປ-ກັບມາປັບປຸງຫລາຍຄັ້ງ ເພື່ອອຳນວຍຄວາມສະດວກໃຫ້ບັນດາກົມສາມາດຖອນເງິນງົບປະມານ ໄປຮັບໃຊ້ວຽກງານວິຊາສະເພາະໄດ້ທັນຕາມກຳ ນົດເວລາ ໂດຍອີງຕາມເນື້ອໃນຈິດໃຈຂອງຄໍາແນະນໍາ ວ່າດ້ວຍການຈັດຕັ້ງປະຕິບັດແຜນງົບປະມານແຫ່ງລັດປະຈຳປີ 2022 ສະບັບເລກທີ 5880/ກງ, ລົງວັນທີ 22 ພະຈິກ 2021; ການຈັດຕັ້ງປະຕິບັດບັນດານິຕິກຳຕ່າງໆ ເປັນຕົ້ນ ຂໍ້ຕົກລົງກຳນົດໝາຍໃຊ້ຈ່າຍງົບປະມານເລກທີ 4000/ກງ ເຊິ່ງຍັງມີຫລາຍພາກສ່ວນຂັດຂ້ອງ ໃນການຈັດຕັ້ງປະຕິບັດເນື່ອງຈາກອັດຕາໃຊ້ຈ່າຍເຂົ້າໃນວຽກງານຕ່າງໆບໍ່ພຽງພໍ, ມີຊ່ອງຫວ່າງສ້າງເງື່ອນໄຂຄິດໄລ່ແຜນງົບປະມານເກີນຄວາມຈຳເປັນ, ສິ້ນເປືອງງົບປະມານມີການໃຊ້ຈ່າຍຟູມເຟືອຍບໍ່ສົມເຫດສົມຜົນ. ນອກຈາກນັ້ນ, ຍັງມີບາງເນື້ອໃນ ແລະ ອັດຕາການໃຊ້ຈ່າຍບໍ່ຈະແຈ້ງເຮັດໃຫ້ມີຄວາມຫຍຸ້ງຍາກໃນການຈັດຕັ້ງປະຕິບັດ.
ພ້ອມນັ້ນ, ຍັງໄດ້ມີການນໍາສະເໜີ ດຳລັດວ່າດ້ວຍຕໍາແໜ່ງບໍລິຫານຂອງພະນັກ ງານ-ລັດຖະກອນ ສະບັບເລກທີ 203/ລບ, ຄຳແນະນຳກ່ຽວກັບການປະກອບເອກະສານແລະການກວດກາເອກະສານລາຍຈ່າຍງົບປະມານແຫ່ງລັດ ແລະ ທຶນຊ່ວຍເຫລືອທາງການ ເພື່ອການພັດທະນາສະບັບເລກທີ 0866/ກງ ແລະ ຂໍ້ຕົກລົງວ່າດ້ວຍກຳນົດໝາຍໃຊ້ຈ່າຍງົບປະມານບໍລິຫານຂອງລັດສະບັບເລກທີ 4000/ກງ, ລົງວັນທີ 12 ທັນວາ 2018, ທີ່ບັນດາກົມອ້ອມຂ້າງກະຊວງການເງິນ ໄດ້ຈັດຕັ້ງປະຕິບັດຜ່ານມາ ໃຫ້ຮັບຮູ້ເພີ່ມຕື່ມ ແລະ ເຂົ້າໃຈຢ່າງຖືກຕ້ອງເຖິງຖອງ ເພື່ອໃຫ້ສາມາດນໍາໄປຈັດຕັ້ງປະຕິບັດໃຫ້ມີປະສິດທິຜົນກວ່າເກົ່າ.
