ທີມດັງພຣີເມຍລີກ ພິຈາລະນາຄວ້າ ຊົວເຣສ ລະເບີດຕາຫນ່າງລະດູການຫນ້າ

ຫນຶ່ງໃນທີມດັງພຣີເມລີກ ອັງກິດຕົກເປັນຂ່າວພວມພິຈາລະນາຄວ້າ ຫລຸຍ ຊົວເຣສ ກັບມາຫລິ້ນໃນພຣີເມຍລີກອີກເທື່ອຫນຶ່ງ.

ເທເລກຣາຟ ສື່ຊື່ດັງຂອງອັງກິດ ລາຍງານຂ່າວ ແອສຕັນ ວິລລາ ສະໂມສອນດັງໃນພຣີເມຍລີກ ອັງກິດ ພວມເບິ່ງເຖິງຄວາມເປັນໄປໄດ້ໃນການຄວ້າ ຫລຸຍ ຊົວເຣສ ກອງຫນ້າທີມຊາດອຸຣຸໄກວຂອງ ແອດເລຕີໂກ ມາດຣິດ ມາສູ່ຖິ່ນ ວິລລາ ພາກ ໃນໄລຍະລະດູການນີ້.

ສຳລັບ ຊົວເຣສ ອາຍຸ 35 ພວມຈະຫມົດສັນຍາກັບ ແອດເລຕີໂກ ມາດຣິດ ຫມົດເດືອນມິຖຸນານີ້ ແລະ ຈະໂບກມືອຳລາທີມເປັນທີ່ແນ່ນອນແລ້ວ ແລະ ສາມາດຍ້າຍທີມໄດ້ແບບບໍ່ມີຄ່າຕົວ ທ່າມກາງກະແສຂ່າວໄດ້ຮັບຄວາມສົນໃຈຈາກທີມໃນເມເຈີລີກ ຊັກເກີ ສະຫະລັດ ແນວໃດກໍຕາມ ລາຍງານຫລ້າສຸດຈາກສື່ອັງກິດລະບຸວ່າ ຊົວເຣສ ຍັງຕ້ອງການຫລິ້ນໃນຢູໂຣບຕໍ່ໄປ ໂດຍສະເພາະການກັບມາຫລິ້ນໃນພຣີເມຍລີກ ອັງກິດ ກໍຢູ່ໃນຕົວເລືອກຂອງລາວ ເພາະເຄີຍປະສົບຄວາມສຳເລັດຢ່າງຫລາຍສະໄຫມຢູ່ກັບລີເວີພູລ.

ນອກຈາກນີ້ ລາຍງານຍັງລະບຸເພີ່ມອີກວ່າ ແອສຕັນ ວິລລາ ພາຍໃຕ້ການຄຸມທີມຂອງ ສະຕີເວັນ ເຈີຣາດ ອະດີດກອງກາງຫົວຫນ້າທີມລີເວີພູລ ແລະ ອະດີດຫມູ່ຮ່ວມທີມຂອງ ຊົວເຣສ ພວມເບິ່ງເຖິງຄວາມເປັນໄປໄດ້ໃນການຄວ້າ ຊົວເຣສ ມາຮ່ວມທີມ ແລະ ຖ້າການຊື້ຂາຍນີ້ເກີດແທ້ ນອກຈາກ ຊົວເຣສ ຈະໄດ້ຮ່ວມງານກັບ ເຈີຣາດ ແລ້ວ ຍັງຈະໄດ້ຮ່ວມງານກັບ ຟີລິບເປ ຄູຕິນໂຢ ອະດີດກອງຫນ້າລີເວີພູລອີກຄັ້ງເຊັ່ນດຽວກັນ.