ປະທານ ສນຊ ຕ້ອນຮັບການເຂົ້າພົບປະຢ້ຽມຢາມຂອງທ່ານທູດກູບາ

ທ່ານ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ ປະທານສູນກາງແນວລາວສ້າງຊາດ (ສນຊ) ໄດ້ຕ້ອນຮັບການເຂົ້າພົບປະຢ້ຽມຢາມຂອງທ່ານນາງ ແອນນາ ວີອັງຕວານເດສ ເອກອັກຄະລັດຖະທູດ ວິສາມັນຜູ້ມີອໍານາດເຕັມແຫ່ງປະເທດສາທາ ລະນະລັດ ກູບາ ປະຈໍາ ສປປ ລາວ ຄົນໃໝ່ ໃນວັນທີ 7 ມິຖຸນານີ້ ທີ່ສນຊ.

ທ່ານປະທານ ສນຊ ໄດ້ຕີລາຄາສູງຕໍ່ການມາເຮັດວຽກຢູ່ ສປປ ລາວ ຄັ້ງນີ້ຂອງທ່ານເອກອັກຄະລັດຖະທູດກູບາປະຈຳລາວຄົນໃໝ່ ຊຶ່ງເປັນການປະກອບ ສ່ວນເສີມສ້າງສາຍພົວພັນມິດຕະພາບ ລະຫວ່າງລາວ-ກູບາຊຶ່ງເປັນສາຍພົວພັນແບບເພື່ອນມິດສະຫາຍອ້າຍນ້ອງຮ່ວມອຸດົມການ ແລະ ເປັນການສະໜັບສະໜູນຊ່ວຍເຫຼືອຊຶ່ງກັນ ແລະ ກັນ.

ພ້ອມດຽວກັນນັ້ນ, ທ່ານ ເອກອັກຄະລັດຖະທູດກູບາ ໄດ້ສະແດງຄວາມຂອບໃຈເປັນຢ່າງຍິ່ງຕໍ່ ທ່ານ ສິນລະວົງ ຄຸດໄພທູນ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ໄດ້ລາຍງານ ສະພາບລວມຂອງປະເທດກູບາ ໂດຍຫຍໍ້ເປັນຕົ້ນ: ວຽກງານການເຕີບໃຫຍ່ຂະຫຍາຍຕົວທາງດ້ານເສດຖະກິດ ແລະ ວຽກງານສາສະໜາ, ລັດຖະບານ ກູບາ ໄດ້ສຸມໃສ່ແກ້ໄຂບັນຫາຫຍຸ້ງຍາກຂອງປະຊາຊົນຢູ່ເຂດຊົນນະບົດ ຊຶ່ງເປັນວຽກງານໜຶ່ງທີ່ມີຄວາມສໍາຄັນໃຫ້ທ່ານປະທານ ສນຊ ໄດ້ຮັບຊາບ ແລະ ທ່ານຍັງໄດ້ເຊີນທ່ານ ສິນລະວົງ ຄຸດໄພທູນ ພ້ອມດ້ວຍຄະນະຜູ້ແທນຂອງສນຊ ໄປຢ້ຽມຢາມປະເທດກູບາຕື່ມອີກ.
ຂ່າວ: ສນຊ