“ຊາລ່າ” ໄດ້ຮັບລາງວັນ ນັກເຕະດີເດັ່ນແຫ່ງປີຂອງ PFA ຈາກການໂຫວດຂອງແຟນບານ

ໂດຍຜົນງານ 2 ແຊ້ມຄື ເອຟເອຄັບ ແລະ ຄາລາບາວ ຄັບ ພ້ອມດ້ວຍຮອງແຊ້ມ ແຊ້ມປ້ຽນລີກ ແລະ ພຣີເມຍລີກ ໂມຮາເໝັດ ຊາລ່າ ກອງໜ້າຊາວອີຢິບຂອງ ລິເວີພູລ ດີພໍທີ່ຈະຄວ້າລາງວັນນັກເຕະດີເດັ່ນແຫ່ງປີຂອງສະມາຄົມບານເຕະອາຊີບ (PFA) ໄປຄອງ.

ໂດຍ​ການ​ລົງ​ຄະ​ແນນ​ສຽງ​ນີ້​ແມ່ນ​ມາ​ຈາກ​ການ​ຕັດ​ສິນຂອງແຟນບານ 100%  ເຊິ່ງຜົນດັ່ງກ່າວອອກມາປາກົດວ່າ ຊາລ່າ ທີ່ເປັນດາວຊັນໂວຮ່ວມໃນ ພຣີເມຍລີກ ລະດູການ 2021-22 ດ້ວຍການຍິງໄປ 23 ປະຕູ, 13 ແອດຊິສ ໄດ້ຮັບຄະແນນສຽງເຖິງ 59%, ຂະນະທີ່ອັນດັບ 2 ຕົກເປັນຂອງ ເຄວິນ ເດີບຣອຍ ກອງກາງຕົວເກັ່ງຈາກ ແມນເຊັສເຕີ ຊິຕີ້ ໄດ້ຮັບ 21%, ແລະ ອັນດັບ 3 ຕົກເປັນຂອງ ດີແຄນ ໄລ້ ຂອງ ເວັສແຮມ ທີ່ 8%

ສຳລັບ ໂມຮາເໝັດ ຊາລ່າ ຄວ້າລາງວັນນັກເຕະດີເດັ່ນແຫ່ງປີຂອງ PFA 3 ສະໄໝແລ້ວ, ໂດຍກ່ອນໜ້ານີ້ເຄີຍໄດ້ໃນປີ 2018 ແລະ 2021.