ລັດຖະມົນຕີກະຊວງການເງິນເນັ້ນໃຫ້ພະນັກງານຂະແໜງພາສີ ອຳນວຍຄວາມສະດວກການນຳເຂົ້າ-ເຄື່ອນຍ້າຍນຳ້ມັນເຊື້ອໄຟ

ໃນວັນທີ 16 ມິຖຸນາ 2022 ຜ່ານມານີ້, ທີ່ຫ້ອງປະຊຸມກົມສ່ວຍສາອາກອນ ກະຊວງການເງິນ; ທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນ,ໄດ້ໃຫ້ກຽດໂອ້ລົມ ແລະ ທິດຊີ້ນຳແກ່ຄະນະກົມພາສີ, ຄະນະພະແນກ, ຄະນະດ່ານພາສີສາສາກົນຂົວມິດຕະພາບ I, ພ້ອມດ້ວຍຂະແໜງການກ່ຽວຂ້ອງອ້ອມຂ້າງກົມພາສີ ກະຊວງການເງິນ, ກ່ຽວກັບການອຳນວຍຄວາມສະດວກການນ້ຳເຂົ້ານ້ຳມັນເຊື້ອໄຟ, ການເຄື່ອນຍ້າຍນໍ້າມັນເຊື້ອໄຟ, ແກ້ໄຂການແລກປ່ຽນເງິນຕາ ແລະ ແກ້ໄຂບັນຫາເງິນເຟີ້.

ຊຶ່ງກ່ອນອື່ນ,ທ່ານ ລັດຖະມົນຕີກະຊວງການເງິນ, ໄດ້ຮັບຟັງການລາຍງານໂດຍສັງເຂບກ່ຽວກັບການຈັດຕັ້ງປະຕິບັດ ຕາມແຈ້ງການ ສະບັບເລກທີ 01412/ກພສ, ລົງວັນທີ 15 ມີນາ 2022 ເຫັນວ່າສາມາດຄຸ້ມຄອງການເຄື່ອນຍ້າຍນ້ຳມັນເຊື້ອໄຟໄດ້ດີ, ສາມາດອັດຊ່ອງວ່າງໃນການລັກລອບການນຳເຂົ້າໄດ້, ຊຶ່ງພາຍຫຼັງມີການນຳເຂົ້ານຳ້ມັນເຊື້ອໄຟຢູ່ດ່ານພາສີສາກົນໃດໜຶ່ງໃນແຂວງໜຶ່ງແມ່ນສາມາດເຄື່ອນຍ້າຍໄປຊົມໃຊ້ ຫຼື ຈຳໜ່າຍຢູ່ບາງແຂວງທີ່ໃກ້ຄຽງ ຫຼືແຂວງທີ່ບໍ່ມີດ່ານນຳເຂົ້າເທົ່ານັ້ນ.

ໂອກາດດັ່ງກ່າວ, ທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນ ໄດ້ເນັ້ນໃຫ້ກົມພາສີ, ຄະນະດ່ານພາສີສາກົນຂົວມິດຕະພາບ I, ພ້ອມດ້ວຍຂະແໜງການກ່ຽວຂ້ອງ, ຈົ່ງໄດ້ອໍານວຍຄວາມສະດວກການນໍ້າເຂົ້ານ້ຳມັນເຊື້ອໄຟ, ການເຄື່ອນຍ້າຍນໍ້າມັນເຊື້ອໄຟ, ກຳນົດຈຸດນຳເຂົ້າ ແລະ ຈຸດປາຍທາງ, ລວມທັງການແຈກຢາຍນ້ຳມັນເຊື້ອໄຟ.

ສະນັ້ນ,ຈຶ່ງຮຽກຮ້ອງນໍາຂະແໜງການກ່ຽວຂ້ອງອຳນວຍຄວາມສະດວກໃນການນຳເຂົ້ານ້ຳມັນເຊື້ອໄຟ,ເພື່ອໃຫ້ສາມາດແກ້ໄຂບັນຫາການຂາດແຄນນ້ຳມັນເຊື້ອໄຟໃຫ້ໄດ້ທ່ວງທັນຕໍ່ສະພາບການໃນປັດຈຸບັນ.