ເຜີຍແຜ່-ແນະນໍານິຕິກໍາກ່ຽວກັບອາກອນມູນຄ່າເພີ່ມ ໃຫ້ຫົວໜ່ວຍທຸລະກິດທົ່ວເມືອງຈັນທະບູລີ

ໃນລະຫວ່າງວັນທີ 30-31 ພຶດສະພາ 2022 ນີ້, ທີ່ສຳນັກງານປົກຄອງເມືອງຈັນທະບູລີ, ກົມສ່ວຍສາອາກອນ ສ່ວຍສາອາກອນ ປະຈຳນະຄອນຫຼວງວຽງຈັນ (ນວ) ຮ່ວມກັບສ່ວຍສາອາກອນ ປະຈຳເມທອງຈັນທະບູລີ, ໄດ້ລົງເຜີຍ ແຜ່ແນະນໍາບັນດານິຕິກຳກ່ຽວກັບການຂະຫຍາຍຖານອາກອນມູນຄ່າເພີ່ມ (ອມພ), ການນໍາໃຊ້ໂປຣແກຣມບັນຊີ ແລະ ການນໍາໃຊ້ໂປຣແກຣມເຄື່ອງບັນທຶກການຂາຍສິນຄ້າ ແລະ ການບໍລິການໃຫ້ຫົວໜ່ວຍທຸລະກິດທົ່ວເມືອງຈັນທະບູລີ.

ໂດຍການເຂົ້າຮ່ວມເປັນປະທານຂອງທ່ານ ແກ້ວປະເສີດ ໄຊປັນຍາ ຮອງເຈົ້າເມືອງຈັນທະບູລີ, ມີຫົວ ໜ້າ ຫ້ອງການອ້ອມຂ້າງເມືອງ, ຫົວໜ້າສ່ວຍສາອາກອນປະຈໍາເມືອງ, ພ້ອມດ້ວຍຄະນະວິຊາການ ແລະ ບັນດາຫົວ ໜ່ວຍ ທຸລະກິດເປົ້າໝ່າຍອ້ອມຂ້າງເມືອງຈັນທະບູລີເຂົ້າຮ່ວມ.

ໃນການເຜີຍແຜ່ໃນຄັ້ງນີ້ໄດ້ແບ່ງອອກເປັນ 3 ຊຸດໂດຍມີຫົວໜ່ວຍທຸລະກິດເປົ້າໝາຍເຂົ້າລະບົບອາກອນມູນຄ່າເພີ່ມທັງໝົດ 306 ພື້ນຖານ ແລະ ໄດ້ມີການນໍາສະເໜີໃຫ້ຮູ້ກ່ຽວກັບການຂະຫຍາຍຖານອາກອນມູນຄ່າເພີ່ມ ແລະ ການນໍາໃຊ້ໂປຣແກຣມເຄື່ອງບັນທຶກການຂາຍສິນຄ້າ ແລະການບໍລິການ, ແນະນໍາໃຫ້ເຂົ້າໃຈອາກອນທີ່ມີຄວາມເປັນທໍາ ຜູ້ຖືກມອບໝາຍ ຫຼື ຜູ້ເປັນຕົວແທນໃຫ້ແກ່ຂະແໜງສ່ວຍສາອາກອນໃນການຄິດໄລ່ເກັບອາກອນມູນຄ່າເພີ່ມ, ອາກອນ ປະເພດຕ່າງໆທີ່ຕ້ອງຈ່າຍ, ສິນຄ້າ-ການບໍລິການ ທີ່ໄດ້ຮັບການຍົກເວັ້ນອາກອນມູນຄ່າເພີ່ມ, ປະເພດທີ່ຖືກເສຍອາ ກອນມູນຄ່າເພີ່ມ,ອາກອນຊົມໃຊ້, ການນຳໃຊ້ລະບົບບັນຊີ, ການນຳໃຊ້ໃບເກັບເງິນ, ເງື່ອນຕ່າງໆ ທີ່ຈະໄດ້ຮັບໃບຢັ້ງຢືນ ການເຂົ້າລະບົບອາກອນມູນຄ່າເພີ່ມຈາກຂະແໜງສ່ວຍສາອາກອນເຂົ້າໃຈວິທີການແຈ້ງມອບເງິນລວມທັງຮູ້ສິດ ແລະ ໜ້າທີ່ຂອງຜູ້ແຈ້ງມອບອາກອນມູນຄ່າເພີ່ມ ນໍາອີກດ້ວຍ.

ພ້ອມກັນນັ້ນໃນກອງປະຊຸມ, ຍັງໄດ້ຮັບຟັງການແນະນໍາການນໍາໃຊ້ໂປຣແກຣມບັນຊີ ຈາກວິທະຍາກອນ ທີ່ມາຈາກກົມບັນຊີ ແນະນໍາໃຫ້ຮູ້ ແລະ ເຂົ້າໃຈວິທີການ ຫຼັກການຂອງການບັນຊີ ເພື່ອໃນບັນດາຫົວໜ່ວຍທຸລະກິດ ນໍາໄປຈັດຕັ້ງປະຕິບັດໃຫ້ຖືກຕ້ອງຕາມລະບຽບການທີ່ກໍານົດໄວ້.

ທັງນີ້, ກໍ່ເພື່ອເຮັດໃຫ້ບັນດາຫົວໜ່ວຍທຸລະກິດມີ ຄວາມຮັບຮູ້ ແລະ ເຂົ້າໃຈຢ່າງຖືກຕ້ອງໃນການຂະຫຍາຍຖານອາກອນມູນຄ່າເພີ່ມ, ການຫັນເປັນທັນສະໄໝກໍຄືການ ນໍາໃຊ້ໂປຣແກຣມເຄື່ອງບັນທຶກການຂາຍສິນຄ້າ ແລະ ການບໍລິການທີ່ຕິດພັນກັບການຄຸ້ມຄອງການນໍາໃຊ້ໃບເກັບເງິນທີ່ພິມອອກຈາກເຄື່ອງເອເລັກໂຕຣນິກ ແລະ ມາດຖານເງື່ອນໄຂຂອງຜູ້ທີ່ເຂົ້າໃນລະບົບອາກອນມູນຄ່າເພີ່ມ ລວມ ທັງການນໍາໃຊ້ໂປຣແກຣມບັນຊີ ໃຫ້ມີຄວາມຖືກຕ້ອງສອດຄ່ອງກັບສະພາບການຫັນປ່ຽນໃໝ່ໃນປັດຈຸບັນ, ຊຶ່ງມັນຮຽກຮ້ອງໃຫ້ທຸກພາກຕ້ອງໄດ້ປະຕິບັດໃຫ້ຖືກຕ້ອງຕາມລະບຽບການ ແລະ ກົດໝາຍທີ່ກໍານົດໄວ້.