ສານອາຍາຂັ້ນຕົ້ນ ແຂວງບໍລິຄໍາໄຊ ໄດ້ຕັດສິນລົງໂທດ ຈໍາເລີຍຊື່ ທ້າວ ຕຸ້ຍ ອາຍຸ 27 ປີ ຈໍາຄຸກ 3 ປີ ແລະ ປັບໃໝ 5.000.000 ກີບ ໃນສະຖານການລັກຊັບເປັນອາຈິນ ພ້ອມໄຊ້ແທນຄ່າເສຍຫາຍ 600 ກວ່າລ້ານກີບ

ເມື່ອບໍ່ດົນມານີ້, ຈໍາເລີຍຊື່ ທ້າວ ຕຸ້ຍ ອາຍຸ 27 ປີ ຢູ່ບ້ານຈະເລີນ ເມືອງປາກກະດິງ ແຂວງບໍລິຄໍາໄຊ ໄດ້ຖືກ ຄະນະສານອາຍາຂັ້ນຕົ້ນ ແຂວງບໍລິຄໍາໄຊ ຕັດສິນລົງໂທດ ຈໍາຄຸກ 3 ປີ ແລະ ປັບໃໝ 5.000.000 ກີບ ໃນສະຖານການລັກຊັບເປັນອາຈິນພ້ອມທັງໃຫ້ຮັບຜິດຊອບໃຊ້ ແທນຄ່າເສຍຫາຍຈໍານວນ 666 ລ້ານກວ່າກີບ ຄືນໃຫ້ລັດວິສາຫະກິດໄຟຟ້າລາວ.

+ ຕໍ່ກັບການກະທໍາຂອງຈໍາເລີຍ ຕາງໜ້າອົງການ ໄອຍະການປະຊາຊົນ ແຂວງບໍລິຄໍາໄຊ ເປີດເຜີຍວ່າ:

– ພາຍຫຼັງທີ່ ເຈົ້າໜ້າທີ່ ປກສ ແຂວງບໍລິຄໍາໄຊ ໄດ້ຮັບແຈ້ງຄວາມຈາກລັດວິສາຫະກິດໄຟຟ້າລາວສາຂາ ແຂວງບໍລິຄໍາໄຊວ່າມີກຸ່ມຄົນບໍ່ຫວັງດີຈໍານວນໜຶ່ງ ໄດ້ເຄືອນໄຫວລັກເຫຼັກສານເສົາໄຟຟ້າແຮງສູງ ແລະ ນ໊ອດ ຈັບເສົາໄຟຢູ່ເຂດທາງເຂົ້າເຂື່ອນນ້ໍາເທີນ 1 ເມືອງປາກ ກະດິງ ຈຶ່ງໄດ້ລົງສະຖານທີ່ເກີດເຫດ ແລະ ຕິດຕາມການເຄື່ອນໄຫວຂອງກຸ່ມຄົນບໍ່ດີ, ຈົນມາຮອດວັນທີ 19 ເມສາ 2021 ຈຶ່ງສາມາດກັກຕົວ ທ້າວຕຸ້ຍ ມາດໍາເນີຄະດີຕາມລະບຽບກົດໝາຍ.

+ ຜ່ານການສືບສວນ-ສອບສວນ ທ້າວ ຕຸ້ຍ ໃຫ້ການຮັບສາລະພາບວ່າ:

ໃນເດືອນເມສາ 2021, ໄດ້ຮ່ວມກັບພັກພວກ ເຄື່ອນໄຫວລັກຊັບປະເພດເຫຼັກສານເສົາໄຟຟ້າແຮງສູງ ແລະ ນ໋ອດຈັບເສົາໄຟ ຢູ່ເຂດທາງເຂົ້າເຂື່ອນນ້ໍາເທີນ 1 ຈິ່ງ ນວນ 5 ຄັ້ງຄື:

• ຄັ້ງທີ 1: ສາມາດລັກເຫຼັກໄດ້ຈໍານວນ 8 ເສັ້ນ ແລະ ນ໋ອດ 4 ກິໂລກຣາມ
• ຄັ້ງທີ 2: ລັກເຫຼັກໄດ້ 8 ເສັ້ນ ແລະ ນ໋ອດຈໍານວນໜຶ່ງ
• ຄັ້ງທີ 3: ໄດ້ໄປລັກເອົາເຫຼັກສານເສົາໄຟ ແລະ ນ໋ອດ ຈໍານວນ 24 ກິໂລກຣາມ
• ຄັ້ງທີ 4: ລັກເຫຼັກໄດ້ 2 ເສັ້ນ ແລະ ນ໋ອດຈໍານວນໜຶ່ງ
• ຄັ້ງສຸດທ້າຍ: ໄດ້ໄປລັກເອົາເຫຼັກສານເສົາໄຟຟ້າ ຈໍານວນ19 ເສັ້ນ ພ້ອມນ໋ອດ

ເມື່ອລັກໄດ້ແລ້ວ ກໍນໍາໄປຂາຍໃຫ້ຮ້ານຮັບຊື້-ຂາຍ ເຫຼັກເສດ ເປັນຄົນສັນຊາດຫວຽດນາມ ໄດ້ເງິນທັງໝົດ 276.000 ກີບ ແລ້ວມາແບ່ງກັນໄປໃຊ້ຈ່າຍຫຼິ້ນກິນຟຸມເຟືອຍຈົນໝົດ, ຈາກນັ້ນ, ໄລຍະຕໍ່ມາຈຶ່ງຖືກເຈົ້າໜ້າທີ່ກັກຕົວມາດໍາເນີນຄະດີຕາມຂັ້ນຕອນຂອງກົດໝາຍ.
ການກະທໍາຂອງ ທ້າວ ຕຸ້ຍ (ຈໍາເລີຍ) ແມ່ນແຕະຕ້ອງເຖິງສິດ ແລະ ກໍາມະສິດຂອງລັດ ຫຼື ລວມໝູ່, ເຮັດ ໃຫ້ສັງຄົມບໍ່ມີຄວາມເປັນລະບຽບຮຽບຮ້ອຍ, ບ້ານເມືອງ ບໍ່ມີຄວາມສະຫງົບສຸກປອດໄພ, ທັງໆທີ່ຜູ້ກ່ຽວກໍ່ຮູ້ແລ້ວວ່າ: ການລັກຊັບຂອງຄົນອື່ນມາເປັນຂອງຕົນ ທັງຕໍ່ໜ້າ ແລະ ຫຼັບຫຼັງ ແມ່ນຜິດຕໍ່ລະບຽບກົດໝາຍ ແຕ່ຜູ້ກ່ຽວມີ ເຈດຕະນາລັກ, ຈຶ່ງເຫັນວ່າເປັນການກະທໍາຜິດທາງອາຍາສະຖານການລັກຊັບເປັນອາຈິນ ເຊິ່ງຜິດໃນມາດຕາ 231 ວັກ 3 ຂອງປະມວນກົດໝາຍອາຍາ; ດ້ວຍເຫດຜົນ ແລະ ຫຼັກຖານດັ່ງກ່າວ, ຄະນະສານອາຍາຂັ້ນຕົ້ນສານປະຊາຊົນແຂວງບໍລິຄໍາໄຊ ຈຶ່ງເຫັນຄວນພິຈາລະນາຕັດສິນລົງໂທດຈໍາຄຸກຈໍາເລີຍ 3 ປີ ປັບໃໝ 5.000.000 ກີບ ພ້ອມທັງ ໃຫ້ໄຊ້ແທນຄ່າເສຍຫາຍຄືນໃຫ້ລັດວິສາຫະກິດໄຟຟ້າ ລາວ ສາຂາແຂວງບໍລິຄໍາໄຊເປັນເງິນຈໍານວນ 666.714.408 ກີບ.

ສ່ວນຂອງກາງຄະດີທີ່ເຈົ້າໜ້າທີ່ສາມາດກູ້ຄືນມາໄດ້ ມີເຫຼັກ 68 ເສັ້ນ, ນ໋ອດ 35,5 ກິໂລກຣາມ ທີ່ ທ້າວ ຕຸ້ຍ ແລະ ພັກພວກລັກໄປ ໄດ້ມອບຄືນໃຫ້ ລັດວິສາຫະກິດໄຟຟ້າລາວ ສາຂາແຂວງບໍລິຄໍາໄຊແລ້ວ.
ສໍາລັບຜູ້ທີ່ເອົາຕົວຫຼົບໜີ ເຈົ້າໜ້າທີ່ຕໍາຫຼວດ ໄດ້ຂຶ້ນບັນຊີເປົ້າໝາຍນໍາຈັບຕົວ, ຖ້າພົບເຫັນ ແລະ ຈັບຕົວ ພວກກ່ຽວໄດ້ ກໍຈະນໍາມາດໍາເນີນຄະດີຕາມລະບຽບກົດໝາຍຕາມພາຍຫຼັງ.
ສ່ວນຮ້ານທີ່ໄດ້ຮັບຊື້-ຂາຍເຫຼັກຈໍານວນດັ່ງກ່າວເຈົ້າໜ້າທີ່ກໍໄດ້ສ້າງບົດບັກທຶກສຶກສາອົບຮົມ ຖ້າຫາກຍັງມີການເຄື່ອນໄຫວຮັບຊື້-ຂາຍຊັບຜິດກົດໝາຍອີກ ກໍຈະນໍາຕົວມາດໍາເນີນຄະດີຕາມລະບຽບກົດໝາຍໃນຂັ້ນຕໍ່ໄປ.