ສີລັງກາໄຟຂຽວລັດຖະກອນ “ພັກວຽກວັນສຸກ” ໃຫ້ໄປເຮັດກະສິກຳ ເພື່ອເພີ່ມການຜະລິດໃນປະເທດ
ວັນທີ 14 ມິຖຸນາ 2022, ສື່ທ້ອງຖິ່ນລາຍງານວ່າ: ຄະນະລັດຖະບານຂອງສີລັງກາປະກາດອະນຸມັດຂໍ້ສະເໜີໃຫ້ວັນສຸກເປັນມື້ພັກສຳລັບລັດຖະກອນ ໂດຍມີເປົ້າໝາຍສະໜັບສະໜູນໃຫ້ພວກເຂົາເຮັດກະສິກຳ ເພື່ອເພີ່ມການຜະລິດໃນປະເທດ.
ຂໍ້ສະເໜີຂອງຄະນະລັດຖະບານລະບຸວ່າ: ບັນດາລັດຖະມົນຕີເຫັນພ້ອມຂໍ້ສະເໜີສຳຄັນ 2 ປະການທີ່ຈະນຳໄປໃຊ້ໃນລະບົບວຽກລັດຖະກອນ ອັນປະກອບມີ ການເຮັດວຽກ 4 ວັນຕໍ່ອາທິດ ແລະ ການລາພັກໂດຍບໍ່ໄດ້ຮັບຄ່າແຮງງານເປັນເວລາ 5 ປີສຳລັບຜູ້ທີ່ຍິນດີຍົກຍ້າຍໄປຫາວຽກເຮັດຢູ່ຕ່າງປະເທດ.
“ເຮົາຈະສະໜັບສະໜູນໃຫ້ລັດຖະກອນເຮັດກະສິກຳ ເພື່ອເພີ່ມການຜະລິດໃນປະເທດລະຫວ່າງມື້ພັກ 3 ວັນ” ເອກະສານຂອງຄະນະລັດຖະບານລະບຸ.
ທ່ານ ຣານິລ ວິກຳສິງເຫ ນາຍົກລັດຖະມົນຕີສີລັງກາ ກ່າວເມື່ອບໍ່ດົນນີ້ວ່າ: ສີລັງກາກຳລັງພະຍາຍາມແກ້ໄຂບັນຫາຂາດເຂີນອາຫານທີ່ກຳລັງຈະເກີດຂຶ້ນໃນບໍ່ຊ້າ. ຂະນະທີ່ບັນດາຜູ້ຊ່ຽວຊານທ້ອງຖິ່ນຕ່າງອອກມາເຕືອນເຖິງຄວາມເປັນໄປໄດ້ທີ່ຈະຜະເຊີນບັນຫາຂາດເຂີນເຂົ້າ ແລະ ອາຫານສຳຄັນອື່ນໆ ນັບແຕ່ເດືອນກັນຍາຂອງປີນີ້ ເນື່ອງຈາກການຜະລິດຫລຸດລົງ.
ອ້າງອີງ:
https://www.xinhuathai.com/inter/288751_20220615
