ປກສ ເມືອງຫາດຊາຍຟອງ ຢຶດຢາບ້າໄດ້ຫຼາຍ 10 ພັນເມັດໃນມື້ດຽວ
ພັທ ເກດສະຫນາ ພິຈິດ ຫົວຫນ້າພະແນກຕໍາຫຼວດ ກອງບັນຊາການ ປກສ ຫາດຊາຍຟອງ ນະຄອນຫລວງວຍງຈັນ ສຳພາດຜ່ານໜັງສືພິມຄວາມສະຫງົບ ວ່າ: ໃນວັນທີ 21 ມິຖຸນາ 2022 ເຈົ້າໜ້າທີ່ ພະແນກ ຕໍາຫຼວດ ປກສ ເມືອງ ຫາດຊາຍຟອງ ສາມາດຈັບຕົວຜູ້ຖືກຫາໄດ້ 01 ຄົນຄື: ທ້າວ ສຸດສະດາ ຫຼື ກິໂນ້ ອາຍຸ 22 ປີ ອາຊີບ ກໍາມະກອນຢູ່ບ້ານ ດອນປ່າໃໝ່ ເມືອງ ສີສັດຕະນາກ ນະຄອນຫຼວງວຽງຈັນ ພ້ອມຢຶດຂອງກາງ ແລະ ເຄື່ອງ ຕິດຕົວມີຄື: ຢາເສບຕິດປະເພດຢາບ້າຈໍານວນ 1.856 ເມັດ.
ຜ່ານການສອບສວນ, ທ້າວ ສຸດສະດາ ຫຼື ກິໂນ້ ໄດ້ຊັດທອດຫາຜູ້ຮ່ວມຂະບວນການ ໂດຍບອກເຈົ້າໜ້າທີ່ວ່າໄດ້ຊື້ນໍາທ້າວ ແຫຼວທອງ ຫຼື ແຫຼ້ ອາຍຸ 36 ປີ ຢູ່ບ້ານ ໂສກປ່າຫຼວງ ເມືອງສີສັດຕະນາກ.
ຮອດເວລາ 17:30 ໂມງ ຂອງວັນດຽວກັນ ເຈົ້າຫນ້າທີ່ ກໍສາມາດຈັບຕົວ ທ້າວ ແຫຼວທອງ ຫຼື ແຫຼ້ ໄດ້ພ້ອມຢາບ້າຈໍານວນ 247 ເມັດ, ຢາໄອ້ສ 01 ຖົງນ້ອຍ, ໂທລະສັບມືຖື 02 ຫນ່ວຍ, ລົດຈັກເວບ 100 ສີຟ້າ ບໍ່ມີຫມາຍທະບຽນ ( ລົດດັດແປງ ), ເງີນກີບ: 47.626.000 ກີບ ( ສີ່ເຈັດລ້ານຫົກແສນຊາວຫົກພັນກີບ ), ເງີນບາດ: 2.000 ບາດ ( ສອງພັນບາດ ).
ທ້າວ ແຫຼວທອງ ສາລະພາບວ່າ: ໄດ້ຊື້ຢາເສບຕິດນໍານາງ ກາຍີ້ງ ທ່າວ ອາຍຸ 28 ປີ ຢູ່ ບ້ານ ໂພນແກ້ວ ເມືອງ ນາຊາຍທອງ ນະຄອນຫຼວງວຽງຈັນ.
ເວລາ 19:55 ໂມງ ຂອງວັນດຽວກັນ ຈົ້າໜ້າທີ່ຈຶ່ງໄດ້ຂະຫຍາຍຜົນຫາກຸ່ມຂະບວນການຢູ່ບ້ານ ໂພນແກ້ວ ເມືອງ ນາຊາຍທອງ ນະຄອນຫຼວງວຽງຈັນ ສາມາດຈັບຕົວໄດ້ 01 ຄົນຄື: ນາງ ກາຍິ້ງ ທ່າວ ອາຍຸ 28 ປີ ອາຊີບ ກໍາມະກອນ ຢູ່ບ້ານໂພນແກ້ວ ເມືອງ ນາຊາຍທອງ ນະຄອນຫຼວງວຽງຈັນ ພ້ອມຍຶດຂອງກາງ ແລະ ເຄື່ອງຕິດຕົວມີຄື:
1. ຢາເສບຕິດປະເພດຢາບ້າຈໍານວນ 36.609 ເມັດ.
2. ປືນສັ້ນຈໍານວນ 01 ບອກ ພ້ອມລູກປືນ 07 ລູກ ( ປືນດັດແປງ ).
3. ສາຍຄໍສີເຫຼືອງຄ້າຍຄໍາຈໍານວນ 01 ເສັ້ນ.
4. ໂທລະສັບວິໂຟນຢູນິເທວສີດໍາ ຈໍານວນ 01 ຫນ່ວຍ.
5. ລົດຈັກຮອນດ້າເວບ 100 ຈໍານວນ 02 ຄັນ. 6. ເງີນກີບ: 2.100.000 ກີບ. 7. ເງີນບາດ: 31.200 ບາດ. 8. ເງິນໂດລາ: 50 ໂດລາ.
ປັດຈຸບັນ, ເຈົ້າໜ້າທີ່ ປກສ ເມືອງຫາດຊາຍຟອງກໍາລັງສືບສວນ-ສອບສວນຂາຍຫຍາຍຜົນ ເພື່ອຊອກຫາກຸ່ມແກ້ງຜູ້ຮ່ວມຂະບວນການ ເພື່ອນໍາຕົວພວກກ່ຽວມາ ດໍາເນີນຄະດີຕາມຂັ້ນຕອນຂອງກົດໝາຍ.
