ລັດຖະບານປາກິດສະຖານຮຽກຮ້ອງປະຊາຊົນ “ຫລຸດດື່ມຊາ” ຊ່ວຍປະເທດ ຊີ້ຊ່ວຍຫລຸດງົບປະມານນຳເຂົ້າໄດ້
ວັນທີ 14 ມິຖຸນາ 2022, ລັດຖະບານປາກິດສະຖານອອກມາຮຽກຮ້ອງໃຫ້ປະຊາຊົນຫລຸດປະລິມານການດື່ມຊາໃນແຕ່ລະວັນລົງ ເພື່ອຊ່ວຍຮັກສາເສດຖະກິດຂອງປະເທດ ຫລັງປະສົບສະພາບເງິນເຟີ້ໜັກ ສວນທາງກັບຄ່າເງິນຣູປີທີ່ອ່ອນຕົວລົງ.
ທ່ານ ອາຊານ ອິກບາລ (Ahsan Iqbal) ລັດຖະມົນຕີວ່າການກະຊວງການວາງແຜນ ແລະ ການພັດທະນາຂອງລັດຖະບານກາງ ເປີດເຜີຍຕໍ່ສື່ມວນຊົນວ່າ: ຊາວປາກິດສະຖານສາມາດຊ່ວຍປະເທດໄດ້ ດ້ວຍການຫລຸດປະລິມານການດື່ມນ້ຳຊາລົງ 1-2 ຈອກຕໍ່ວັນ ເພາະນະໂຍບາຍດັ່ງກ່າວຈະຊ່ວຍໃຫ້ຄ່າໃຊ້ຈ່າຍດ້ານການນຳເຂົ້າຂອງພາກລັດຫລຸດລົງ ເນື່ອງຈາກປາກິດສະຖານເປັນປະເທດທີ່ນຳເຂົ້າຊາຫລາຍທີ່ສຸດໃນໂລກ.
ທ່ານ ອິກບາລ ຍອມຮັບວ່າ: ປັດຈຸບັນປາກິດສະຖານໃຊ້ເງິນກູ້ມານຳເຂົ້າຊາ ໂດຍໃນປີ 2020 ລັດຖະບານໃຊ້ງົບນຳເຂົ້າຊາສູງເຖິງ 640 ລ້ານໂດລາສະຫະລັດ. ນອກຈາກນີ້ ທ່ານຍັງຂໍໃຫ້ພາກທຸລະກິດຫລຸດເວລາເຮັດວຽກລົງເພື່ອຊ່ວຍປະຢັດຄ່າໄຟນຳອີກ.
ການເຄື່ອນໄຫວດັ່ງກ່າວມີຂຶ້ນ ຫລັງປາກິດສະຖານຜະເຊີນວິກິດເສດຖະກິດມາເປັນເວລາຫລາຍເດືອນ ເຊິ່ງໝຸນໃຫ້ລາຄາສິນຄ້າຈຳເປັນ ຄືອາຫານ, ແກັສ ແລະ ນ້ຳມັນປັບຂຶ້ນ. ຂະນະທີ່ທຶນສຳຮອງເງິນຕາຕ່າງປະເທດຍັງຫລຸດລົງຕໍ່ເນື່ອງ ສ້າງແຮງກົດດັນໃຫ້ລັດຖະບານຕ້ອງຫາວິທີຫລຸດຕົ້ນທຶນຄ່ານຳເຂົ້າສິນຄ້າ ເພື່ອສະສົມເງິນທຶນໃຫ້ໄຫລວຽນໃນປະເທດ.
ເຖິງຢ່າງໃດກໍຕາມ, ນີ້ບໍ່ແມ່ນຄັ້ງທຳອິດທີ່ລັດຖະບານອອກນະໂຍບາຍໃນລັກສະນະນີ້ ເນື່ອງຈາກໃນເດືອນພຶດສະພາຜ່ານມາ ປາກິດສະຖານໄດ້ສັ່ງຫ້າມການນຳເຂົ້າສິນຄ້າຟຸ່ມເຟືອຍຫລາຍລາຍການ ໂດຍໃຫ້ເຫດຜົນວ່ານະໂຍບາຍດັ່ງກ່າວຈະຊ່ວຍຄວບຄຸມອັດຕາເງິນເຟີ້ທີ່ທະວີຄວາມຮຸນແຮງຂຶ້ນ, ພ້ອມຊ່ວຍຮັກສາສະຖຽນລະພາບຂອງທຶນສຳຮອງເງິນຕາຕ່າງປະເທດ ອີກທັງຍັງຊ່ວຍຫລຸດການອາໄສການນຳເຂົ້າສິນຄ້າຈາກຕ່າງປະເທດນຳອີກ.
ອ້າງອີງ:
- https://edition.cnn.com/2022/06/15/asia/pakistan-tea-economy-intl-hnk/index.html
- https://www.bbc.com/news/world-asia-61805848
