ເພີ່ມທະວີ ການບໍລິຫານຈັດການນ້ຳຂອງເຂື່ອນ ເພື່ອຫລຸດຜ່ອນຜົນກະທົບຮ້າຍແຮງຈາກໄພນ້ຳຖ້ວມ

ວັນທີ 10 ມິຖຸນາ 2022 ຜ່ານມາ ກົມອຸຕຸນິຍົມ ແລະ ອຸທົກກະສາດ, ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ຮ່ວມກັບກະຊວງພະລັງງານ ແລະ ບໍ່ແຮ່ ຫາລື ກ່ຽວກັບການບໍລິຫານຈັດການນໍ້າໃນເຂື່ອນ, ລວມທັງການວາງແຜນການຮ່ວມກັນ ເພື່ອຄຸ້ມຄອງ ແລະ ຫລຸດຜ່ອນຜົນກະທົບຈາກໄພນ້ຳຖ້ວມ ທີ່ອາດຈະເກີດຂຶ້ນໃນໄລຍະລະດູຝົນ ປີ 2022. ໂດຍເປັນປະທານຂອງ ທ່ານ ຈັນທະເນດ ບົວລະພາ ຮອງລັດຖະມົນຕີ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ແລະ ທ່ານ ສີນາວາ ສຸພານຸວົງ ຮອງລັດຖະ ມົນຕີ ກະຊວງພະລັງງານ ແລະ ບໍ່ແຮ່, ມີບັນດາຜູ້ຕາງໜ້າຈາກ ລັດວິສາຫະກິດໄຟຟ້າລາວ-ມະຫາຊົນ ແລະ ບັນດາເຂື່ອນໄຟຟ້າໃນຂອບເຂດທົ່ວປະເທດເຂົ້າຮ່ວມ.

ກອງປະຊຸມໄດ້ຮັບຟັງການລາຍງານຄວາມຄືບໜ້າ ການຈັດຕັ້ງປະຕິບັດວຽກງານດັ່ງກ່າວ ໂດຍອີງໃສ່ບົດບັນທຶກຮ່ວມກອງປະຊຸມ ຄັ້ງຜ່ານມາ ລະຫວ່າງສອງກະຊວງ, ລວມທັງບັນດາກະຊວງຂະແໜງການທີ່ກ່ຽວຂ້ອງ ແລະ ບັນດາເຂື່ອນໃນຂອບເຂດທົ່ວປະເທດ; ພ້ອມທັງສະເໜີແຜນດໍາເນີນງານຮ່ວມກັນ ກ່ຽວກັບວຽກງານບໍລິຫານຈັດການນໍ້າຂອງບັນດາເຂື່ອນ, ການຄຸ້ມຄອງ ແລະ ຫລຸດຜ່ອນໄພນໍ້າຖ້ວມ ທີ່ອາດຈະເກີດຂຶ້ນໃນປີ 2022; ປຶກສາຫາລືກັນເພື່ອເພີ່ມທະວີກົນໄກການປະສານງານ ແລະ ແລກປ່ຽນຂໍ້ມູນ ລະຫວ່າງ ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ, ກະຊວງພະລັງງານ ແລະ ບໍ່ແຮ່, ກະຊວງແຮງງານ ແລະ ສະຫວັດດີການສັງຄົມ, ບັນດາເຂື່ອນໄຟຟ້າ ແລະ ຂະແໜງການກ່ຽວຂ້ອງ ໂດຍເຊື່ອມສານວຽກງານດັ່ງກ່າວໃນແຜນຄຸ້ມຄອງອ່າງຮັບນໍ້າ ຫລື ບັນດານິຕິກຳອື່ນໆດ້ານຊັບພະຍາກອນນໍ້າ ທີ່ກ່ຽວຂ້ອງ.

ນອກຈາກນີ້, ຜູ້ເຂົ້າຮ່ວມ ຍັງໄດ້ຮັບຟັງການລາຍງານສະພາບອຸຕຸນິຍົມ ແລະ ອຸທົກກະສາດ ແລະ ການແຈ້ງເຕືອນໄພລ່ວງໜ້າ ໃນບັນດາອ່າງຮັບນໍ້າຕ່າງໆທົ່ວປະເທດ ໃນປີ 2022, ຮັບຟັງບົດສະເໜີ ກ່ຽວກັບແຜນຮັບມືກັບໄພພິບັດ ປີ 2022 ແລະ ຮັບຟັງການລາຍງານການບໍລິຫານຈັດການນ້ຳ ແລະ ລິເລີ່ມການສ້າງສູນບັນຊານ້ຳ ທັງນີ້ກໍເພື່ອເປັນການແລກປ່ຽນບົດຮຽນຕົວຈິງ ແລະ ຂໍ້ມູນຂ່າວສານ ເພື່ອເຮັດໃຫ້ວຽກງານດັ່ງກ່າວມີປະສິດທິຜົນ ແລະ ປະສານກົມກຽວກັນຫລາຍຂຶ້ນ ແນໃສ່ສ້າງຈິດສຳນຶກໃຫ້ສັງຄົມຮັບຊາບ ກ່ຽວກັບສະພາບການບໍລິຫານຈັດການນໍ້າ, ການຄຸ້ມຄອງ ແລະ ກະກຽມຮັບມືກັບສະພາບນໍ້າຖ້ວມ ທີ່ອາດຈະເກີດຂຶ້ນ.

ໂອກາດກັນນີ້, ທ່ານ ຈັນທະເນດ ບົວລະພາ ໄດ້ສະແດງຄວາມຊົມເຊີຍຕໍ່ຂະແໜງການຕ່າງໆ ທີ່ມີຄວາມກຽມພ້ອມ ແລະ ເປັນເຈົ້າການໃນການຮັບມືກັບໄພທຳມະຊາດ ທີ່ອາດຈະເກີດຂຶ້ນ. ພ້ອມທັງເນັ້ນໜັກໃຫ້ເອົາໃຈໃສ່ຕໍ່ກັບວຽກງານເຝົ້າລະວັງ, ຕິດຕາມ ແລະ ແຈ້ງເຕືອນໄພນໍ້າຖ້ວມທີ່ອາດຈະເກີດຂຶ້ນ ໃຫ້ສັງຄົມຮັບຮູ້ຢ່າງວ່ອງໄວ, ທົ່ວເຖິງ ແລະ ທັນກັບສະ ພາບການ ເພື່ອຫລຸດຜ່ອນຜົນກະທົບທາງລົບ ທີ່ອາດຈະເກີດຂຶ້ນຕໍ່ກັບຊີວິດການເປັນຢູ່ ແລະ ຊັບສິນຂອງປະຊາຊົນ ກໍຄືຂອງປະເທດຊາດ.