ຜູ້ນຳສີລັງກາ ຮຽກຮ້ອງໃຫ້ປະຊາຊົນ ປະຢັດພະລັງງານ ຮັບມືວິກິດເສດຖະກິດ

ວັນທີ 7 ມິຖຸນາ 2022, ທ່ານ ຣານິລ ວິກຣາມາສິງຫະ ນາຍົກລັດຖະມົນຕີສີລັງກາ ເປີດເຜີຍວ່າ: ສີລັງກາຈະຜະເຊີນໄລຍະຍາກລຳບາກຕະຫລອດ 3 ອາທິດຕໍ່ໜ້າ ເນື່ອງຈາກວິກິດເສດຖະກິດອັນສາຫັດ, ພ້ອມກະຕຸ້ນເຕືອນປະຊາຊົນໃຊ້ເຊື້ອໄຟ ແລະ ແກັສຢ່າງປະຢັດ.

ທ່ານ ວິກຣາມາສິງຫະ ກ່າວວ່າ: ພັນທະກິດຫລັກຂອງລັດຖະບານຄືສະຖຽນລະພາບທາງເສດຖະກິດ ເຊິ່ງຈະເກີດຂຶ້ນໄດ້ດ້ວຍການດຳເນີນໂຄງການທີ່ຜ່ານການຕຶກຕອງຢ່າງລະອຽດ ແລະ ເຮັດວຽກຢ່າງໜັກ. ຂະນະທີ່ປັດຈຸບັນ ສີລັງກາໃຊ້ຈ່າຍເງິນດ້ານເຊື້ອໄຟ 500 ລ້ານໂດລາສະຫະລັດຕໍ່ເດືອນ ແລະ ຕ້ອງການເງິນເພື່ອນຳເຂົ້າແກັສ 40 ລ້ານໂດລາສະຫະລັດຕໍ່ເດືອນ.

ນາຍົກລັດຖະມົນຕີສີລັງກາ ຮຽກຮ້ອງປະຊາຊົນຈຳກັດການເດີນທາງທີ່ບໍ່ຈຳເປັນໃຫ້ໄດ້ຫລາຍທີ່ສຸດ, ຫລີກລ່ຽງການກັກຕຸນເຊື້ອໄຟ ແລະ ແກັສໃນໄລຍະ 3 ອາທິດຕໍ່ໜ້າ ຫລັງຈາກນັ້ນລັດຖະບານຈະພະຍາຍາມຈັດຫາເຊື້ອໄຟ ແລະ ອາຫານຢ່າງລາບລື່ນ ໂດຍຕອນນີ້ມີການເຈລະຈາກັບຫລາຍພາກສ່ວນເພື່ອດຳເນີນງານຕາມເປົ້າໝາຍດັ່ງກ່າວ.

ທ່ານ ວິກຣາມາສິງຫະ ກ່າວອີກວ່າ: ສີລັງກາຍັງຕ້ອງໃຫ້ຄວາມສຳຄັນຕໍ່ການພົວພັນລະຫວ່າງປະເທດຢ່າງໃກ້ຊິດ ເພື່ອລະດົມການສະໜັບສະໜູນລະຫວ່າງປະເທດຫລາຍຂຶ້ນ. ຂະນະທີ່ປະເທດກຳລັງຖືກຫລຸດຄວາມສຳຄັນໃນລະດັບໂລກ ເພາະນະໂຍບາຍລະຫວ່າງປະເທດທີ່ດ້ອຍປະສິດທິພາບ.

ອີກຢ່າງໜຶ່ງ, ສີລັງກາກຳລັງຜະເຊີນວິກິດເສດຖະກິດຄັ້ງຮຸນແຮງທີ່ສຸດເທົ່າທີ່ເຄີຍເກີດຂຶ້ນ ເນື່ອງຈາກຂາດເຂີນເງິນຕາຕ່າງປະເທດ ເຊິ່ງນຳໄປສູ່ການຂາດເຂີນສິ່ງຂອງຈຳເປັນຄືຢາ, ເຊື້ອໄຟ ແລະ ອາຫານ.

ອ້າງອີງ:

ผู้นำ ‘ศรีลังกา’ วอนประชาชนประหยัดพลังงาน รับมือวิกฤตเศรษฐกิจ