ອັງກິດຢືນຢັນພົບ “ໝາກສຸກລີງ” ລະບາດໃນຊຸມຊົນຄັ້ງທຳອິດ ທົ່ວໂລກຕິດເຊື້ອແລ້ວ 550 ກວ່າຄົນ
ອົງການອະນາໄມໂລກເປີດເຜີຍຈຳນວນຜູ້ຕິດເຊື້ອໝາກສຸກລີງສູງເຖິງ 550 ຄົນໃນ 30 ປະເທດທົ່ວໂລກ. ຂະນະທີ່ອັງກິດຢືນຢັນພົບການລະບາດໃນຊຸມຊົນຄັ້ງທຳອິດຈາກຜູ້ຕິດເຊື້ອທີ່ບໍ່ມີປະຫວັດເດີນທາງໄປພື້ນທີ່ທີ່ມີການລະບາດ.
ວັນທີ 2 ມິຖຸນາ 2022, ສຳນັກຂ່າວຕ່າງປະເທດລາຍງານວ່າ: ອົງການອະນາໄມໂລກ (WHO) ເປີດເຜີຍໃນວັນທີ 1 ມິຖຸນາວ່າ: ພົບຜູ້ຕິດເຊື້ອພະຍາດໝາກສຸກລີງແລ້ວ 550 ກວ່າຄົນໃນ 30 ກວ່າປະເທດ. ຂະນະທີ່ເຊື້ອໄວຣັສຍັງແພ່ກະຈາຍໄປພື້ນທີ່ຕ່າງໆທົ່ວໂລກ.
ທ່ານ ທີໂດສ ອັດຮານອມ ກີບຣີເຢຊຸສ ຜູ້ອຳນວຍການໃຫຍ່ຂອງອົງການອະນາໄມໂລກ ລະບຸວ່າ: ການທີ່ມີຜູ້ຕິດເຊື້ອໄວຣັສໝາກສຸກລີງປາກົດຂຶ້ນໃນຫລາຍໆປະເທດທົ່ວໂລກນັ້ນ ບົ່ງຊີ້ວ່າໄວຣັສນີ້ມີການແພ່ກະຈາຍຢູ່ນອກທະວີບອາຟຣິກາ ເຊິ່ງເປັນພື້ນທີ່ທີ່ມີໄວຣັສໝາກສຸກລີງເປັນເຊື້ອປະຈຳຖິ່ນ ມາແລ້ວໄລຍະໜຶ່ງໂດຍບໍ່ມີການກວດພົບ.
ທ່ານ ກີບຣີເຢຊຸສ ກ່າວວ່າ: ເຖິງວ່າຜູ້ຕິດເຊື້ອສ່ວນຫລາຍທີ່ພົບເປັນເພດຊາຍທີ່ມີປະຫວັດມີເພດສຳພັນກັບຜູ້ຊາຍນຳກັນ, ແຕ່ອົງການອະນາໄມໂລກຂໍເນັ້ນວ່າ: ທຸກຄົນສາມາດຕິດເຊື້ອໄວຣັສຊະນິດນີ້ໄດ້ຈາກການສຳຜັດໃກ້ຊິດກັບຜູ້ຕິດເຊື້ອ ບໍ່ພຽງແຕ່ສະເພາະຜູ້ຕິດເຊື້ອໃນກຸ່ມຊາຍຮັກຊາຍເທົ່ານັ້ນ ແລະ ຂໍຮຽກຮ້ອງໃຫ້ປະເທດຕ່າງໆ ເພີ່ມການເຝົ້າລະວັງເພື່ອສະກັດການລະບາດໃນກຸ່ມປະຊາກອນວົງກວ້າງ.
ຂະນະດຽວກັນ, ນາງ ໂຣຊາມຸນ ລູອິສ ທ່ານໝໍຫົວໜ້າຝ່າຍເຕັກນິກດ້ານພະຍາດໝາກສຸກລີງຂອງອົງການອະນາໄມໂລກ ໄດ້ເປີດເຜີຍລະຫວ່າງການຖະແຫລງຂ່າວຢູ່ນະຄອນຫລວງເຈນີວາໃນວັນທີ 1 ມິຖຸນາວ່າ: ໄວຣັສດັ່ງກ່າວອາດເກີດການຕິດຕໍ່ມາເປັນເວລາຫລາຍເດືອນ ຫລື ຫລາຍປີແລ້ວ ໂດຍກວດບໍ່ພົບ ເຖິງວ່າປັດຈຸບັນກຳລັງຢູ່ລະຫວ່າງຂະບວນການສືບສວນ ແລະ ຍັງບໍ່ມີຄຳຕອບທີ່ຈະແຈ້ງໃນເລື່ອງນີ້.
ເຖິງຢ່າງໃດກໍຕາມ, ອົງການອະນາໄມໂລກຢືນຢັນວ່າ: ບໍ່ມີຄວາມຈຳເປັນທີ່ປະເທດຕ່າງໆຈະຕ້ອງເລັ່ງສັກວັກຊີນໃຫ້ປະຊາຊົນເປັນວົງກວ້າງ ເນື່ອງຈາກການລະບາດຍັງເກີດຂຶ້ນສະເພາະກຸ່ມ. ຂະນະທີ່ວັກຊີນໄຂ້ທໍລະພິດ ເຊິ່ງສາມາດປ້ອງກັນໄວຣັສໝາກສຸກລີງໄດ້ນັ້ນ ພົບວ່າມີຢູ່ທົ່ວໂລກສ່ວນຫລາຍເປັນວັກຊີນລຸ້ນທຳອິດ ເຊິ່ງບໍ່ກົງຕາມມາດຕະຖານໃນປັດຈຸບັນ, ສ່ວນວັກຊີນປ້ອງກັນໄຂ້ທໍລະພິດລຸ້ນໃໝ່ຍັງມີອຸປະທານຈຳກັດ ໂດຍປັດຈຸບັນອົງການອະນາໄມໂລກກຳລັງເຮັດວຽກຮ່ວມກັບບໍລິສັດຕ່າງໆ ເພື່ອເພີ່ມການເຂົ້າເຖິງວັກຊີນ ແລະ ວິທີປິ່ນປົວໃໝ່ໆ.
ທັງນີ້, ໄວຣັສໝາກສຸກລີງ ເຊິ່ງປົກກະຕິເປັນໄວຣັສປະຈຳຖິ່ນບໍລິເວນທະວີບອາຟຣິກາກາງ ແລະ ອາຟຣິກາຕາເວັນຕົກ ຖືກພົບວ່າມີການແພ່ລະບາດຢູ່ທະວີບອາເມລິກາເໜືອ ແລະ ເອີຣົບນັບແຕ່ກາງເດືອນພຶດສະພາຜ່ານມາ ໂດຍມີການກວດພົບຜູ້ຕິດເຊື້ອເພີ່ມຂຶ້ນເລື້ອຍໆໃນຫລາຍປະເທດ ສົ່ງຜົນໃຫ້ເກີດຄວາມກັງວົນວ່າ: ໄວຣັສອາດແພ່ກະຈາຍໄປປະເທດອື່ນໆເປັນວົງກວ້າງ.
ຫລ້າສຸດ, ສຳນັກງານຄວາມໝັ້ນຄົງດ້ານສຸຂະພາບແຫ່ງອັງກິດ (UKHSA) ໄດ້ອອກມາຖະແຫລງໃນວັນທີ 1 ມິຖຸນາວ່າ: ພົບການລະບາດຂອງເຊື້ອໄວຣັສຈາກບຸກຄົນໜຶ່ງສູ່ບຸກຄົນໜຶ່ງ ເຊິ່ງບໍ່ມີປະຫວັດການເດີນທາງເຊື່ອມໂຍງໄປປະເທດທີ່ເກີດການລະບາດມາກ່ອນ ເຊິ່ງຄາດໄດ້ວ່າເປັນການລະບາດທີ່ເກີດຂຶ້ນໃນຊຸມຊົນ.
UKHSA ລະບຸວ່າ: ຜູ້ຕິດເຊື້ອໝາກສຸກລີງທີ່ຖືກພົບໃນປະເທດ ສ່ວນຫລາຍອາໄສຢູ່ນະຄອນຫລວງລອນດອນ ເຊິ່ງມີຈຳນວນເຖິງ 132 ຄົນ. ຂະນະທີ່ 111 ຄົນເປັນຜູ້ຊາຍທີ່ມັກມີເພດສຳພັນກັບຜູ້ຊາຍນຳກັນ ໂດຍມີພຽງ 2 ຄົນເທົ່ານັ້ນເປັນຜູ້ຍິງ.
ຂະນະທີ່ອາເມລິກາ ໄດ້ມີການລາຍງານພົບຜູ້ຕິດເຊື້ອໝາກສຸກລີງແລ້ວຢ່າງໜ້ອຍ 15 ຄົນໃນ 9 ລັດທົ່ວປະເທດ. ນອກຈາກນີ້ ຍັງມີລາຍງານພົບຜູ້ຕິດເຊື້ອໃນປະເທດອື່ນໆເຊັ່ນ: ແອັສປາຍ, ປັອກຕຸຍການ, ອົດສະຕຣາລີ, ແບນຊິກ, ການາດາ, ເຢຍລະມັນ ແລະ ສະວິດ.
ອ້າງອີງ:
https://news.un.org/en/story/2022/06/1119472
https://www.cnbc.com/…/who-says-monkeypox-has-been…
https://www.reuters.com/…/health-agency-confirms…/
