ເຜີຍແຜ່ ສົນທິສັນຍາສາກົນ ດ້ານສິດທິມະນຸດ ໃຫ້ ສສຊ ແລະ ສສຂ 4 ແຂວງພາກກາງ

ວັນທີ 30 ພຶດສະພາ 2022 ທີ່ຫ້ອງວ່າການແຂວງຄໍາມ່ວນ, ກົມສົນທິສັນຍາ ແລະ ກົດໝາຍ ກະຊວງການຕ່າງປະເທດ ໄດ້ຈັດຕັ້ງການເຜີຍແຜ່ສົນທິສັນຍາສາກົນ ດ້ານສິດທິມະນຸດ ທີ່ ສປປ ລາວ ເປັນພາຄີ ແລະ ບັນດາຂໍ້ສະເໜີແນະພາຍໃຕ້ ກົນໄກທົບທວນປະຈຳໄລຍະດ້ານສິດທິມະນຸດ ຮອບວຽນທີ 3 ທີ ສປປ ລາວ ຮັບຮອງເອົາ ໃຫ້ແກ່ສະມາຊິກສະພາແຫ່ງຊາດ ປະຈຳເຂດເລືອກຕັ້ງ ແລະ ສະມາຊິກສະພາປະຊາຊົນຂັ້ນແຂວງ. ພາຍໃຕ້ການເປັນປະທານຮ່ວມຂອງ ທ່ານ ທອງຜ່ານ ສະຫວັນເພັດ ຮອງລັດຖະມົນຕີກະຊວງການຕ່າງປະເທດ ທັງເປັນຮອງປະທານຄະນະກໍາມະການແຫ່ງຊາດ ວ່າດ້ວຍສິດທິມະນຸດ, ມີບັນດາສະມາຊິກສະພາປະຊາຊົນຈາກ ແຂວງໄຊສົມບູນ, ບໍລິຄຳໄຊ, ສະຫວັນນະເຂດ ແລະ ຄຳມ່ວນ ເຂົ້າຮ່ວມ.

ການເຜີຍແຜ່ຄັ້ງນີ້, ຜູ້ເຂົ້າຮ່ວມໄດ້ຮັບຟັງ ກົດໝາຍສາກົນ, ກົດໝາຍວ່າດ້ວຍສົນທິສັນຍາ ແລະ ສັນຍາສາກົນ, ບັນດາສົນທິສັນຍາສາກົນ ດ້ານສິດທິມະນຸດທີ່ ສປປ ລາວ ເປັນພາຄີ, ກົນໄກສິດທິມະນຸດສາກົນ ແລະ ພາກພື້ນ, ການເຂົ້າຮ່ວມຂະບວນການ ທົບທວນປະຈຳໄລຍະດ້ານສິດທິມະ ນຸດ(UPR) ຮອບວຽນທີ 3, ບາງກໍລະນີຂໍ້ກ່າວຫາດ້ານສິດທິມະນຸດ ທີ່ສາກົນຍົກຂຶ້ນຕໍ່ ສປປ ລາວ ແລະ ການຕອບໂຕ້ຊີ້ແຈງອະທິບາຍຂອງ ສປປ ລາວ ຕໍ່ກໍລະນີດັ່ງກ່າວ, ວຽກງານການຄຸ້ມຄອງ ການເຄື່ອນໄຫວສາສະໜາຢູ່ ສປປ ລາວ, ການເຄື່ອນໄຫວຂອງ ສປປ ລາວ ໃນວຽກງານການສົ່ງເສີມ ແລະ ປົກປ້ອງສິດທິມະນຸດ, ພາລະບົດບາດຂອງສະພາແຫ່ງຊາດ ຕໍ່ກັບການຮັບຮອງ, ໃຫ້ສັດຕະຍາ ບັນ ແລະ ເຂົ້າຮ່ວມເປັນພາຄີຂອງສົນທິສັນຍາ ລວມທັງການຕິດຕາມການຈັດຕັ້ງປະຕິບັດ ພັນທະພາຍໃຕ້ສົນທິສັນຍາສາກົນ ດ້ານສິດທິມະນຸດ.

ທ່ານ ທອງຜ່ານ ສະຫວັນເພັດ ໄດ້ຍົກໃຫ້ເຫັນສະພາບການຂອງໂລກ ແລະ ພາກພື້ນ ກ່ຽວກັບວຽກງານການສົ່ງເສີມ ແລະ ປົກປ້ອງສິດທິມະນຸດ, ລວມທັງການເຄື່ອນໄຫວດ້ານສິດ ທິມະນຸດຂອງລັດຖະບານລາວ ເຊິ່ງຖືວ່າເປັນໜຶ່ງໃນວຽກງານບູລິມະສິດຂອງລັດຖະບານ ທີ່ໄດ້ໃຫ້ຄວາມສຳຄັນ ແລະ ເອົາໃຈໃສ່ຕະຫລອດມາ. ຮອດປະຈຸບັນ, ສປປ ລາວ ໄດ້ເຂົ້າຮ່ວມເປັນພາຄີສົນທິສັນ ຍາຫລັກດ້ານສິດທິມະນຸດຂອງ ສປຊ ຈຳນວນ 7 ສະບັບຈາກທັງໝົດ 9 ສະບັບ ເປັນພາຄີອະນຸສັນຍາເພີ່ມເຕີມ ໃຫ້ແກ່ສົນທິສັນຍາວ່າດ້ວຍ ສິດທິເດັກອີກ 2 ສະບັບ.