ການຈັດຕັ້ງປະຕິບັດໂຄງການປັບປຸງ ການຄຸ້ມຄອງການເງິນແຫ່ງລັດ ໄລຍະທີ 2 ມີຄວາມເຂັ້ມແຂງ, ໂປ່ງໃສ, ຍຸຕິທໍາ ແລະ ສາມາດກວດສອບໄດ້

ວັນທີ 13 ມິຖຸນາ 2022 ທີ່ຫ້ອງປະຊຸມໂຮງແຮມລາວພຣາຊາ ນະຄອນຫຼວງວຽງຈັນ, ໄດ້ຈັດກອງປະຊຸມສະຫຼຸບລາຍງານການຈັດຕັ້ງປະຕິບັດໂຄງການປັບປຸງການຄຸ້ມຄອງການເງິນແຫ່ງລັດ (PFMRP) ໄລຍະ 2, ໂດຍການເປັນປະທານຮ່ວມຂອງທ່ານ ປອ ບຸນເຫຼືອ ສິນໄຊວໍຣະວົງ ຮອງລັດຖະມົນຕີກະຊວງການເງິນ ແລະ ທ່ານ ນາງ ວຽງສະໄໝ ສຣິດທິຣາດ ເຈົ້າໜ້າທີ່ອາວຸໂສ, ຮັກສາການຫົວໜ້າຫ້ອງການທະນາຄານໂລກ ປະຈຳ ສປປ ລາວ, ມີທ່ານ ເອກອັກຄະລັດຖະທູດແຫ່ງສະຫະພາບເອີຣົບປະຈຳ ສປປ ລາວ, ມີຕາງໜ້າຈາກບັນດາກົມອ້ອມຂ້າງກະຊວງການເງິນ, ກະຊວງພາຍໃນ, ຕາງໜ້າສະຫະພາບເອີຣົບ, ທີມງານຂອງທະນາຄານໂລກເຂົ້າຮ່ວມ.

ໂອກາດດັ່ງກ່າວ, ທ່ານ ປອ ບຸນເຫຼືອ ສິນໄຊວໍຣະວົງ ຮອງລັດຖະມົນຕີກະຊວງການເງິນ ໃຫ້ຮູ້ວ່າ: ການຈັດຕັ້ງປະຕິບັດໂຄງການປັບປຸງການຄຸ້ມຄອງການເງິນແຫ່ງລັດ (PFM Reforrr Project) ທີ່ໄດ້ຮັບການຊ່ວຍເຫຼືອລ້າຈາກສະຫະພາບເອີຣົບຜ່ານທະນາຄານໂລກ ແມ່ນໂຄງການທີ່ນອນຢູ່ໃນແຜນງານຂອງທະນາຄານໂລກ (ແຜນງານສະໜັບສະໜູນການປັບປຸງການຄຸ້ມຄອງການເງິນແຫ່ງລັດ) ຊຶ່ງໄດ້ຮັບທຶນຊ່ວຍເຫຼືອລ້າຈາກສະຫະພາບເອີຣົບຜ່ານທະນາຄານໂລກ ຈຳນວນທັງໝົດ 5 ລ້ານເອີໂຣ.

ໃນນັ້ນ, ກະຊວງການເງິນຄຸ້ມຄອງ 1,5 ລ້ານເອີໂຣເພື່ອນໍາໃຊ້ເຂົ້າໃນວຽກງານການປັບປຸງການເກັບລາຍຮັບພາຍໃນ, ການປັບປຸງການສ້າງແຜນງົບປະມານ ແລະ ການປະຕິບັດງົບປະມານ ແລະ ວຽກງານການສ້າງຄວາມເຂັ້ມແຂງໃຫ້ວຽກງານຈັດຊື້-ຈັດຈ້າງ ດ້ວຍທຶນຂອງລັດ, ໂດຍມີໄລຍະການຈັດຕັ້ງປະຕິບັດໂຄງການແຕ່ປີ 2019 ເຖິງເດືອນມີນາ 2022.

ສະນັ້ນ, ການຈັດຕັ້ງປະຕິບັດໂຄງການດັ່ງກ່າວແມ່ນເພື່ອພັນຂະຫຍາຍແຜນປະຕິຮູບຂະແໜງການເງິນບາດກ້າວທີ 1 ກໍຄືຜັນຂະຫຍາຍວິໄສທັດຮອດປີ 2030 ແລະ ຍຸດທະສາດພັດທະນາການເງິນແຫ່ງລັດຮອດປີ 2025 ໃຫ້ບັນລຸບັນດາເປົ້າໝາຍ ແລະ ປະກົດຜົນເປັນຈິງໃນແຕ່ລະໄລຍະ, ພ້ອມທັງຮັບປະກັນປະສິດຕິພາບ ແລະ ປະສິດຕິຜົນການຄຸ້ມຄອງການເງິນແຫ່ງລັດໃຫ້ມີຄວາມເຂັ້ມແຂງ, ໂປ່ງໃສ, ຍຸຕິທໍາ ແລະ ສາມາດກວດສອບໄດ້.

ກອງປະຊຸມໃນຄັ້ງນີ້, ເພື່ອຮັບຟັງການສະຫຼຸບລາຍງານການຈັດຕັ້ງປະຕິບັດບັນດາກິດຈະກຳຕາມແຜນວຽກ ແລະ ແຜນງົບປະມານຂອງໂຄງການໃນໄລຍະຜ່ານມາຈົນຮອດປັດຈຸບັນ, ຊຶ່ງຈະເຫັນໄດ້ຜົນສຳເລັດຫຼາຍໆດ້ານໃນການຈັດຕັ້ງປະຕິບັດບັນດາກິດຈະກຳທີ່ຕິດພັນກັບວຽກງານຂອງແຕ່ລະກົມກ່ຽວຂ້ອງ.

ພ້ອມດຽວກັນນີ້, ຍັງໄດ້ຮັບຟັງການນໍາສະເໜີຂອງທະນາຄານໂລກກ່ຽວກັບການກະກຽມແຜນວຽກຊ່ວຍເຫຼືອລ້າຈາກສະຫະພາບເອີຣົບ ແລະ ກະຊວງການຕ່າງປະເທດ ແລະ ການຄ້າຂອງປະເທດອົສຕາລີ ໂດຍຜ່ານການຄຸ້ມຄອງຂອງທະນາຄານໂລກພາຍໃຕ້ແຜນງານການປັບປຸງການຄຸ້ມຄອງການເງິນແຫ່ງລັດໄລຍະ 3.

ນອກຈາກນັ້ນ, ຍັງໄດ້ພ້ອມກັນປຶກສາຫາລື, ປະກອບຄຳຄິດຄຳເຫັນຕໍ່ຜົນການສະຫຼຸບລາຍງານການຈັດຕັ້ງປະຕິບັດໂຄງການດັ່ງກ່າວ, ເພື່ອເປັນການສະຫຼຸບຖອດຖອນບົດຮຽນໃຫ້ແກ່ການຈັດຕັ້ງປະຕິບັດໃນການສືບຕໍ່ໂຄງການຊ່ວຍເຫຼືອລ້າໄລຍະທີ 3 ທີ່ຈະໄດ້ຮັບທຶນຊ່ວຍເຫຼືອລ້າ ແລະ ຈະໄດ້ຮັບການຈັດຕັ້ງປະຕິບັດໃນໄວໆ.

ທັງນີ້, ກໍ່ເພື່ອເປັນການຈັດຕັ້ງປະຕິບັດວຽກງານຂອງກະຊວງການເງິນໃຫ້ປະສົບຜົນສຳເລັດສູງຕາມເປົ້າໝາຍທີ່ກໍານົດໄວ້ໃນວິໃສທັດຮອດປີ 2030 ແລະ ຍຸດທະສາດພັດທະນາການເງິນແຫ່ງລັດຮອດປີ 2025.