Bugatti Veyron ລາຄາກວ່າ 30 ຕື້ກີບ ຂອງ ໂຣນັລໂດ້ ຖືກທີມງານສ່ວນຕົວ ຂັບຕຳກຳແພງຈົນເພເສຍຫາຍທີ່ສະເປນ

ໃນເວລານີ້ ຄຣິສເຕຍໂນ້ ໂຣນັລໂດ້ ແລະ ຄອບຄົວກຳລັງຢູ່ໃນຊ່ວງພັກຜ່ອນກັນຢ່າງພ້ອມໜ້າພ້ອມຕາ ຫຼັງຈົບລະດູການ 2021-22 ທີ່ເກາະມາຍອລກ້າ ປະເທດສະເປນ ຫຼັງຈາກເດີນທາງມາດ້ວຍເຄື່ອງບິນສ່ວນຕົວຕັ້ງແຕ່ວັນທີ 14 ມິຖຸນາ ທີ່ຜ່ານມາ. ພ້ອມກັບເຊົ່າເຮືອນພັກວິນລາບໍລິເວນຕີນພູ ຕຣາມຸນຕານ່າ ໃນລາຄາ 10,000 ປອນຕໍ່ຄືນ (ປະມານ 182.780.000 ກີບ).

ຢ່າງໃດກໍ່ຕາມ, ໃນການເດີນທາງໄປປະເທດສະເປນຄັ້ງນີ້, ໂຣນັລໂດ້ ໄດ້ນຳເອົາລົດຫລູຊຸບເປີ້ຄາຈາກອັງກິດໄປນຳ 2 ຄັນຄື: ລົດ Bugatti Veyron ສີດໍາ 900 ແຮງມ້າ ແລະ ລາຄາ 1.7 ລ້ານປອນ (ປະມານ 30 ຕື້ກີບ) ແລະ Mercedes-Benz G.-Class ເພື່ອໃຫ້ ໂຣນັລໂດ້ ແລະ ຄອບຄົວໄດ້ເພີດເພີນໃນຊ່ວງວັນພັກຮ້ອນ

ແຕ່ໃນຕອນເຊົ້າຂອງມື້ວານນີ້ (20 ມິຖຸນາ) ເວລາ 11:00 ໂມງຕາມເວລາທ້ອງຖິ່ນ ຕຳຫຼວດ ມາຍອລກ້າ ລາຍງານວ່າ ລົດຊຸບເປີລົດ Bugatti Veyron ສີດຳ ຂອງກອງໜ້າແມນເຊັສເຕີ ຢູໄນເຕັດ ປະສົບອຸປະຕິເຫດຕຳກັບກຳແພງໃນເຂດເມືອງ ຊາໂຄມາ. ດ້ານໜ້າຂອງລົດໄດ້ຮັບຄວາມເສຍຫາຍຢ່າງໜັກ, ແນວໃດກໍ່ຕາມ, ໂຣນັລໂດ້ ບໍ່ໄດ້ຢູ່ໃນລົດຄັນດັງກ່າວ. ແຕ່ເປັນທີມງານສ່ວນຕົວຂອງເຂົາທີ່ຂັບຂີ່ຈົນເກີດອຸປະຕິເຫດ.

ຂະນະ​ນີ້ ຕຳຫຼວດ​ພວມ​ສືບສວນ​ເຫດການ​ດັ່ງກ່າວ. ເຊິ່ງຄາດວ່າພະນັກງານຂອງ ໂຣນັລໂດ້ ໄດ້ຖືກມອບຫມາຍໂດຍຜູ້ກ່ຽວອາຍຸ 37 ປີ ໃຫ້ນໍາໃຊ້ຍານພາຫະນະດັ່ງກ່າວໃນການເດີນທາງໄປວຽກອະສັງຫາລິມະສັບໃນລີສອດຊາຍຝັ່ງຕາເວັນອອກຂອງ ຊາໂຄມາ. ​ເຖິງ​ຢ່າງ​ໃດ​ກໍ​ຕາມ​ບໍ່​​ມີ​ລາຍ​ງານ​ວ່າ​ມີ​ຜູ້​ບາດ​ເຈັບ.