ໂຮງໝໍອິນເດຍອົກຊີບໍ່ພໍ ເຮັດໃຫ້ເດັກຕາຍກວ່າ 60 ຄົນ
ຜູ້ປ່ວຍເດັກຂອງໂຮງໝໍໃນລັດອຸຕໍປະເທດ ຂອງອິນເດຍ ເສຍຊີວິດຫລາຍກວ່າ 60 ຄົນໃນອາທິດດຽວ ເພາະໂຮງໝໍມີບັນຫາເລື່ອງຄ່າໃຊ້ຈ່າຍ ແລະ ສົ່ງຜົນໃຫ້ອົກຊີສຳຮອງບໍ່ພຽງພໍ.
ສຳນັກຂ່າວຕ່າງປະເທດລາຍງານຈາກເມືອງລັກເນົາ ປະເທດອິນເດຍ ໃນວັນທີ 13 ສິງຫານີ້ວ່າ: ໜ່ວຍງານທີ່ກ່ຽວຂ້ອງຫລາຍແຫ່ງເລັ່ງສອບສວນເຫດການຢູ່ໂຮງໝໍບາບາຣາກາຟ ດາສ ໃນເມືອງໂຄຣາປຸຣະ ທາງຕາເວັນອອກຂອງລັດອຸຕໍປະເທດ ທີ່ຢູ່ທາງຕອນເໜືອຂອງອິນເດຍ ຫລັງມີລາຍງານຜູ້ປ່ວຍເດັກຢ່າງໜ້ອຍ 64 ຄົນ ເສຍຊີວິດໃນອາທິດຜ່ານມາ ແລະ ສາເຫດອາດເປັນເພາະການຂາດເຂີນອົກຊີ ເນື່ອງຈາກຜູ້ບໍລິຫານຂອງໂຮງໝໍປະສົບບັນຫາໃນການຊຳລະຄ່າໃຊ້ຈ່າຍສ່ວນນີ້ໃຫ້ຜູ້ປະກອບການ.
ຂະນະທີ່ທ່ານ ສິດທາກະ ສິງ ລັດຖະມົນຕີດ້ານສາທາລະນະສຸກຂອງລັດອຸຕໍປະເທດ ກ່າວປະຕິເສດວ່າ: ສາເຫດການເສຍຊີວິດຂອງເດັກ ເຊິ່ງສ່ວນຫລາຍຢູ່ພະແນກພະຍາດໄຂ້ສະໝອງອັກເສບເປັນຜົນຈາກການຂາດອົກຊີ ໂດຍກ່າວວ່າອາດເປັນຜົນຈາກອາການປ່ວຍຂອງຄົນໄຂ້ເອງກໍໄດ້ ເນື່ອງຈາກຫລາຍຄົນມີການໜັກແລ້ວເມື່ອເຂົ້າຮັບການປິ່ນປົວຢູ່ໂຮງໝໍ, ສ່ວນທ່ານ ອານິວ ກຸມານ ເຈົ້າໜ້າທີ່ເຂດໂຄຣາປຸຣະ ຍອມຮັບວ່າ: ໂຮງໝໍແຫ່ງນີ້ເຊິ່ງເປັນໂຮງໝໍຂະໜາດໃຫຍ່ທີ່ສຸດໃນລັດອຸຕໍປະເທດ ກຳລັງປະສົບບັນຫາເລື່ອງຄ່າໃຊ້ຈ່າຍແທ້, ແຕ່ໄດ້ມີການຈັດຊຳລະເງິນທີ່ຄ້າງແລ້ວ ແລະ ຢືນຢັນຈະໄດ້ຮັບຖັງອົກຊີເພີ່ມອີກໃນໄວໆນີ້.
ໃນເວລາດຽວກັນ, ນາຍົກລັດຖະມົນຕີ ນາເຣນທຣາ ໂມດີ ກ່າວວ່າ: ລັດຖະບານຕິດຕາມສະຖານະການນີ້ຢ່າງໃກ້ຊິດ. ທັງນີ້ ລັດອຸຕໍປະເທດເຊິ່ງເປັນໜຶ່ງໃນລັດທຸກຍາກທີ່ສຸດຂອງອິນເດຍ ຢູ່ພາຍໃຕ້ການບໍລິຫານຂອງລັດຖະບານທ້ອງຖິ່ນພັກຄາຣາຕິຍະ ຊົນຕະ (BJP) ພາຍໃຕ້ການນຳຂອງທ່ານ ໂມດີ.
