ຄະນະກຳມະການປ້ອງໄພພິບັດແຫ່ງຊາດ ມອບເງິນ 430 ລ້ານໃຫ້ບັນດາແຂວງພາກໃຕ້ທີ່ປະສົບໄພນ້ຳຖ້ວມ
ເມື່ອບໍ່ດົນມານີ້, ຄະນະກຳມະການປ້ອງກັນ ແລະ ຄວບຄຸມໄພພິບັດແຫ່ງຊາດ, ນໍາໂດຍທ່ານ ຄຳແພງ ໄຊສົມແພງ ລັດຖະ ມົນຕີກະຊວງແຮງງານ ແລະ ສະຫວັດດີການສັງຄົມ, ພ້ອມຄະນະໄດ້ໄປມອບເງິນຊວ່ຍເຫຼືອປະຊາຊົນຜູ້ທີ່ໄດ້ຮັບຜົນກະທົບຈາກໄພທຳມະຊາດນ້ຳຖ້ວມໃນ 5 ແຂວງພາກໃຕ້ຄື: ແຂວງບໍລິຄຳໄຊ ແລະ ຈຳປາສັກ ແຂວງລະ 120 ລ້ານກີບ, ສາລະວັນ ແລະ ເຊກອງ ແຂວງລະ 70 ລ້ານກີບ ແລະ ແຂວງອັດຕະປື ຈຳນວນ 50 ລ້ານກີບ, ລວມເປັນມູນຄ່າທັງໝົດ 430 ລ້ານກີບ.
ໂອກາດນີ້, ອຳນາດການປົກຄອງແຂວງບໍລິຄຳໄຊ ໄດ້ລາຍງານໃຫ້ຮູ້ວ່າ: ນັບແຕ່ທ້າຍເດືອນກໍລະກົດຫາຕົ້ນເດືອນສິງຫານີ້, ໄດ້ເກີດມີຝົນຕົກໜັກ ເຮັດໃຫ້ມີ 2 ເມືອງ, ເກີດນໍ້າຖ້ວມຢ່າງກະທັນຫັນ, ໃນ 49 ບ້ານ, ລວມມີ 298 ຄົນໄດ້ຮັບຜົນກະທົບ, ນອກນີ້ ຍັງມີເຮືອນຈຳນວນ 70 ຫຼັງຄາຖືກນ້ຳຖ້ວມເສຍຫາຍ, ພ້ອມມີເສັ້ນທາງບາງສາຍຖືກຕັດຂາດ ແລະ ເປ່ເພ, ພ້ອມນີ້ຍັງມີເນື້ອທີ່ການຜະລິດ ໄດ້ຮັບຄວາມເສຍຫາຍເປັນຕົ້ນ: ໄຮ່ນາ ຈຳນວນ 175,4 ເຮັກຕາ, ສວນມັນຕົ້ນ 230 ເຮັກຕາ, ສວນສາລີ 112 ເຮັກຕາ, ສວນຖົ່ວດິນ 103 ເຮັກຕາ, ສວນ ໝາກເພັດ 12,4 ເຮັກຕາ ແລະ ມີສັດລ້ຽງຕາຍເຊັ່ນ: ງົວ 14 ໂຕ, ຄວາຍ 5 ໂຕ, ປາແສນກວ່າໂຕ ແລະ ສັດລ້ຽງປະເພດຕ່າງໆຈຳນວນໜຶ່ງ.
ໃນໂອກາດນີ້, ທ່ານລັດຖະມົນຕີ ກະຊວງແຮງງານ ແລະ ສະຫວັດດີ ການສັງຄົມ ໄດ້ກ່າວສະແດງຄວາມເຫັນໃຈຕໍ່ຜົນກະທົບທີ່ເກີດຂຶ້ນຈາກໄພພິບັດທຳມະຊາດ ຄັ້ງນີ້, ຊຶ່ງກໍໃຫ້ເກີດຜົນເສຍຫາຍຕໍ່ຊັບສິນຂອງລັດ ແລະ ປະຊາຊົນເປັນຈຳນວນຫລາຍ, ແຕ່ຍ້ອນຄວາມເອົາໃຈໃສ່ຂອງຄະນະພັກ, ຄະນະນໍາແຂວງ ຈຶ່ງເຮັດໃຫ້ການຟື້ນຟູແກ້ໄຂຜົນກະທົບທີ່ເກີດຂຶ້ນນີ້ຈະສາມາດກັບຄືນສູ່ປົກກະຕິໂດຍໄວ.
+ກະຊວງແຮງງານລົງຊ່ວຍເຫລືອຜູ້ປະສົບໄພນ້ຳຖ້ວມຢູ່ເມືອງແກ່ນທ້າວເກືອບ 260 ລ້ານ ກີບ
+ກະຊວງແຮງງານມອບເງິນ 120 ລ້ານກີບ ຊ່ວຍຜູ້ປະສົບໄພນ້ຳຖ້ວມຢູ່ແຂວງວຽງຈັນ
