ຄະນະຜູ້ແທນກອງບັນຊາການ ຕຳຫຼວດ ແລະ ກອງບັນຊາການ ທະຫານຊາຍແດນ ແຂວງກວາງຈິ ສສ ຫວຽດນາມພົບປະແລກປ່ຽນສະພາບກັບກອງບັນຊາການ ປກສ ແຂວງສະຫວັນນະເຂດ

ໃນວັນທີ 7 ມີຖຸນາ 2022 ນີ້ ຢູ່ທີ່ໂຮງແຮມດາວຮຸ່ງ ຄະນະຜູ້ແທນກອງບັນຊາການ ຕຳຫຼວດ ແລະ ກອງບັນຊາການທະຫານຊາຍແດນ ແຂວງກວາງຈິ ສາທາລະນະລັດ ສັງຄົມນິຍົມຫວຽດນາມ,ນຳໂດຍທ່ານ ພັອ ຫງວຽນ ວັນແທງ ຫົວໜ້າກອງບັນຊາການ ຕຳຫຼວດ ແລະ ທ່ານ ພັອ ເລວັນ ເຟຶອງ ຫົວໜ້າກອງບັນຊາການທະຫານຊາຍແດນແຂວງກວາງຈິ ພ້ອມຄະນະທັງສອງກອງບັນຊາການ, ໄດ້ເຂົ້າຮ່ວມກອງປະຊຸມແລກປ່ຽນສະພາບ ຢູ່ ແຂວງ ສະຫວັນນະເຂດ ສາທາລະນະລັດ ປະຊາທິປະໄຕ ປະຊາຊົນລາວ, ໂດຍການໃຫ້ກຽດຕ້ອນຮັບຢ່າງອົບອຸ່ນ ຂອງ ທ່ານ ພັອ ສົມໝາຍ ພົມມະຈັນ ຫົວກອງບັນຊາການ ປກສ ແຂວງ ສະຫວັນນະເຂດ ພ້ອມຄະນະ, ໂດຍປະຕິບັດຕາມແຜນການ ຜັນຂະຫຍາຍສັນຍາຮ່ວມມືລະຫວ່າງກອງບັນຊາການ ປກສ ແຂວງສະຫວັນະເຂດ ສ ປປ ລາວ ກັບ ກອງບັນຊາການຕຳຫຼວດ ແລະ ກອງບັນຊາການທະຫານຊາຍແດນແຂວງກວາງຈິ ສສ ຫວຽດນາມ ແລະ ເພື່ອເປັນການຮັດແໜ້ນຄວາມສາມັກຄີ ຮັກແພງ, ຄວາມເຂົ້າອົກ-ເຂົ້າໃຈ ເປັນເອກະພາບລະຫວ່າງສາມກອງບັນຊາການ ກໍ່ຄືສອງປະເທດລາວ-ຫວຽດນາມ, ຫວຽດນາມ-ລາວ.

ໃນວາລະກອງປະຊຸມ ຜູ້ແທນທັງສອງຝ່າຍໄດ້ຜັດປ່ຽນກັນຂຶ້ນລາຍງານສະພາບການຕ່າງໆ ຂອງແຂວງ ໂດຍ ສະເພາະ, ແມ່ນສະພາບການເມືອງ, ສະພາບເສດຖະກິດ, ບັນຫາຢາເສບຕິດ ,ຄ້າຂາຍເຖື່ອນອື່ນໆ ແລະ ບັນຫາຊາຍແດນທີ່ໄດ້ສົ່ງຜົນກະທົບຕໍ່ສອງປະເທດ ເວົ້າລວມ,ເວົ້າສະເພາະສອງແຂວງ ຄື: ແຂວງສະຫວັນະເຂດ-ແຂວງກວາງຈິ ເປັນຕົ້ນແມ່ນກົນອຸບາຍການເຄື່ອນໄຫວຂອງບັນດາເປົ້າໝາຍ ນັກສືບຊອດແນມ ແລະ ຜູ້ກໍ່ການຮ້າຍ ເພື່ອພ້ອມກັນຄົ້ນ ຄວ້າຕີລາຄາ ຫາວິທີແກ້ໄຂບັນຫາກົນອຸບາຍ ແລະ ຮູບການເຄື່ອນໄຫວຂອງບັນດາອິດທິກຳລັງປໍລະປັກທີ່ມີຕໍ່ລາວ ແລະ ຫວຽດນາມ, ເພີ່ມທະວີການແລກປ່ຽນບົດຮຽນ,ປະສານສົມທົບແລກປ່ຽນຂໍ້ມູນຂ່າວສານ, ຜັນຂະຫຍາຍການຮ່ວມມື ສະກັດກັ້ນ ແລະຕ້ານຢາເສບຕິດ, ເພີ່ມທະວີສືກສາອົບຮົມ ການຄຸ້ມຄອງພົນລະເມືອງຢູ່ລຽບຕາມຊາຍແດນໃຫ້ຕື່ນຕົວ ເຄົາລົບກົດໝາຍ ແລະ ຮີດຄອງປະເພນີຂອງແຕ່ລະປະເທດ, ປະຕິບັດການເຂົ້າ-ອອກເມືອງໃຫ້ຖືກຕ້ອງຕາມກົດໝາຍ ຢ່າງເຂັ້ມງວດ ເພື່ອແນ່ໃສ່ຮັບປະກັນຄວາມສະຫງົບ, ຄວາມເປັນລະບຽບຮຽບຮ້ອຍຕາມຊາຍແດນ, ເຮັດໃຫ້ແຂວງສະຫວັນະເຂດ-ແຂວງກວາງຈິ ເປັນຊາຍແດນແຫ່ງສັນຕິພາບ-ມິດຕະພາບ ແລະ ພ້ອມກັນຮັກສາຄວາມສະຫງົບໃຫ້ກ່າວຂຶ້ນ.

ພ້ອມກັນນີ້ຄະນະຜູ້ແທນທັງສອງຝ່າຍກໍ່ໄດ້ຮ່ວມກັນເຊັນບົດບັນທຶກຊ່ວຍຈຳປະຈຳປີ 2022-2023 ເພື່ອສ້າງສາຍພົວພັນອັນເລິກເຊິ່ງລະຫວ່າງສອງຊາດລາວ-ຫວຽດນາມ ເວົ້າສະເພາະກອງບັນຊາການ ປກສ ແຂວງສະຫວັນະເຂດ ກັບ ກອງບັນຊາການຕຳຫຼວດ ແລະ ກອງບັນຊາການ ທະຫານຊາຍແດນແຂວງກວາງຈິ ໃຫ້ນັບມື້ເພີ່ມທະວີຄວາມສາມັກຄີ ແລະ ໝັ້ນຄົງທະນົງແກນຂຶ້ນໄປເລື້ອຍໆ.