ສສຊ ສະເໜີໃຫ້ລັດຖະບານ ປັບປຸງກົດໝາຍ ເພື່ອແກ້ໄຂບັນຫາການແລກປ່ຽນເງິນຕາ

ບັນດາສະມາຊິກສະພາແຫ່ງຊາດ ໄດ້ສະເໜີຫຼາຍວິທີການໃຫ້ລັດຖະບານເລັ່ງແກ້ໄຂບັນຫາການແລກປ່ຽນເງິນຕາ ທີ່ພວມເປັນບັນຫາເຄັ່ງຮ້ອນໃນສັງຄົມໂດຍສະເພາະປັບປຸງມາດຕາທີ 37 ຂອງກົດໝາຍວ່າດ້ວຍ ທະນາຄານທຸລະກິດ ທັງສະເໜີໃຫ້ເພີ່ມບົດບາດຂອງທະນາຄານທຸລະກິດ ແລະ ສະເໜີໃຫ້ປະສານສົມທົບລະຫວ່າງທະນາຄານກາງກັບສະມາຄົມທະນາຄານ.

ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ IX ໃນວັນທີ 15 ມິຖຸນາ ພາຍໃຕ້ການເປັນປະທານຂອງທ່ານ ໄຊສົມພອນ ພົມວິຫານ ປະທານສະພາແຫ່ງຊາດ, ທ່ານ ມະນີໂສ ຊາມູນຕີ ສສ ຊ ເຂດເລືອກຕັ້ງທີ 17 ແຂວງອັດຕະປືໄດ້ສະເໜີໃຫ້ລັດຖະບານແກ້ໄຂການຄຸ້ມຄອງອັດຕາແລກປ່ຽນ ຊຶ່ງປັດຈຸບັນເໜັງຕີງແຮງ ແລະ ເປັນໜຶ່ງບັນຫາທີ່ເຄັ່ງຮ້ອນໃນສັງຄົມລາວເຮົາ ໂດຍໃຫ້ປັບປຸງບາງມາດຕາຂອງກົດໝາຍພາຍຫລັງເຫັນວ່າ: ປັດຈຸບັນ, ຮ້ານແລກປ່ຽນເງິນຕາມີຫຼາຍເກີນໄປຊຶ່ງອາດເຮັດໃຫ້ການຄຸ້ມຄອງບໍ່ມີປະສິດທິພາບເທົ່າທີ່ຄວນ ແລະ ດ້ານໜຶ່ງຍັງມີຊ່ອງວ່າງດ້ານນະໂຍບາຍໂດຍສະເພາະກົດໝາຍວ່າດ້ວຍທະນາຄານທຸລະກິດທີ່ມາດຕາ 37 ໄດ້ກໍານົດແຈ້ງໃຫ້ທະນາຄານທຸລະກິດສາມາດເປີດຮ້ານອັດຕາແລກປ່ຽນດ້ວຍຕົນເອງ ຫຼື ຊື້-ຂາຍເງິນຕາຕ່າງປະເທດດ້ວຍຕົນເອງ.

ຂະນະດຽວກັນ, ກົດໝາຍຍັງ ໃຫ້ບຸກຄົນ, ນິຕິບຸກຄົນ ລວມທັງຮ້ານອັດຕາແລກປ່ຽນຕ່າງໆໄດ້ຕາມທີ່ທະນາຄານກາງອະນຸມັດ ເພື່ອເປັນຕົວແທນໃຫ້ທະນາຄານທຸລະກິດ ຊຶ່ງເປັນການເປີດກວ້າງທົ່ວໄປ. ເພື່ອແກ້ໄຂບັນຫານີ້, ສະເໜີໃຫ້ລັດຖະບານ ຄວນປັບປຸງມາດຕານີ້ຢູ່ວັກ 2 ໃນກົດໝາຍດັ່ງກ່າວ ໂດຍຈຳກັດອະນຸຍາດໃຫ້ແຕ່ທະນາຄານທຸລະກິດເທົ່ານັ້ນ ເປັນຜູ້ໄດ້ຮັບອະນຸຍາດແລກປ່ຽນ, ຊື້-ຂາຍເງິນຕາຕ່າງປະເທດ ໂດຍທະນາຄານກາງເປັນຜູ້ຄຸ້ມຄອງ ຊຶ່ງຫຼາຍປະເທດໃນໂລກກໍປະຕິບັດແບບນີ້ ໂດຍສະເພາະ ສສ ຫວຽດນາມ ກໍອະນຸຍາດແຕ່ທະ ນາຄານທຸລະກິດເທົ່ານັ້ນ.

ທ່ານ ລິນຄຳ ດວງສະຫວັນ ສສຊ ເຂດເລືອກຕັ້ງທີ 1 ນະຄອນຫຼວງວຽງຈັນ ໄດ້ສະເໜີໃຫ້ລັດຖະບານ ພິຈາລະນາເພີ່ມບົດບາດຂອງທະນາຄານທຸລະກິດໃນການເປີດທຸລະກໍາການແລກປ່ຽນເງິນຕາຜ່ານສາຂາຂອງທະນາຄານໃນທົ່ວປະເທດ ໂດຍກຳນົດອັດຕາແລກປ່ຽນໃຫ້ຕະຫຼາດທີ່ມີການຄຸ້ມຄອງທີ່ເໝາະສົມໄດ້ ເພື່ອກ້າວໄປຫາການຈຳກັດອັດຕາແລກປ່ຽນເງິນຕາຕ່າງປະເທດໃນບັນດາຮ້ານແລກປ່ຽນເງິນຕາ ກໍຄືການຄຸ້ມຄອງອັດຕາແລກປ່ຽນເພື່ອບໍ່ໃຫ້ແຕກໂຕນຈາກອັດຕາແລກປ່ຽນຢູ່ທະນາຄານທຸລະກິດຫຼາຍ.

ທ່ານ ທະນົງສິນ ກັນລະຍາ ສສຊ ເຂດເລືອກຕັ້ງທີ 12 ແຂວງຄໍາມ່ວນ ໄດ້ສະເໜີໃຫ້ປະສານສົມທົບກັນລະຫວ່າງທະນາຄານກາງກັບສະມາຄົມທະນາຄານກຳນົດອັດຕາແລກປ່ຽນທີ່ເໝາະສົມ, ສ່ວນຮ້ານແລກປ່ຽນເງິນຕາທີ່ໄດ້ຮັບອະນຸຍາດຕ້ອງໄດ້ຈົດຄັກແນ່ໃນຖານຂໍ້ມູນຈໍານວນເງິນທີ່ແລກປ່ຽນໃນແຕ່ລະຄົນ, ແຕ່ລະບ່ອນມີເທົ່າໃດ ຈຶ່ງຈະກໍາໄດ້ວ່າມີສະກຸນເງິນໃດທີ່ເຄື່ອນໄຫວແຕ່ລະວັນແລ້ວຈະຊ່ວຍໃຫ້ຄວບຄຸມໄດ້