ລັດຖະບານກຽມຈຳໜ່າຍພັນທະບັດມູນຄ່າ 5.000 ຕື້ກີບ

ວັນຈັນທີ 13 ມິຖຸນາ 2022 ນີ້ ທ່ານ ເພັດສະຖາພອນ ແກ້ວວົງວິຈິດ ຫົວຫນ້າຫ້ອງການທະນາຄານແຫ່ງ ສປປ ລາວ ໄດ້ແຈ້ງໃຫ້ຮູ້ ວ່າ: ຫ້ອງການທະນາຄານແຫ່ງ ສປປ ລາວ ຂໍຖືເປັນກຽດແຈ້ງມາຍັງບັນດາທ່ານພໍ່ແມ່ປະຊາຊົນ, ພໍ່ຄ້າຊາວຂາຍ, ພະນັກງານ, ທະຫານ ແລະ ຕໍາຫຼວດ ໃນຂອບເຂດທົ່ວປະເທດ ຊາບວ່າ ນັບແຕ່ວັນທີ 15 ມິຖນາ 2022 ເປັນຕົ້ນໄປ ທະນາຄານແຫ່ງ ສປປ ລາວ ຈະໄດ້ເປີດຈໍາໜ່າຍພັນທະບັດທະນາຄານແຫ່ງ ສປປ ລາວ ສະກຸນເງິນກີບ ງວດທີ I ໃນວົງເງິນຈໍາໜ່າຍທັງຫມົດ 5.000.000.000.000 ກີບ (ຫ້າພັນຕື້ກີບ).

ຈຸດປະສົງ ໃນການອອກພັນທະບັດ ທຫລ ສະກຸນເງິນກີບ ໃນຄັ້ງນີ້ແມ່ນເພື່ອໃຫ້ທຸກຊັ້ນຄົນໃນສັງຄົມໄດ້ມີໂອກາດລົງທຶນໃນ ປະເພດຫລັກຊັບທີ່ມີຄວາມໝັ້ນຄົງ ແລະ ປອດໄພທີ່ສຸດ ແລະ ໃຫ້ຜົນຕອບແທນທີ່ດີ, ພ້ອມທັງເປັນການຈັດຕັ້ງ ປະຕິບັດນະໂຍບາຍເງິນຕາ, ປະກອບສ່ວນໃນການຮັກສາສະຖຽນລະພາບເງິນຕາແຫ່ງຊາດ ເພື່ອໃຫ້ບັນລຸໄດ້ຄາດຫມ າຍຂອງແຜນພັດທະນາເສດຖະກິດ-ສັງຄົມ ແຫ່ງຊາດ ກໍຄືວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງ ດ້ານເສດຖະກິດ-ການເງິນ ເງິນຕາຂອງປະເທດເຮົາ.
– ການຈໍາໜ່າຍພັນທະບັດ ທຫລ ໃນຄັ້ງນີ້ ໄດ້ດໍາເນີນຜ່ານທະນາຄານທຸລະກິດ 9 ແຫ່ງ ທີ່ເປັນທະນາຄານ ຕົວແທນຈໍາໜ່າຍ ດັ່ງລາຍຊື່ລຸ່ມນີ້:
1) ທະນາຄານ ການຄ້າຕ່າງປະເທດ ລາວ ມະຫາຊົນ;
2) ທະນາຄານ ພັດທະນາລາວ;
3) ທະນາຄານ ສົ່ງເສີມກະສິກໍາ;
4) ທະນາຄານ ຮ່ວມພັດທະນາ;
5) ທະນາຄານ ພົງສະຫວັນ;
6) ທະນາຄານ ເອສທີ;
7) ທະນາຄານ BIC;
8) ທະນາຄານ ຮ່ວມທຸລະກິດ ລາວ-ຫວຽດ;
9) ທະນາຄານອຸດສາຫະກໍາ ແລະ ການຄ້າຈີນ (ICBC).
ພັນທະບັດ ທະນາຄານແຫ່ງ ສປປ ລາວ ທີ່ອອກຈໍາໜ່າຍມີຄຸນລັກສະນະຕົ້ນຕໍ ດັ່ງນີ້:
– ຮູບແບບເອເລັກໂຕຣນິກ (ບໍ່ເປັນພັນທະບັດໃບເຈ້ຍ, Script less) ທີ່ມີການເກັບຮັກສາໄວ້ນໍາ ສູນຮັບຝາກຫຼັກ
ຊັບຂອງ ຕະຫຼາດຫຼັກຊັບລາວ, ຜູ້ຊື້ພັນທະບັດ ຈະໄດ້ຮັບໃບຢັ້ງຢືນການຖືຄອງພັນທະບັດ ຫຼື ເອີ້ນວ່າ (BOL Bill Certificate) ຈາກທະນາຄານທຸລະກິດທີ່ເປັນຕົວແທນຈໍາໜ່າຍ (ແບບຕົວຢ່າງໄດ້ຄັດຕິດມາພ້ອມນີ້);
– ພັນທະບັດ ທຫລ ແມ່ນ ມີອາຍຸຄົບກໍານົດ 6 ເດືອນ, ບໍ່ສາມາດປ່ຽນມືໄດ້;
– ອັດຕາດອກເບ້ຍ 20% ຕໍ່ປີ, ຊໍາລະດອກເບ້ຍ ແລະ ຕົ້ນທຶນຄັ້ງດຽວ ເມື່ອຄົບກໍານົດອາຍຸໄຖຖອນ;
– ມູນຄ່າຈໍາໜ່າຍພັນທະບັດຕ່ໍາສຸດ ແມ່ນ 100.000 ກີບ (ຫນຶ່ງແສນກີບ), ບຸກຄົນສາມາດຊື້ໄດ້ສູງສຸດບໍ່ເກີນ 2.000.000.000 ກີບ (ສອງຕື້ກີບ);
– ນິຕິບຸກຄົນສາມາດຊື້ໄດ້ສູງສຸດບໍ່ເກີນ 10.000.000.000 ກີບ (ສິບຕື້ ກີບ);
– ຜູ້ມີເງື່ອນໄຂຊື້ພັນທະບັດ ແມ່ນບຸກຄົນ, ນິຕິບຸກຄົນ ທັງພາຍໃນ ແລະ ຕ່າງປະເທດ ທີ່ມີພູມລໍາເນົາຢູ່ ສປປ ລາວ ນັບແຕ່ 1 ປີຂຶ້ນໄປ;
– ບໍ່ອະນຸຍາດໃຫ້ ທະນາຄານທຸລະກິດ ແລະ ສະຖາບັນການເງິນທີ່ຮັບເງິນຝາກ ທີ່ເຄື່ອນ ໄຫວທຸລະກິດຢູ່ ສປປ ລາວ ຊື້ພັນທະບັດດັ່ງກ່າວ;
– ໄລຍະເວລາຈໍາໜ່າຍພັນທະບັດ ທຫລ: ນັບແຕ່ວັນທີ 15 ມິຖຸນາ 2022 ເປັນຕົ້ນໄປ, ຕາມເວລາໃຫ້ບໍລິການ ຂອງທະນາຄານທຸລະກິດ ທີ່ເປັນຕົວແທນຈໍາໜ່າຍຢູ່ທຸກສາຂາ ແລະ ໜ່ວຍບໍລິການ ຂອງທະນາຄານຕົວແທນ ໃນຂອບເຂດທົ່ວປະເທດ.
ຂໍເຊີນຊວນບັນດາທ່ານຜູ້ທີ່ມີຄວາມສົນໃຈ ເຂົ້າມາພົວພັນນໍາທະນາຄານທຸລະກິດທີ່ເປັນຕົວແທນຈໍາໜ່າຍ ຕາມວັນເວລາດັ່ງກ່າວດ້ວຍ.