ເປັນໜີ້ໄດ້ກໍປົດໜີ້ໄດ້ 6 ວິທີປົດໜີ້ສຳລັບຄົນຄິດໄດ້ ຢາກຕັ້ງຫລັກຊີວິດໃໝ່.
ຫາກເວົ້າເຖິງບັນຫາດ້ານການເງິນທີ່ທຸກຄົນຕ້ອງພົບ ແລະ ມັກຈະເຂົ້າສູ່ວົງຈອນທີ່ມັກແກ້ກັນບໍ່ຕົກຢູ່ຫລາຍເທື່ອ ນັ້ນກໍຄື ການເປັນໜີ້. ຈະດີກ່ວາບໍ່ ? ຫາກທ່ານສາມາດປົດໜີ້ທີ່ມີຢູ່ໃຫ້ຫາຍໄປດ້ວຍການປະຕິບັດຕາມ 6 ວິທີປົດໜີ້ໄວທີ່ພວກເຮົານຳມາຝາກໃນມື້ນີ້ ໂດຍແຕ່ລະໄອເດຍນັ້ນຖືເປັນເຄັດລັບທາງການເງິນທີ່ຊ່ວຍແກ້ບັນຫາໜີ້ສິນຄົງຄ້າງໄດ້ເປັນຢ່າງດີ.
- ແຍກປະເພດໜີ້ໃຫ້ຖືກຕ້ອງ : ໂດຍທ່ານສາມາດແບ່ງແຍກໜີ້ທີ່ມີອອກເປັນ 2 ກຸ່ມໄດ້ດັ່ງນີ້ : ໜີ້ດີ – ໜີ້ບໍ່ດີ. ການປົດໜີ້ໂດຍການຄັດແຍກໜີ້ດີ ແລະ ໜີ້ບໍ່ດີ ເປັນວິທີການຈັດການໝວດໝູ່ໜີ້ໄປພ້ອມໆກັບການຮຽນຮູ້ພຶດຕິກຳການໃຊ້ເງິນທີ່ກໍ່ໃຫ້ເກີດໜີ້ຕາມມາໄດ້ໃນເທື່ອດຽວ ໂດຍຈະຕ້ອງຈຳແນກໃຫ້ໄດ້ວ່າ ໜີ້ທີ່ມີຢູ່ຫລາຍກ້ອນນັ້ນເປັນໜີ້ທີ່ສາມາດສ້າງລາຍຮັບກັບມາໃຫ້ໃນພາຍຫລັງ (ໜີ້ດີ) ຫລື ເປັນໜີ້ທີ່ບໍ່ໄດ້ສ້າງປະໂຫຍດຕາມມາເລີຍ (ໜີ້ບໍ່ດີ). ຍົກໂຕຢ່າງໜີ້ທັງ 2 ຮູບແບບ ເຊັ່ນ : ໜີ້ຈາກການຊື້ສິນຄ້າ, ເຄື່ອງນຸ່ງ ຫລື ເຄື່ອງໃຊ້ຕ່າງໆທີ່ເປັນສິນຄ້າຕາມແຟຊັ່ນ ຕະຫລອດຮອດການກິນອາຫານຄາບລະແພງໆ ທັງໝົດນີ້ເປັນໜີ້ບໍ່ດີທີ່ເກີດຈາກຄວາມຟູມເຟືອຍຂອງຕົນເອງ. ສ່ວນປະເພດໜີ້ສິນທີ່ເກີດຈາກການລົງທຶນ ເຊັ່ນ : ການປ່ອຍເຊົ່າອະສັງຫາລິມະຊັບ ຈະເປັນໜີ້ທີ່ຈັດຢູ່ໃນປະເພດໜີ້ດີທີ່ສາມາດສ້າງລາຍຮັບໄດ້ຈາກຄ່າເຊົ່າ ເຊິ່ງຊ່ວຍໃນການຜ່ອນຊັບສິນທີ່ຊື້ມາ ທັງຍັງມີມູນຄ່າເພີ່ມຂຶ້ນຕາມເວລາ ຫາກຢາກຈະຂາຍໃນພາຍຫລັງກໍຍັງສ້າງກຳໄລໃຫ້ກັບເຈົ້າຂອງໜີ້ໄດ້ນຳອີກ.
- ຈັດລຳດັບໜີ້ຕາມອັດຕາການເສຍດອກເບ້ຍ : ຫລັງຈາກຈຳແນກໜີ້ດີ – ໜີ້ບໍ່ດີໄດ້ແລ້ວ ກໍໃຫ້ເອົາໜີ້ທັງ 2 ປະເພດມາຈັດອັນດັບ ແລະ ໄຈ້ແຍກ ເພື່ອເຂົ້າສູ່ຂະບວນການປົດໜີ້ໃນຂັ້ນຕໍ່ໄປ ນັ້ນກໍຄື ການລຽງລຳດັບວ່າ ໜີ້ກ້ອນໃດເປັນໜີ້ສິນທີ່ຈະຕ້ອງເສຍດອກເບ້ຍຫລາຍທີ່ສຸດ ໃຫ້ເລີ່ມປົດໜີ້ສ່ວນນັ້ນກ່ອນເປັນອັນດັບທຳອິດ ເພື່ອຢຸດວົງຈອນການທົບຕົ້ນທົບດອກຂອງໜີ້ທີ່ເກີດຂຶ້ນ ເຊິ່ງຈະຊ່ວຍໃຫ້ປົດໜີ້ໄດ້ໄວຍິ່ງຂຶ້ນນຳ.
- ຢຸດວົງຈອນການສ້າງໜີ້ : ໃນລະຫວ່າງທີ່ຍັງຊຳລະໜີ້ເກົ່າບໍ່ໝົດ ກໍຕ້ອງຢຸດການສ້າງໜີ້ໃໝ່ ໂດຍມາດຕະການຮັດສາຍແອວໃຫ້ຕົນເອງ ເຊິ່ງທ່ານສາມາດສຶກສາວິທີການຕັດ, ຢຸດ, ເຊົາການສ້າງໜີ້ໄດ້ດັ່ງນີ້ :
- ຕັດພາລະລາຍຈ່າຍທີ່ບໍ່ຈຳເປັນ.
- ຢຸດການໃຊ້ບັດເຄຣດິດ.
- ຫ້າມຫຍຸ້ງກັບການກູ້ຢືມໜີ້ນອກລະບົບ.
- ເຊົາໃຊ້ວິທີໝູນເງິນເພື່ອໂປະຍອດໜີ້.
ດັ່ງນັ້ນ, ການປົດໜີ້ໃຫ້ໄດ້ຜົນ ຈຶ່ງຄວນເຊົາໃຊ້ວິທີການໝູນເງິນເພື່ອໂປະຍອດໜີ້ຄົງຄ້າງເກົ່າ, ແຕ່ຄວນຈະເລີ່ມຈາກການຫລຸດຄ່າໃຊ້ຈ່າຍ ແລະ ເລີ່ມປັບໂຄງສ້າງໜີ້ໃໝ່ ໂດຍການວາງແຜນການຊຳລະໜີ້ໃຫ້ມີປະສິດທິພາບຫລາຍຂຶ້ນ.
- ປັບແຜນທາງການເງິນໃໝ່ : ວິທີການທີ່ຈະຊ່ວຍໃຫ້ປົດໜີ້ໄດ້ໄວ ແລະ ໝັ້ນຄົງຫລາຍທີ່ສຸດຄົງຈະໜີບໍ່ພົ້ນກັບການແຜນທາງການເງິນໃໝ່ ເຊິ່ງວິທີນີ້ນອກຈາກຈະຊ່ວຍຫລຸດໜີ້ ແລະ ຄວບຄຸມຄ່າໃຊ້ຈ່າຍໄດ້ດີແລ້ວ ຍັງເປັນພື້ນຖານຂອງການວາງແຜນທາງການເງິນໃຫ້ຊີວິດສາມາດບັນລຸເປົ້າໝາຍທີ່ຕັ້ງໃຈໃນໄລຍະຍາວໄດ້ນຳອີກ. ສ້າງວິໄນທາງການທ້ອນເງິນຂັ້ນເລີ່ມຕົ້ນໄດ້ງ່າຍໆ ດ້ວຍ 3 ຂັ້ນຕອນດັ່ງຕໍ່ໄປນີ້ :
+ ວາງແຜນລາຍຮັບ – ລາຍຈ່າຍ : ສາເຫດທີ່ຄົນເຮົາມັກມີພຶດຕິກຳການໃຊ້ຈ່າຍເກີນໂຕ ເປັນຍ້ອນແນມບໍ່ເຫັນວ່າໃນແຕ່ລະເດືອນເຮົາໝົດເງິນໄປກັບສິ່ງຕ່າງໆຫລາຍໜ້ອຍປານໃດ. ດັ່ງນັ້ນ, ການເລີ່ມຕົ້ນປົດໜີ້ດ້ວຍການວາງແຜນລາຍຮັບ – ລາຍຈ່າຍ ຈຶ່ງເປັນສິ່ງສຳຄັນທີ່ຈະຊ່ວຍເຮັດໃຫ້ແນມເຫັນພາບກ້ວາງຫລາຍຂຶ້ນວ່າ ໃນແຕ່ລະເດືອນຄວນສ້າງຄວາມດຸ່ນດ່ຽງໃຫ້ກັບລາຍຮັບ ແລະ ລາຍຈ່າຍໃຫ້ເກີດຂຶ້ນໄດ້ແນວໃດ ໂດຍການສ້າງ 2 ບັນຊີຫລັກໄວ້ສຳລັບບັນທຶກຄ່າໃຊ້ຈ່າຍ ດັ່ງນີ້ :
- ບັນຊີລາຍຮັບ – ລາຍຈ່າຍປະຈຳວັນ ເປັນຮູບແບບບັນຊີທີ່ຊ່ວຍໃນການສຳຫລວດຕົນເອງວ່າການໃຊ້ເງິນໃນແຕ່ລະມື້ເກີນງົບທີ່ຕັ້ງໄວ້ແຕ່ທຳອິດຫລືບໍ່, ມີຄ່າໃຊ້ຈ່າຍສ່ວນໃດທີ່ເສຍໄປແບບໄຮ້ປະໂຫຍດ ຍ້ອນພຶດຕິກຳແບບເກົ່າໆຫລືບໍ່ ເຊັ່ນ : ຄ່າເຄື່ອງດື່ມ ຈຳພວກນຳ້ອັດລົມ, ຊາ, ກາເຟ ທີ່ຕ້ອງຈ່າຍມື້ລະ 5,000 – 10,000 ກີບ ຫລື ຫລາຍກ່ວານີ້ ຈຳນວນເງິນນີ້ອາດຈະເປັນຈຳນວນເງິນເລັກນ້ອຍໃນແຕ່ລະມື້ ແຕ່ເມື່ອເອົາບັນຊີລາຍຮັບ – ລາຍຈ່າຍປະຈຳວັນມາເບິ່ງພ້ອມກັນກໍຈະເຫັນຄວາມຟູມເຟືອຍທີ່ອາດບໍ່ຈຳເປັນເກີດຂຶ້ນແບບຊຳ້ໆ ເຊິ່ງບໍ່ເປັນຜົນດີສຳລັບການປົດໜີ້ ເນື່ອງຈາກບໍ່ສາມາດຫລຸດລາຍຈ່າຍໄດ້ເລີຍ. ດັ່ງນັ້ນ, ບັນຊີປະເພດນີ້ຈຶ່ງເປັນຫລັກຖານທີ່ບົ່ງບອກໃຫ້ເຫັນວ່າ ທ່ານຄວນຈະເລີ່ມປັບປ່ຽນການໃຊ້ຈ່າຍໃນແຕ່ລະມື້ແນວໃດ ຈຶ່ງຈະຫລຸດຄ່າໃຊ້ຈ່າຍ ແລະ ມີເງິນທ້ອນໄດ້ຫລາຍຍິ່ງຂຶ້ນນັ້ນເອງ.
- ບັນຊີລາຍຮັບ – ລາຍຈ່າຍປະຈຳເດືອນ : ເປັນບັນຊີພາບລວມທີ່ຈະເຮັດໃຫ້ເບິ່ງເຫັນຄ່າໃຊ້ຈ່າຍໃນແຕ່ລະເດືອນວ່າມີອັດຕາສ່ວນເປັນແນວໃດ ໂດຍຕ້ອງເຮັດການແບ່ງໝວດໝູ່ການໃຊ້ຈ່າຍເງິນໃນແຕ່ລະເດືອນເອົາໄວ້ວ່າ ມີລາຍຮັບ ແລະ ລາຍຈ່າຍຫຍັງທີ່ໝູນວຽນໃນເດືອນນັ້ນໆແດ່ ແລະ ຄວນຫລຸດອັດຕາສ່ວນການໃຊ້ຈ່າຍບ່ອນໃດຈຶ່ງຈະສາມາດຫັກລົບກົບໜີ້ທີ່ມີໄດ້ທັນກັບເວລາທີ່ກຳນົດ.
+ ຂັ້ນທີ 2 ຕັ້ງເປົ້າໝາຍທາງການເງິນ : ປົກກະຕິແລ້ວຈະເປັນການວາງແຜນເພື່ອການທ້ອນເງິນ, ແຕ່ສຳລັບຄົນທີ່ຍັງມີໜີ້ ການຕັ້ງເປົ້າໝາຍໃນເທື່ອນີ້ອາດຈະເປັນການຕັ້ງເປົ້າການຊຳລະໜີ້ໃຫ້ຄົບໂດຍໄວ ເຊິ່ງອາດໃຊ້ການກຳນົດເວລາຊ່ວຍນຳກໍໄດ້ ເຊັ່ນ : ມີໜີ້ຢູ່ທັງໝົດ 24 ລ້ານກີບຕ້ອງຊຳລະໃຫ້ໝົດພາຍໃນ2 ປີ ການຕັ້ງເປົ້າແບບນີ້ກໍຈະຊ່ວຍເຮັດໃຫ້ທ່ານເບິ່ງເຫັນວ່າ ຫາກຢາກໃຊ້ໜີ້ຈຳນວນນີ້ໃນໄລຍະເວລາ 2 ປີ ໃນແຕ່ລະເດືອນຄວນຈະເລີ່ມເຮັດຫຍັງແດ່ ເຊິ່ງອາດຈະເລີ່ມວາງແຜນການທ້ອນເງິນໃຫ້ໄດ້ເດືອນລະ 1 ລ້ານດ້ວຍວິທີການຕ່າງໆ ບໍ່ວ່າຈະເປັນການຝາກເງິນທີ່ໄດ້ດອກເບ້ຍສູງ, ການລົງທຶນໃນກອງທຶນລວມ ຫລື ການຫາລາຍຮັບເສີມທີ່ນອກເໜືອໄປຈາກເງິນເດືອນ ເປັນຕົ້ນ.
+ ຂັ້ນທີ 3 ຮູ້ຈັກການລົງທຶນໃນສິບຊັບຕ່າງໆ : ການລົງທຶນຖືເປັນອີກໜຶ່ງວິທີທີ່ຈະຊ່ວຍເຮັດໃຫ້ທ່ານບັນລຸເປົ້າໝາຍໃນການປົດໜີ້ໄດ້ໄວຂຶ້ນ ໂດຍອາດຈະແບ່ງໜີ້ທີ່ສາມາດຊຳລະໄດ້ໃນໄລຍະຍາວອອກມາ ແລະ ຄຳນວນເບິ່ງວ່າ ການລົງທຶນແບບໃດທີ່ຈະສາມາດສ້າງລາຍຮັບທີ່ພຽງພໍຈະຊຳລະໜີ້ກ້ອນນີ້ໄດ້ແດ່, ແຕ່ກໍຢ່າລືມວ່າການລົງທຶນມາພ້ອມກັບຄວາມສ່ຽງ ດັ່ງນັ້ນ ການບໍລິຫານຄວາມສ່ຽງດ້ານການລົງທຶນເທົ່າທີ່ຮັບໄຫວ ຈຶ່ງເປັນສິ່ງສຳຄັນທີ່ຕ້ອງໃຊ້ເວລາສຶກສາສຳລັບຜູ້ເລີ່ມຕົ້ນການລົງທຶນ.
- ຮູ້ຈັກວິທີຊ່ວຍຫລຸດໜີ້ : ຫາກເວົ້າເຖິງໜີ້ສິນ ແນ່ນອນວ່າຕ້ອງມາພ້ອມກັບດອກເບ້ຍທີ່ຖ້າປ່ອຍໄວ້ເລື້ອຍໆຈະກາຍເປັນບັນຫາໃຫຍ່ ເຊິ່ງໃນຫົວຂໍ້ນີ້ຈະຂໍແນະນຳໃຫ້ຮູ້ຈັກກັບວິທີການຫລຸດພາລະດອກເບ້ຍຈາກການຣີໄຟແນ້ນ ທີ່ເປັນວິທີການຊຳລະເງິນກູ້ຢືມເກົ່າໂດຍເງິນກູ້ຢືມໃໝ່ ແລະ ໃຊ້ສິນຊັບເກົ່າເປັນຫລັກຊັບຄຳ້ປະກັນ ໂດຍສາມາດເຮັດໄດ້ຈາກການຂໍກູ້ຢືມເງິນຈາກສະຖາບັນການເງິນແຫ່ງໃໝ່ເພື່ອເອົາໄປປົດພາລະເງິນກູ້ຢືມເກົ່າທີ່ມີຢູ່ ເຊັ່ນ : ຄົນມີເຮືອນອາດຈະເລືອກໃຊ້ໂຕຊ່ວຍຫລຸດໜີ້ ດັ່ງການຣີໄຟແນ້ນເຮືອນ ເຊິ່ງເປັນວິທີການຊ່ວຍຫລຸດອັດຕາດອກເບ້ຍ ເພີ່ມໄລຍະເວລາການກູ້ຢືມ ແລະ ຈ່າຍຄ່າງວດໃນການຜ່ອນເຮືອນໜ້ອຍລົງກ່ວາເກົ່າ ເຮັດໃຫ້ມີເງິນເຫລືອໃຊ້ຈ່າຍສ່ວນອື່ນໆທີ່ຈຳເປັນໄດ້ຫລາຍຂຶ້ນ ສາມາດເອົາໄປໝູນວຽນໃຊ້ຈ່າຍ ຫລື ໝູນວຽນໃນທຸລະກິດໄດ້ຕໍ່ໄປ.
- ເຂົ້າໄປລົມກັບທະນາຄານ : ເມື່ອເປັນໜີ້ກໍຕ້ອງຢ່າຢ້ານທີ່ຈະພະເຊີນໜ້າກັບເຈົ້າໜ້າທີ່ ດັ່ງນັ້ນ ການເລືອກເຂົ້າໄປລົມກັບທະນາຄານຈຶ່ງເປັນວິທີການທີ່ດີທີ່ສຸດເພື່ອຂໍປະນອມໜີ້ ແລະ ສ້າງການຕົກລົງກັບທາງທະນາຄານໃນການປົດໜີ້ທີ່ມີທັງໝົດໃໝ່ ເຊັ່ນ : ການຂໍປັບຫລຸດດອກເບ້ຍຊົ່ວຄາວ, ການຂໍຈ່າຍແຕ່ດອກເບ້ຍຊົ່ວຄາວ, ການຂໍຢຸດຊຳລະໜີ້ຊົ່ວຄາວ ແລະອື່ນໆ ເພື່ອເປັນການຄືນສະພາບຄ່ອງທາງການເງິນ ແລະ ຕັ້ງຫລັກໄດ້ງ່າຍຂຶ້ນ ເຊິ່ງການພິຈາລະນາປະນອມໜີ້ທັງໝົດ ຈະແລ້ວແຕ່ກໍລະນີ ແລະ ຂຶ້ນຢູ່ກັບທາງທະນາຄານວ່າຈະເລີ່ມຕົ້ນປັບໂຄງສ້າງໜີ້ແນວໃດໄດ້ແດ່ ເພື່ອຊ່ວຍແກ້ໄຂບັນຫາໜີ້ທີ່ເກີດຂຶ້ນໃຫ້ກ່ອນໃນໄລຍະສັ້ນ. ແຕ່ແນວໃດກໍຕາມ ທ່ານຈະຕ້ອງຫາວິທີປົດໜີ້ໃຫ້ໄດ້ຈົນກ່ວາຈະສຳເລັດ ເພື່ອຫລີກເວັ້ນການຂຶ້ນສານ ແລະ ການຖືກຮ້ອງຟ້ອງ ທີ່ອາດເກີດຂຶ້ນໄດ້ໃນພາຍຫລັງ.
