ສສຊ ສໍາເລັດການພິຈາລະນາວຽກງານຂອງລັດຖະບານໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ

ທ່ານ ສົມມາດ ພົນເສນາ ຮອງປະທານສະພາແຫ່ງຊາດ ໄດ້ຖະແຫຼງຂ່າວຜົນການພິຈາລະນາວຽກງານຂອງລັດຖະບານໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ, ແຜນເງິນຕາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2022 ແລະ ຄວາມຄືບໜ້າການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ຕໍ່ສື່ມວນຊົນໃນວັນທີ 21 ມິຖຸນາວ່າ: ບັນດາສະມາຊິກສະພາແຫ່ງຊາດໄດ້ຊັກຖາມລັດຖະບານດ້ວຍຄວາມຮັບຜິດຊອບສູງ ພ້ອມທັງສະເໜີກົນໄກ, ວິທີການ ແລະ ມາດຕະການ ເພື່ອໃຫ້ລັດຖະບານນຳໄປຄົ້ນຄວ້າປັບປຸງ ແລະ ແກ້ໄຂໃນຕໍ່ໜ້າໃຫ້ສອດຄ່ອງກັບສະພາບ ແລະ ເງື່ອນໄຂຄວາມເປັນຈິງຂອງປະເທດເຮົາ.

ຕໍ່ແຜນພັດທະນາ ເສດຖະກິດ-ສັງຄົມ, ແຜນງົບປະມານແຫ່ງລັດ ແລະ ແຜນເງິນຕາ, ບັນດາສະມາຊິກ ສະພາແຫ່ງຊາດ ໄດ້ສະເໜີໃຫ້ສູ້ຊົນຮັກສາລະດັບອັດຕາການເຕີບໂຕຂອງເສດຖະກິດໄວ້ໃນລະດັບ 4,4% ເພາະຄາດວ່າມີຄວາມເປັນໄປໄດ້ອີງໃສ່ສະພາບເງື່ອນໄຂຕົວຈິງຂອງບັນດາຂະແໜງການເຫັນວ່າມີທ່າແຮງ ແລະ ຄວາມສາມາດຈັດເກັບລາຍຮັບເຂົ້າງົບປະມານທ້າຍປີ 2022; ຮີບຮ້ອນສະໜອງປັດໄຈການຜະລິດກະສິກໍາໃຫ້ກະສິກອນເພື່ອຮັບໃຊ້ການຜະລິດໃນລະດູຝົນໃຫ້ພຽງພໍເປັນຕົ້ນແນວພັນພືດ, ແນວພັນສັດ, ຝຸ່ນ ແລະ ປຸ໋ຍ ພ້ອມທັງຊຸກຍູ້ສົ່ງເສີມໃຫ້ຜູ້ຜະລິດເອົາໃຈໃສ່ຜະລິດ ເພື່ອທົດແທນການນຳເຂົ້າ ແລະ ເປັນສິນ ຄ້າສົ່ງອອກໃຫ້ເປັນຮູບປະທໍາຕາມສັນຍາການສົ່ງອອກທີ່ໄດ້ເຊັນກັບຕະຫຼາດຕ່າງປະເທດ; ຮີບຮ້ອນຕັດສິນໃຈແກ້ໄຂບັນຫາລາຄາສິນຄ້າແພງ, ນໍ້າມັນແພງ, ເງິນເຟີ້ ແລະ ຊຸກຍູ້ການຜະລິດຢ່າງຈິງຈັງເພື່ອຮັບປະ ກັນບໍ່ໃຫ້ຂາດເຂີນອາຫານໃນປີຕໍ່ໄປ, ປຸກລະດົມນໍ້າໃຈຮັກຊາດ ແລະ ສ້າງຄ່ານິຍົມໃຫ້ຄົນລາວຫັນມາໃຊ້ຜະລິດຕະພັນຂອງລາວຫຼາຍຂຶ້ນ, ເຂັ້ມງວດການນໍາເຂົ້າສິນຄ້າທີ່ສາມາດຜະລິດໄດ້ພາຍໃນ ທັງຄົ້ນຄວ້າການນຳເຂົ້ານໍ້າມັນຈາກຫຼາຍແຫຼ່ງ ແລະ ຊຳລະດ້ວຍເງິນສະກຸນອື່ນນອກຈາກສະກຸນເງິນໂດລາ; ຮີບຮ້ອນເອົາໃຈໃສ່ຈັດເກັບລາຍຮັບຈາກຖານລາຍຮັບທີ່ໝັ້ນຄົງ, ນໍາໃຊ້ເຄື່ອງມືທັນສະໄໝຜ່ານລະບົບທະນາຄານໃຫ້ຄົບຖ້ວນ, ສະເໜີໃຫ້ແບ່ງຂັ້ນຄຸ້ມຄອງການຈັດເກັບອາກອນເປັນຕົ້ນການເກັບຄ່າທຳນຽມ ແລະອາກອນ ທີ່ດິນ, ການຄ້າອອນລາຍ, ການຊື້-ຂາຍເງິນຄຣິບໂຕ ແລະ ອື່ນໆຜ່ານລະບົບທະນາຄານທັງຄຸ້ມຄອງແຫຼ່ງລາຍຮັບທີ່ເປັນເງິນຕາຕ່າງປະເທດຈາກແຫຼ່ງຕ່າງໆເປັນຕົ້ນທຶນຈົດທະບຽນການລົງທຶນຕ່າງປະເທດ, ການສົ່ງອອກສິນຄ້າ (ໄຟຟ້າ, ແຮ່ທາດ, ອຸດສາຫະກຳປຸງແຕ່ງ, ກະສິກຳ,…) ຜ່ານລະບົບທະນາຄານໃຫ້ຄົບຖ້ວນ, ແນໃສ່ຮັບປະກັນການສະໜອງເງິນຕາຕ່າງປະເທດໃຫ້ພຽງພໍຕໍ່ການຈັດຊື້ນໍ້າມັນເຊື້ອໄຟ ແລະ ສິນ ຄ້າອຸປະໂພກ-ບໍລິໂພກອື່ນໆ ທີ່ຈຳເປັນຕໍ່ການຜະລິດ ແລະ ການຊົມໃຊ້ໃນສັງຄົມ; ຮີບຮ້ອນແກ້ໄຂບັນຫາການຊື້-ຂາຍເງິນຕາຕ່າງປະເທດນອກລະບົບ, ຫຼຸດຜ່ອນຄວາມແຕກໂຕນລະຫວ່າງອັດຕາແລກປ່ຽນຂອງທະນາຄານ ແລະ ອັດຕາແລກປ່ຽນພາຍນອກ, ຈຳກັດການນໍາໃຊ້ເງິນຕາຕ່າງປະເທດທີ່ຊະຊາຍ, ປະຕິບັດການແລກປ່ຽນເງິນຕາຕ່າງປະເທດຜ່ານລະບົບທະນາຄານເປັນອັດຕາດຽວ, ກໍານົດອັດຕາສ່ວນການຖືຄອງເງິນຕາຕ່າງປະເທດໃຫ້ບຸກຄົນ, ນິຕິບຸກຄົນ ຢ່າງຈະແຈ້ງ, ດໍາເນີນມາດຕະການລົງໂທດທີ່ເດັດຂາດຕໍ່ບຸກ ຄົນ ຫຼື ນິຕິບຸກຄົນ ທີ່ປັ່ນປ່ວນເຮັດໃຫ້ອັດຕາແລກປ່ຽນມີການຜັນຜວນ ແລະ ຜູ້ທີ່ກັກຕຸນເງິນຕາຕ່າງປະ ເທດໄວ້ ພ້ອມທັງມອບໃຫ້ທະນາຄານທຸລະກິດ ເຮັດທຸລະກໍາແລກປ່ຽນເງິນຕາຕ່າງປະເທດດ້ວຍຕົນເອງຕາມອັດຕາແລກປ່ຽນປະຈໍາວັນທີ່ທະນາຄານແຫ່ງ ສປປ ລາວ ກໍານົດ; ເອົາໃຈໃສ່ໂຄສະນາ ແລະ ສົ່ງ ເສີມການນໍາໃຊ້ເງິນກີບໃຫ້ກວ້າງຂວາງ ແລະ ຖືກຕ້ອງຕາມກົດໝາຍວ່າດ້ວຍການຄຸ້ມຄອງເງິນຕາຕ່າງ ປະເທດ ແລະ ກົດໝາຍອື່ນທີ່ກ່ຽວຂ້ອງຢ່າງເຂັ້ມງວດ ເປັນຕົ້ນການກຳນົດລາຄາສິນຄ້າ, ການຊຳລະສິນ ຄ້າ ແລະ ການຈ່າຍເງິນເດືອນຄ່າແຮງງານ; ເອົາໃຈໃສ່ຈັດສັນງົບປະມານໂຄງການລົງທຶນຂອງລັດປີ 2023 ໃຫ້ສຳເລັດໃນທ້າຍປີ 2022 ໃຫ້ທັນຮັບຮອງໃນກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດພ້ອມທັງກໍານົດຫຼັກການຈັດສັນງົບປະມານໂຄງການລົງທຶນຂອງລັດໃຫ້ຈະແຈ້ງ; ເອົາໃຈໃສ່ຈັດສັນງົບປະມານໃສ່ໂຄງການກໍ່ສ້າງເສັ້ນທາງຢູ່ເຂດຫ່າງໄກສອກຫຼີກເພື່ອຮັບໃຊ້ການຜະລິດ ແລະ ອຳນວຍຄວາມສະດວກໃນການເດີນທາງໄປ-ມາຂອງນັກຮຽນລວມທັງໂຄງການທີ່ມີຄວາມສຳຄັນດ້ານຍຸດທະສາດຊາຍແດນທີ່ກໍ່ສ້າງມາຫຼາຍປີ; ສະເໜີໃຫ້ຄົ້ນຄວ້າ ແລະ ຈັດສັນງົບປະມານເຂົ້າໃສ່ການປະຕິບັດນະໂຍ ບາຍຕໍ່ຜູ້ມີຄຸນງານຄວາມດີຕໍ່ການປະຕິວັດຊາດປະຊາທິປະໄຕໃຫ້ສົມຄູ່ກັບຄວາມສາມາດດ້ານງົບປະມານຕົວຈິງ; ສະເໜີໃຫ້ຮີບຮ້ອນແກ້ໄຂບັນຫາໄພວ່າງງານ ແລະ ຄຸ້ມຄອງແຮງງານລາວທີ່ເຄື່ອນຍ້າຍໄປເຮັດວຽກຢູ່ເຂດເສດຖະກິດພິເສດ ແລະ ໄປອອກແຮງງານຢູ່ຕ່າງປະເທດເພື່ອໃຫ້ປອດໄພ ແລະ ໄດ້ຮັບການປົກປ້ອງ.

ຕໍ່ຄວາມຄືບໜ້າການຈັດຕັ້ງປະຕິບັດວາລະແຫ່ງຊາດ, ບັນດາສະມາຊິກສະພາແຫ່ງຊາດເຫັນວ່າ:
– ຂະແໜງ ການສູນກາງ ແລະ ທ້ອງຖິ່ນ ຍັງບໍ່ເປັນເອກະພາບແລະ ເຂົ້າໃຈຢ່າງເລິກເຊິ່ງຕໍ່ຄວາມຮຸນແຮງຂອງບັນຫາ ແລະ ບໍ່ທັນເດັດຂາດແກ້ໄຂບັນຫາທີ່ພົວພັນກັບຂະແໜງການຂອງຕົນໃຫ້ມີໝາກຜົນຕົວຈິງ, ຍັງຊັກຊ້າ, ເອື່ອຍອີງ ແລະ ຖີ້ມຄວາມຮັບຜິດຊອບໃສ່ກັນ;
– ການແກ້ໄຂບັນຫາ ແລະ ການກໍານົດບັນດາມາດຕະການບ່ອນທີ່ມີໂຄງການທົດລອງຍັງບໍ່ທັນໂປ່ງໃສ, ຍັງບໍ່ໄດ້ມີສ່ວນຮ່ວມແຕ່ຫົວທີຂອງອົງການປົກຄອງ ແລະປະ ຊາຊົນຢູ່ທ້ອງຖິ່ນ,ປະຊາຊົນເອງກໍຍັງບໍ່ທັນເຂົ້າໃຈ ແລະ ຍັງຂັດຂ້ອງ;
– ການປະຕິບັດວາລະແຫ່ງຊາດຍັງບໍ່ທັນໄປຕາມຫຼັກການທີ່ເປັນມືອາຊີບ, ການຄົ້ນຄວ້າວາງແຜນຍັງຂາດລັກສະນະວິທະຍາສາດ, ຍັງບໍ່ທັນໄດ້ ນໍາໃຊ້ວິຊາການຜູ້ທີ່ມີຄວາມຮູ້ຄວາມຊຳນານ ແລະ ປະສົບການທີ່ແນ່ນອນ;
– ສະເໜີໃຫ້ເອົາໃຈໃສ່ຈັດສັນ ແບ່ງເຂດດິນກະສິກໍາເພື່ອການຜະລິດສະໜອງພາຍໃນແລະເປັນສິນຄ້າສົ່ງອອກຕາມທ່າແຮງຄວາມເໝາະ ສົມຂອງແຕ່ລະທ້ອງຖິ່ນໃຫ້ຈະແຈ້ງ;
– ສົ່ງເສີມຂອດການຜະລິດເປັນສິນຄ້າເພື່ອສົ່ງອອກ ແລະ ການຫັນ ປ່ຽນຈາກສັງຄົມບໍລິໂພກໄປເປັນສັງຄົມການຜະລິດ ໂດຍສະເພາະການປັບປຸງກໍາລັງການຜະລິດເປັນກຸ່ມ ຫຼື ສະຫະກອນ, ແກ້ໄຂຂອດຂັ້ນການດໍາເນີນເອກະສານນໍາເຂົ້າ-ສົ່ງອອກໃຫ້ຄ່ອງຕົວກວ່າເກົ່າ;
– ຮັບປະກັນຄວາມເຂັ້ມແຂງດ້ານບຸກຄາລະກອນໃນຂົງເຂດກະສິກໍາ ແລະ ປ່າໄມ້;
– ແຫຼ່ງລາຍຮັບໃໝ່ຍັງບໍ່ທັນຫຼາຍ, ມີພຽງແຕ່ແຮ່ທາດ ແລະ ຂຸດຄົ້ນເງິນຄຣິບໂຕຊຶ່ງເປັນແຫຼ່ງລາຍຮັບທີ່ບໍ່ທັນແນ່ນອນເນື່ອງຈາກເປັນການເຮັດ ທົດລອງ ແລະ ປັດໄຈລາຄາຍັງມີຄວາມສ່ຽງ, ແຫຼ່ງລາຍຮັບທີ່ມີ ແລະ ໝັ້ນຄົງຍັງເກັບບໍ່ໄດ້ຄົບຖ້ວນ ເປັນ ຕົ້ນລາຍຮັບຈາກທີ່ດິນ ແລະ ຄ່າທຳນຽມທາງ;
– ການຍົກສູງປະສິດທິຜົນການຄຸ້ມຄອງລາຍຈ່າຍງົບປະມານ ຂອງລັດເປັນຕົ້ນດຳລັດວ່າດ້ວຍລົດຂອງລັດເລກທີ 599/ລບ ຍັງບໍ່ໄດ້ຮັບການຈັດຕັ້ງປະຕິບັດຢ່າງເປັນຮູບປະທຳ ໂດຍສະເພາະຄວາມເປັນເຈົ້າການຂອງພະນັກງານລັດກໍຄືຜູ້ທີ່ນຳໃຊ້ ແລະ ເຈົ້າໜ້າທີ່ຄຸ້ມຄອງຊັບສິນຂອງລັດ;
– ສະເໜີໃຫ້ກວດກາ ແລະ ປະເມີນຄືນໂຕເລກດຸນການຄ້າ ແລະ ດຸນຊຳລະສະສາງກັບຕ່າງປະເທດ ໃຫ້ຈະຈແຈ້ງໂດຍສະເພາະມູນຄ່າການສົ່ງອອກ-ນຳເຂົ້າ ແລະ ການຊຳລະສະສາງທີ່ເປັນເງິນຕາ ຕ່າງປະເທດຜ່ານລະບົບທະນາຄານ; ການໂຄສະນາເຜີຍແຜ່ກົດໝາຍ ແລະ ນິຕິກຳໃຕ້ກົດໝາຍ ຍັງບໍ່ທັນເລິກເຊິ່ງ, ກວ້າງຂວາງ ແລະ ທົ່ວເຖິງ, ການປະຕິບັດກົດໝາຍ ແລະ ນິຕິກຳໃຕ້ກົດໝາຍຍັງບໍ່ທັນເຂັ້ມງວດ, ເດັດຂາດ ແລະ ບໍ່ມີຜົນສັກສິດເທົ່າທີ່ຄວນ.