WHO ຊີ້ ພະຍາດໝາກສຸກລີງເປັນຄວາມສ່ຽງປານກາງ ຕໍ່ລະບົບສາທາລະນະສຸກທົ່ວໂລກ ພົບຜູ້ຕິດເຊື້ອແລ້ວ 23 ປະເທດ
ອົງການອະນາໄມໂລກ (WHO) ເຜີຍແພ່ລາຍງານຄວາມຄືບໜ້າສະຖານະການການແພ່ລະບາດຂອງພະຍາດໝາກສຸກລີງຜ່ານທາງເວັບໄຊໃນວັນທີ 29 ພຶດສະພາ ໂດຍລະບຸຜົນປະເມີນຄວາມສ່ຽງພົບວ່າ: ພະຍາດໝາກສຸກລີງເປັນ “ຄວາມສ່ຽງປານກາງ” ຕໍ່ລະບົບສາທາລະນະສຸກທົ່ວໂລກ, ຫລ້າສຸດພົບຜູ້ຕິດເຊື້ອທີ່ຢືນຢັນແລ້ວ 257 ຄົນ ຈາກ 23 ປະເທດ ແລະ ໄດ້ຮັບລາຍງານກໍລະນີຖືກສົງໄສຕິດເຊື້ອອີກປະມານ 120 ຄົນ ແຕ່ຍັງບໍ່ພົບຜູ້ເສຍຊີວິດຈາກພະຍາດໝາກສຸກລີງ.
“ຄວາມສ່ຽງດ້ານສາທາລະນະສຸກອາດສູງຂຶ້ນ ຖ້າໄວຣັສຊະນິດນີ້ສວຍໂອກາດສ້າງຕົນເອງໃຫ້ເປັນເຊື້ອສ້າງພະຍາດໃນມະນຸດ ແລະ ແພ່ກະຈາຍໄປຫາກຸ່ມທີ່ມີຄວາມສ່ຽງສູງທີ່ຈະເປັນພະຍາດຮ້າຍແຮງເຊັ່ນ: ເດັກນ້ອຍ ແລະ ຜູ້ທີ່ມີພູມຕ້ານທານອ່ອນແອ” WHO ກ່າວ.
ໂດຍລະບຸວ່າ: ການປາກົດຂຶ້ນຂອງພະຍາດໝາກສຸກລີງພ້ອມໆກັນໃນຫລາຍປະເທດນອກຈາກອາຟຣິກາກາງ ແລະ ອາຟຣິກາຕາເວັນຕົກທີ່ມີພະຍາດນີ້ເປັນພະຍາດປະຈຳຖິ່ນບົ່ງຊີ້ວ່າ: ມີການແພ່ລະບາດທີ່ກວດບໍ່ພົບເກີດຂຶ້ນໃນບາງຄັ້ງ ແລະ ເພີ່ມຂຶ້ນໃນມໍ່ໆນີ້ ເຊິ່ງຜົນຈາກການຂະຫຍາຍການເຝົ້າລະວັງໃນປະເທດຕ່າງໆ ເຮັດໃຫ້ຄາດວ່າຈະພົບກໍລະນີຜູ້ຕິດເຊື້ອເພີ່ມຂຶ້ນ.
ທັງນີ້, ໝາກສຸກລີງເປັນພະຍາດຕິດເຊື້ອທີ່ມັກຈະມີອາການບໍ່ຮຸນແຮງ ແລະ ແພ່ລະບາດໂດຍການສຳຜັດໃກ້ຊິດ ຈຶ່ງສາມາດຄວບຄຸມ ແລະ ປ້ອງກັນໄດ້ຂ້ອນຂ້າງງ່າຍ ໂດຍການບັງຄັບໃຊ້ມາດຕະການຕ່າງໆເຊັ່ນ: ການກັກຕົວ ຫລື ປະຕິບັດຕາມຫລັກສຸຂະອະນາໄມ.
ຈົນຮອດຕອນນີ້ກໍລະນີຜູ້ຕິດເຊື້ອສ່ວນຫລາຍພົບໃນອັງກິດ, ແອັສປາຍ ແລະ ປັອກຕຸຍການ ໂດຍຈາກການກວດສອບພົບວ່າ: ຜູ້ຕິດເຊື້ອທີ່ໄດ້ຮັບລາຍງານສ່ວນຫລາຍບໍ່ມີການເຊື່ອມໂຍງກັບການເດີນທາງໄປປະເທດທີ່ມີພະຍາດໝາກສຸກລີງເປັນພະຍາດປະຈຳຖິ່ນ.
ອ້າງອີງ:
- https://www.reuters.com/business/healthcare-pharmaceuticals/reports-monkeypox-non-endemic-countries-suggests-undetected-transmission-some-2022-05-29/
- https://www.who.int/emergencies/disease-outbreak-news/item/2022-DON388
