ລັດຖະບານ ເນັ້ນສ້າງສິ່ງອຳນວຍຄວາມສະດວກບໍລິການ ຄົນເຂົ້າ-ອອກປະເທດໃຫ້ວ່ອງໄວ ພາຍຫລັງເປີດປະເທດເຕັມຮູບແບບ
ທ່ານນາງ ສວນສະຫວັນ ວິຍະເກດ ລັດຖະມົນຕີກະຊວງ ຖວທ ລາຍງານໃນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ IX ໃນວັນທີ 17 ມິຖຸນາ 2022 ວ່າ:
ນັບແຕ່ເປີດປະເທດແບບເຕັມຮູບແບບ, ໄດ້ອອກແຈ້ງການໃຫ້ພະແນກ ຖວທ ທົ່ວປະເທດຈັດຕັ້ງປະຕິບັດແຜນການເປີດຕ້ອນຮັບນັກທ່ອງທ່ຽວເຂົ້າມາທ່ອງທ່ຽວ ສປປ ລາວ ໂດຍການກຽມຄວາມພ້ອມເປັນເຈົ້າພາບທີ່ດີ, ອຳນວຍຄວາມສະດວກໃຫ້ແກ່ນັກທ່ອງທ່ຽວ, ສະໜອງຂໍ້ມູນຂ່າວສານ, ການເດີນທາງພາຍໃນ, ການພັກເຊົາ, ການປັບ ປຸງສະຖານທີ່ທ່ອງທ່ຽວ ແລະ ການບໍລິການຕ່າງໆ; ສືບຕໍ່ຊຸກຍູ້ ແລະ ສະໜອງງົບປະມານຈຳນວນໜຶ່ງໃຫ້ພະແນກ ຖວທ ບັນດາແຂວງເປົ້າໝາຍສົມທົບກັບຜູ້ຄຸ້ມຄອງສະຖານທີ່ທ່ອງທ່ຽວທີ່ໂດດເດັ່ນຂອງແຂວງສ້າງຂະບວນການອະນາໄມ ແລະ ປັບປຸງສິ່ງອຳນວຍຄວາມສະດວກຢູ່ສະຖານທີ່ທ່ອງທ່ຽວທີ່ໄດ້ຮັບຜົນກະ ທົບຈາກພະຍາດໂຄວິດ-19 ເຊັ່ນ: ຢູ່ ນະຄອນຫລວງວຽງຈັນ, ຫລວງພະບາງ, ຈຳປາສັກ, ຫລວງນໍ້າທາ, ຄຳມ່ວນ, ເມືອງວັງວຽງ ແລະ ແຂວງອື່ນໆ; ໄດ້ອອກແບບປົສເຕີໂຄສະນາມາດຕະການເຂົ້າ-ອອກ ສປປ ລາວ ເປັນພາສາລາວ ແລະ ພາສາອັງກິດໃນສື່ສັງຄົມອອນລາຍເພື່ອສື່ສານໃຫ້ນັກທ່ອງທ່ຽວ ແລະ ຜູ້ປະ ກອບການທ່ອງທ່ຽວຮັບຮູ້.
ນັບແຕ່ລັດຖະບານປະກາດເປີດປະເທດ ວັນທີ 9 ພຶດສະພາ ເປັນຕົ້ນມາ, ນະໂຍບາຍການເປີດຕ້ອນຮັບ ນັກທ່ອງທ່ຽວຂອງສປປ ລາວ ໄດ້ໂຄສະນາຜ່ານສື່ສັງຄົມຕ່າງໆທັງພາຍໃນ ແລະ ຕ່າງປະເທດຢ່າງກວ້າງ ຂວາງ ເຮັດໃຫ້ນັກທ່ອງທ່ຽວຈາກພາກພື້ນ ແລະ ສາກົນ ຮັບຮູ້ຫລາຍຂຶ້ນ ແລະ ບັນດາບໍລິສັດຄູ່ສັນຍາຢູ່ຕ່າງປະເທດ ໄດ້ຈອງລາຍການທ່ອງທ່ຽວກັບບັນດາບໍລິສັດຄູ່ສັນຍາຢູ່ພາຍໃນປະເທດ, ຄາດວ່າເດືອນມິຖຸ ນາ 2022 ເປັນຕົ້ນໄປ, ນັກທ່ອງທ່ຽວຈາກພາກພື້ນ ແລະ ສາກົນຈະເຂົ້າມາທ່ຽວສປປ ລາວຫລາຍຂຶ້ນ.
ແຕ່ວັນທີ 9 ພຶດສະພາຫາວັນທີ 6 ມິຖຸນາ 2022 ມີຜູ້ເດີນທາງເຂົ້າ ສປປ ລາວ 55.753 ຄົນ, ຜູ້ເດີນ ທາງອອກ 56.325 ຄົນ, ນັກທ່ອງທ່ຽວພາຍໃນແຕ່ເດືອນມັງກອນ-ເມສາ 2022 ມີ 463.907 ເທື່ອຄົນ ທຽບໃສ່ 4 ເດືອນຕົ້ນປີ 2021 ຫລຸດລົງ 18,9%, ສາມາດເກັບລາຍຮັບຈາກນັກທ່ອງທ່ຽວພາຍໃນ 617 ຕື້ກວ່າກີບ, ສະເລ່ຍໄລຍະພັກເຊົາ 2,5 ວັນ/ຄົນ ແລະ ລາຍຈ່າຍສະເລ່ຍ 530.000 ກີບ ຕໍ່ຄົນ/ມື້.
