ທ່ານຮູ້ແລ້ວຫລືຍັງ ຄວາມໝາຍທີ່ແທ້ຈິງຂອງຂັນຫ້າ

ຂັນ 5 (ເບັນຈະຂັນ) ເປັນຫລັກທໍາໃນສາສະໜາພຸດທີ່ສອດຄ່ອງກັບເລື່ອງຂອງທຸກ ຕາມຫລັກອະລິຍະສັດ 4 ໂດຍໝາຍເຖິງກອງແຫ່ງຮູບມະທໍາ ແລະ ນາມມະທໍາທັງ 5 ທີ່ເຮັດໃຫ້ເກີດຊີວິດຂຶ້ນມາ ຫລືອາດເວົ້າໃຫ້ເຂົ້າໃຈງ່າຍວ່າ ສ່ວນປະກອບ 5 ຢ່າງທີ່ໂຮມກັນແລ້ວກໍ່ໃຫ້ເກີດເປັນຄົນ ແລະ ສັດຂຶ້ນມານັ້ນເອງ

ຂັນ 5 ປະກອບມີ:
1. ຮູບຂັນ: ໝາຍເຖິງກອງຮູບ ສ່ວນທີ່ເປັນຮ່າງກາຍ, ພຶດຕິກຳ, ລັກສະນະຕ່າງໆຂອງຮ່າງກາຍ ແລະສ່ວນປະກອບທີ່ເປັນຮູບທໍາທັງໝົດ.
2. ເວທະນາຂັນ: ໝາຍເຖິງກອງເວທະນາ ສ່ວນທີ່ເປັນຄວາມຮູ້ສືກຄືຄວາມທຸກ, ຄວາມສຸກ, ຄວາມດີໃຈ, ຄວາມພໍໃຈ.
3. ສັນຍາຂັນ: ໝາຍເຖິງກອງສັນຍາ ສ່ວນທີ່ເປັນການຈື່ຈໍາໃນອະດີດທີ່ໄດ້ຮັບ.
4. ສັງຂານຂັນ: ໝາຍເຖິງກອງສັງຂານ ສ່ວນທີ່ເປັນການຄິດປຸງແຕ່ງ ຄິດມະໂນ ໄປເອງວ່າສິ່ງນີ້ອາດຈະເກີດ ສິ່ງນັ້ນອາດຈະເກີດ.
5. ວິນຍານຂັນ: ໝາຍເຖິງກອງວິຍານ ຫລື ຈິດ ທີ່ເປັນການຮູ້ແຈ້ງເຖິງສິ່ງຕ່າງໆຜ່ານຕາ, ຫູ, ດັງ, ລີ້ນ,ກາຍ ແລະ ໃຈ.

ໂດຍຮູບຂັນຈະຈັດເປັນຮູບ ເພາະກ່ຽວກັບສ່ວນທີ່ມີໂຕຕົນ ສ່ວນເວທະນາຂັນ, ສັນຍາຂັນ, ສັງຂານຂັນ,ແລະ ວິຍາຍຂັນ ຈັດເປັນ 4 ນາມຂັນ ເຊິ່ງເປັນປະລະມັດທໍາ 4 ເປັນສ່ວນທີ່ເປັນຄວາມຄິດ ແລະ ຄວາມຮູ້ສຶກນັ້ນເອງ.
ຂັນ 5 ກ່ຽວຂ້ອງກັບຊີວິດປະຈຳວັນແນວໃດ.

ໃນຫລັກທໍາຄຳສອນ ຂັນ 5 ເນັ້ນສອນເລື່ອງສັງຂານເປັນຕົ້ນຕໍ ໂດຍໃຫ້ເບິ່ງເຫັນຄວາມເປັນຈິງຂອງສັງ ຂານວ່າ ເປັນສິ່ງທີ່ປຸງແຕ່ງຂຶ້ນມາ ບໍ່ທ່ຽງ ແລະ ກໍ່ໃຫ້ເກີດທຸກຫລາຍຢ່າງ ບໍ່ວ່າຈະເປັນຄວາມຢາກຄວາມໝັ້ນໃຈຕົນເອງ ດັ່ງນັ້ນເມຶ່ອສັງຂານເກີດຂຶ້ນມາກໍຍ່ອມມີວັນສູນສະຫລາຍໄປຕາມການເວລາ. ດັ່ງນັ້ນ ຂັນ 5 ຈຶ່ງໝາຍເຖິງກອງນາມມະທໍາ ແລະ ຮູບມະທໍາ 5 ຢ່າງທີ່ກໍ່ໃຫ້ເກີດຊີວິດຮ້ອງວ່າ ສັງຂານຂຶ້ນມາ ໂດຍ ປະກອບມີ ຮູບ, ເວທະນາ, ສັນຍາ, ສັງຂານ ແລະ ວິຍານ ທີ່ໂຮມກັນກາຍເປັນຊີວິດ ສາມາດແຍກອອກໄດ້ເປັນສ່ວນ ທີ່ເປັນ ຮູບ ຄືຮ່າງກາຍ ແລະ ສ່ວນທີ່ເປັນນາມ ຄືສ່ວນທີ່ເປັນຄວາມຄິດ ແລະ ຄວາມຮູ້ສຶກທີ່ກໍ່ໃຫ້ເກີດທຸກນັ້ນເອງ.
ຂັນທັງ 5 ຢ່າງນີ້ມີການເກີດຂຶ້ນ ຕັ້ງຢູ່ ແລະ ດັບໄປຕະຫລອດເວລາ ເຮົາບໍ່ສາມາດບັງຄັບມັນໄດ້, ແຕ່ ເຮົາສາມາດຮັບຮູ້ມັນໄດ້ ແລະ ຢູ່ກັບມັນໃຫ້ໄດ້. ສິ່ງເຫລົ່ານີ້ແມ່ນທາດແທ້ຂອງຂັນຫ້າ ຕາມຫລັກຄຳສອນຂອງພະພຸດທະເຈົ້າ. ປັດຈຸບັນ, ເຫັນຫລາຍຄົນນຳໃຊ້ ຂັນ 5 ທີ່ປະກອບດ້ວຍ ດອກໄມ້ ແລະ ທຽນ5 ຄູ່ ເພື່ອປະກອບພິທີກຳຕ່າງເຊັ່ນ: ການຂໍຂະມາ, ການນິມົນ. ທາດແທ້ຂອງການຂໍຂະມາ ໂດຍການຍົກຂັນ 5 ກາບນັ້ນແມ່ນການເອົາຂັນທັງຫ້າ ຄື ຮູບ ເວທະນາ ສັນຍາ ສັງຂານ ວິນຍານ ນອບນ້ອມໃສ່ຜູ້ທີ່ເຮົາຕ້ອງ ການຂໍຂະມາ. ສະນັ້ນ ການຂໍຂະມາ ບໍ່ຈຳເປັນຕ້ອງມີຂັນຫ້າທີ່ເປັນດອກໄມ້ 5 ຄູ່ ທຽນ 5 ຄູ່ກໍໄດ້, ສິ່ງທີ່ຄວນມີແມ່ນ ຮູບ ເວທະນາ ສັນຍາ ສັງຂານ ແລະ ວິນຍານ.