ສີລັງກາວິກິດໜັກ ທາງການໂຈະຂາຍເຊື້ອໄຟ 2 ອາທິດ ຂະນະທີ່ຜູ້ຜະລິດໄຟຟ້າຂໍຂຶ້ນຄ່າໄຟ 835%
ວັນທີ 27 ມິຖຸນາ 2022, ຄະນະກຳມະການໄຟຟ້າຂອງສີລັງກາ (CEB) ເຊິ່ງເປັນອົງກອນທີ່ຜູກຂາດການຈຳໜ່າຍໄຟຟ້າແຕ່ພຽງຜູ້ດຽວໃນປະເທດ ປະກາດຂໍຂຶ້ນຄ່າໄຟເຖິງ 835% ຫລັງປະສົບບັນຫາຂາດທຶນຢ່າງໜັກ ທ່າມກາງວິກິດເສດຖະກິດຄັ້ງຮຸນແຮງຂອງປະເທດ.
ປັດຈຸບັນ ສີລັງກາຜະເຊີນວິກິດຮຸນແຮງຫລາຍທີ່ສຸດນັບແຕ່ປະກາດເປັນເອກະລາດໃນປີ 1948 ໂດຍສີລັງກາຈຳເປັນຕ້ອງແລກປ່ຽນເງິນຕາຕ່າງປະເທດຈຳນວນຫລາຍລ້ານໂດລາເພື່ອເອົາມາໃຊ້ຊຳລະຄ່າສິນຄ້ານຳເຂົ້າທີ່ຈຳເປັນເຊັ່ນ: ອາຫານ, ເຊື້ອໄຟ ແລະ ຢາ.
ຄະນະກຳມະການສາທາລະນູປະໂພກຂອງສີລັງກາ (PUCSL) ກ່າວວ່າ: CEB ມີຍອດຂາດທຶນ 6,5 ໝື່ນລ້ານຣູປີ (185 ລ້ານໂດລາ) ໃນໄຕມາດທຳອິດ ຈຶ່ງຕ້ອງຂໍຂຶ້ນຄ່າໄຟ 835% ກັບຜູ້ຊົມໃຊ້ພະລັງງານລາຍຍ່ອຍ. ປັດຈຸບັນຜູ້ທີ່ໃຊ້ໄຟຟ້າຕໍ່າກວ່າ 30 ກິໂລວັດຕໍ່ເດືອນຈະຕ້ອງຈ່າຍເງິນ 54,27 ຣູປີ (0,15 ໂດລາ) ແຕ່ CEB ຈະຂໍຂຶ້ນເປັນ 507,65 ຣູປີ (1,44 ໂດລາ).
ທ່ານ ຈານາກາ ຣັດນາຢາເກ (Janaka Ratnayake) ປະທານ PUCSL ລົງຄວາມເຫັນວ່າ: ຜູ້ຊົມໃຊ້ສ່ວນຫລາຍໃນປະເທດອາດບໍ່ສາມາດຮັບມືຕໍ່ລາຄາທີ່ເພີ່ມສູງຂຶ້ນແບບນີ້ໄດ້ ຈຶ່ງສະເໜີໃຫ້ກະຊວງການເງິນອອກງົບປະມານອຸດໜູນໂດຍກົງ ເພື່ອໃຫ້ລາຄາຄ່າໄຟຟ້າຫລຸດລົງເຄິ່ງໜຶ່ງຈາກຕົວເລກເບື້ອງຕົ້ນ.
ສ່ວນອັດຕາຄ່າໄຟຟ້າໃນປະເທດນັ້ນຍັງບໍ່ມີການຕັດສິນໃຈຢ່າງເປັນທາງການ, ແຕ່ຄ່າໄຟຟ້າສຳລັບກຸ່ມຜູ້ປະກອບການການຄ້າ ແລະ ອຸດສາຫະກຳອາດປັບຂຶ້ນ 43-61%.
ຂະນະດຽວກັນ, ສີລັງກາຍັງໄດ້ໂຈະການຈຳໜ່າຍເຊື້ອໄຟທຸກປະເພດເປັນເວລາ 2 ອາທິດ ໂດຍມີຂໍ້ຍົກເວັ້ນໃຫ້ໜ່ວຍງານບໍລິການທີ່ຈຳເປັນ ພ້ອມຮຽກຮ້ອງໃຫ້ບໍລິສັດເອກະຊົນອະນຸຍາດໃຫ້ພະນັກງານເຮັດວຽກຢູ່ເຮືອນເພື່ອຫລຸດການເດີນທາງ ເນື່ອງຈາກປະເທດເກືອບຈະບໍ່ມີພະລັງງານເຫລືອແລ້ວ. ຂະນະທີ່ລັດຖະມົນຕີພະລັງງານຍອມຮັບວ່າ: ທ່ານບໍ່ສາມາດຮັບປາກໄດ້ວ່າສະຕ໊ອກເຊື້ອໄຟຊຸດໃໝ່ຈະເດີນທາງມາຮອດສີລັງກາເມື່ອໃດ.
ທ່ານ ບັນດູລາ ກູນາວາດານາ (Bandula Gunawardana) ໂຄສົກລັດຖະບານປະກາດວ່າ: “ນັບແຕ່ເວລາ 24:00 ໂມງ ຂອງວັນທີ 27 ມິຖຸນາ 2022 ສີລັງກາຈະໂຈະການຈຳໜ່າຍເຊື້ອໄຟ ຍົກເວັ້ນໜ່ວຍງານທີ່ຈຳເປັນເຊັ່ນ: ຂະແໜງສາທາລະນະສຸກ ເນື່ອງຈາກເຮົາຈຳເປັນຕ້ອງສະຫງວນພະລັງງານສຳຮອງທີ່ເຫລືອເອົາໄວ້” ພ້ອມຂໍໂທດປະຊາຊົນສຳລັບເຫດການທີ່ເກີດຂຶ້ນ.
ເຖິງຢ່າງໃດກໍຕາມ, ສີລັງກາພະຍາຍາມຫາທາງອອກດ້ວຍການສົ່ງລັດຖະມົນຕີເດີນທາງໄປຣັດເຊຍ ເພື່ອຂໍຊື້ນ້ຳມັນຈາກຣັດເຊຍ ເຊິ່ງມີລາຄາຖືກກວ່າຕະຫລາດໂລກ ລວມທັງມີການເຈລະຈາເງື່ອນໄຂສຳປະທານນຳເຂົ້າໄຮໂດຣກາກບອນກັບກາຕາ.
ອ້າງອີງ:
- https://www.theguardian.com/world/2022/jun/28/sri-lanka-suspends-fuel-sales-for-two-weeks-as-economic-crisis-worsens
- https://economictimes.indiatimes.com/news/international/world-news/sri-lanka-electricity-firm-seeks-835-price-rise/articleshow/92496511.cms
