ຈັບກຸ່ມສໍ້ໂກງດຳເນີນຄະດີ ແລະ ສົ່ງຊັບສິນຄືນເຈົ້າຂອງເດີມ

ພັທ ຄໍາພອນ ພົມມະຈັນ ຫົວໜ້າພະແນກຕໍາຫຼວດປ້ອງກັນເສດຖະກິດ ພ້ອມດ້ວຍຄະນະ ໄດ້ມອບເຄື່ອງຂອງກາງຄໍາຮູບປະພັນ ຈໍານວນ 25 ບາດ ທີ່ເກັບກູ້ມາໄດ້ຈາກຄະດີສໍ້ໂກງຊັບ (ຄໍາຮູບປະພັນ ຢູ່ຕະຫຼາດເຊົ້າມໍ) ຄືນຜູ້ຖືກເສຍຫາຍ ເມື່ອວັນທີ 7 ມິຖຸນາ 2022 ຜ່ານມາ.

ໃນວັນເກີດເຫດ, ພາຍຫຼັງເຈົ້າໜ້າທີ່ ໄດ້ຮັບຂໍ້ມູນເມື່ອເວລາ 14:50 ໂມງ ຂອງວັນທີ 18 ພຶດສະພາ 2022 ວ່າ: ມີກຸ່ມຄົນຈໍານວນໜຶ່ງຕົວະຍົວະຫຼອກ ລວງສໍ້ໂກງເອົາຄໍາ 25 ບາດ ຢູ່ຮ້ານຂາຍວັດຖຸມີຄ່າຢູ່ຕະລາດເຊົ້າມໍ. ເຈົ້າໜ້າທີ່ ຈຶ່ງຮີບຮ້ອນປະສານສົມທົບ ເພື່ອດໍາເນີນການສືບສວນສອບສວນມີຂໍ້ມູນຫຼັກຖານຊີ້ໃຫ້ເຫັນຜູ້ກະທຳຜິດ ຈຶ່ງຈັບຕົວຊື່ນາງ ອຸໄລພອນ ອາຍຸ 31 ປີ, ຢູ່ບ້ານຮ່ອງຄ້າ ເມືອງຈັນທະບູລີນະຄອນຫຼວງວຽງຈັນ ຢູ່ສະຖານທີ່ຮ້ານຄໍາ ພ້ອມທັງສອບສວນຂະຫຍາຍຜົນ. ຮອດເວລາ 23:40 ໂມງ ຂອງວັນດຽວກັນ, ສາມາດຈັບທ້າວອຸ້ຍ ອາຍຸ 35 ປີ ປະຊາຊົນ ຢູ່ບ້ານໜອງບົວທອງໃຕ້ ເມືອງສີໂຄດຕະບອງ ມາດຳເນີນຄະດີ.

ຈາກນັ້ນ, ເຈົ້າໜ້າທີ່ໄດ້ສອບສວນຊອກຫາຜູ້ຮ່ວມຂະ ບວນການອີກ. ຮອດວັນທີ 7 ມິຖຸນາ 2022, ຈຶ່ງໄດ້ເຂົ້າຈັບຜູ້ຮ່ວມຂະບວນ ການອີກ 2 ຄົນຊື່: ທ້າວ ຕານ້ອຍ ອາຍຸ 25 ປີ, ຢູ່ບ້ານໜອງບົວທອງເໜືອ ແລະ ນາງ ແສງທະວີ ອາຍຸ 35 ປີ, ຢູ່ບ້ານໜອງບົວທອງເໜືອ ເມືອງສີໂຄດຕະບອງ ນວ ພ້ອມທັງເກັບກູ້ຄືນມາໄດ້ ພາຍຫຼັງສຳເລັດການດຳເນີນຄະດີ ຈຶ່ງໄດ້ມອບຄຳ 25 ບາດທີ່ເກັບກູ້ມາໄດ້ສົ່ງມອບຄືນເຈົ້າຂອງ.
ປັດຈຸບັນ, ຕໍ່ກັບພວກກ່ຽວທັງ 4 ຄົນ ເຈົ້າໜ້າທີ່ຈະໄດ້ດໍາເນີນຄະດີຕາມຂັ້ນຕອນຂອງກົດໝາຍ.