ປີນີ້ ລາວຈະປູກໄມ້ 37.200 ເຮັກຕາ

ກະຊວງກະສິກໍາ ແລະ ປ່າໄມ້ ຈະສົມທົບກັບຄະນະພັກ, ອົງການປົກຄອງທ້ອງຖິ່ນທົ່ວປະເທດ ກຽມປູກໄມ້ຢູ່ທ້ອງຖິ່ນໃຫ້ເປັນຂະບວນຟົດຟື້ນໃນເນື້ອທີ່ 37.200 ເຮັກຕາ, ໃນນີ້ປູກເພື່ອປົກປັກຮັກສາສິ່ງແວດ ລ້ອມຢູ່ຂອບເຂດປ່າປ້ອງກັນ, ປ່າສະຫງວນ 7.400 ເຮັກຕາ, ປູກປ່າທົດແທນເຂດໂຄງການພື້ນຖານໂຄງ ລ່າງ ແລະ ປູກໄມ້ອຸດສາຫະກໍາເປັນສິນຄ້າ 24.800 ເຮັກຕາ ແລະ ປູກໃນດິນຂອງບຸກຄົນ, ນິຕິບຸກຄົນ 5.000 ເຮັກຕາ.

ທ່ານ ເພັດ ພົມພິພັກ ລັດຖະມົນຕີກະຊວງກະສິກໍາ ແລະ ປ່າໄມ້ ໄດ້ຖະແຫລງຂ່າວໃນໂອກາດວັນປູກຕົ້ນໄມ້ແຫ່ງຊາດ ວັນທີ 1 ມິຖຸນານີ້ວ່າ: ສະເພາະວັນທີ 1 ມິຖຸນາ ທົ່ວປະເທດ ຈະປູກຕົ້ນໄມ້ໃນເນື້ອທີ່ 1.213 ເຮັກຕາ ໂດຍນໍາໃຊ້ເບ້ຍໄມ້ 1.465.233 ກວ່າເບ້ຍ, ໃນນີ້ມີ ໄມ້ດູ່, ໄມ້ແຕ້ຂ່າ, ໄມ້ຍາງ, ໄມ້ສັກ, ໄມ້ແຄນ, ໄມ້ສົ້ມຝາດ, ໄມ້ຂະຍຸງ, ໄມ້ແຕ້ຮໍ, ໄມ້ສະຝາງ, ໄມ້ກາກະເລົາ, ໄມ້ຄູນ, ໄມ້ສາມສາ ແລະ ໄມ້ ອື່ນໆ. ຂະນະທີ່ແຕ່ລະແຂວງວາງແຜນການວາງສະແດງເບ້ຍໄມ້ເພື່ອສົ່ງເສີມການປູກໄມ້ເປັນສິນຄ້າ ແລະ ປົກປັກຮັກສາສິ່ງແວດລ້ອມອີກດ້ວຍ. ຕາມຄາດໝາຍແລ້ວ, ລັດຖະບານ ຈະສູ້ຊົນຮັກສາດິນປ່າໄມ້ 16,5 ລ້ານເຮັກຕາ ແລະ ຈະຍົກລະດັບຄວາມປົກຫຸ້ມປ່າໄມ້ໃຫ້ໄດ້ 70% ຂອງເນື້ອທີ່ທົ່ວປະເທດ ຫລື 16,5 ລ້ານເຮັກຕາ, ໃນນີ້ປ່າສະຫງວນ 4,7 ລ້ານ ເຮັກຕາ, ປ່າປ້ອງກັນ 8,2 ລ້ານເຮັກຕາ, ປ່າຜະລິດ 3,1 ລ້ານເຮັກຕາ, ຟື້ນຟູປ່າທໍາມະຊາດ 6 ລ້ານເຮັກຕາ ແລະ ປ່າປູກ 5 ແສນເຮັກຕາໂດຍການສົ່ງເສີມທຸກພາກສ່ວນເສດຖະກິດ, ຜູ້ປະກອບການ ແລະ ພາກສ່ວນຕ່າງໆໃນສັງຄົມປູກຕົ້ນໄມ້ຕາມທ່າແຮງ ແລະ ເງື່ອນໄຂຕົວຈິງ. ແນວໃດກໍຕາມ, ການປົກປັກຮັກສາປ່າໄມ້ຍັງມີສິ່ງທ້າທາຍທີ່ສົ່ງຜົນກະທົບທາງກົງ ແລະ ທາງອ້ອມຕໍ່ປ່າໄມ້ ແລະ ທີ່ດິນປ່າໄມ້ ໂດຍສະເພາະການບຸກລຸກເຂດ 3 ປະເພດປ່າ, ພ້ອມນີີ້ການກໍານົດທີ່ດິນປ່າໄມ້ເຂົ້າໃນ 3 ປະເພດປ່າ ກໍຍັງບໍ່ທັນສໍາເລັດ ເຊິ່ງເປັນສິ່ງທ້າທາຍຕໍ່ການບັນລຸເປົ້າໝາຍການຍົກລະດັບຄວາມປົກຫຸ້ມປ່າໄມ້ໃຫ້ໄດ້ 70% ( 16,5 ລ້ານເຮັກຕາ) ຕາມແຜນສູ້ຊົນໃນຍຸດທະສາດປ່າໄມ້.

ທ່ານ ເພັດ ພົມພິພັກ ໄດ້ຮຽກຮ້ອງປວງຊົນທັງຊາດຈົ່ງເຊີດຊູສະຕິຮັກຊາດ ແລະ ຫວງແຫນປ່າໄມ້ ປະ ກອບສ່ວນຕາມເງື່ອນໄຂຄວາມສາມາດປູກໄມ້, ຟື້ນຟູປ່າຄຽງຄູ່ກັບການຄຸ້ມຄອງ, ປົກປັກຮັກສາປ່າໄມ້ ອັນເປັນມໍລະດົກຂອງຊາດໃຫ້ນັບມື້ອຸດົມສົມບູນ ແລະ ສາມາດຕອບສະໜອງຄວາມຮຽກຮ້ອງຕ້ອງການວັດຖຸດິບດ້ານໄມ້ ແລະ ຜະລິດຕະຜົນປ່າໄມ້ໄດ້ຢ່າງຍືນນານບໍ່ມີວັນບົກແຫ້ງ, ເຮັດໃຫ້ຊັບພະຍາກອນປ່າໄມ້ ທີ່ເປັນສ່ວນປະກອບອັນສໍາຄັນເຂົ້າໃນການພັດທະນາເສດຖະກິດຂອງຊາດ ແລະ ເປັນການປົກປັກຮັກສາສິ່ງ ແວດລ້ອມເພາະການປູກຕົ້ນໄມ້ສາມາດປູກໄດ້ແຕ່ດຽວນີ້ເປັນຕົ້ນໄປ ແລະ ຕະຫລອດຮອດລະດູຝົນ, ບ່ອນ ໃດມີເງື່ອນໄຂ, ເນື້ອທີ່ ແລະ ແຫລ່ງນໍ້າກໍສາມາດປູກໄດ້ຕະຫລອດ, ປູກຜູ້ລະ 1-2 ຕົ້ນໃນເນື້ອທີ່ດິນເປົ່າ ວ່າງຂອງຕົນ, ຮົ້ວສວນ, ທີ່ດິນປຸກສ້າງ, ເດີ່ນໂຮງຮຽນ, ສໍານັກງານອົງການ ແລະ ຕາມແຄມທາງເຊິ່ງສາ ມາດປູກໄດ້ທຸກຊະນິດໄມ້ຕາມເງື່ອນໄຂຕົວຈິງ ດັ່ງຄໍາຂວັນ“ຈົ່ງຊ່ວຍກັນປູກຕົ້ນໄມ້ໃຫ້ເປັນປ່າເພື່ອເປັນສິນ ຄ້າ ແລະ ປະກອບສ່ວນປົກປັກຮັກສາສິ່ງແວດລ້ອມ, ຫລຸດຜ່ອນການປ່ຽນແປງດິນຟ້າອາກາດ”.