ຄໍາມ່ວນ ກຽມເນື້ອທີ່ປູກຕົ້ນໄມ້ 6 ເຮັກຕາ ໃນວັນປູກຕົ້ນໄມ້ແຫ່ງຊາດ
ໃນໂອກາດວັນປູກຕົ້ນໄມ້ແຫ່ງຊາດ 1 ມິຖຸນາ ທີ່ຈະມາເຖິງນີ້, ແຂວງຄຳມ່ວນ ກະກຽມເນື້ອທີ່ປູກຕົ້ນໄມ້ ຈຳນວນ 6 ເຮັກຕາ ໂດຍຈະປູກໄມ້ວິກ ຈໍານວນ 6.660 ເບ້ຍ ແລະ ໄດ້ປະສານສົມທົບກັບບໍລິສັດແມ່ຂອງ ປູກຕົ້ນໄມ້ ຈໍາກັດ ຢູ່ເຂດບ້ານໂພນສະອາດ ເມືອງຫີນບູນ.
ທ່ານ ສັນຕິສຸກ ພົມມະແສງ ຫົວໜ້າຂະແໜງປ່າໄມ້ ພະແນກກະສິກໍາ ແລະ ປ່າໄມ້ ແຂວງຄໍາມ່ວນໄດ້ໃຫ້ສໍາພາດຕໍ່ຜູ້ສື່ຂ່າວວ່າ: ເພື່ອຈັດຕັ້ງປະຕິບັດຕາມແຈ້ງການຂອງລັດຖະມົນຕີກະຊວງກະສິກໍາ ແລະ ປ່າໄມ້ສະບັບເລກທີ 1786/ກປ, ລົງວັນທີ 13 ພຶດສະພາ 2022 ກ່ຽວກັບການສ້າງຂະບວນການປູກຕົ້ນໄມ້ ເນື່ອງໃນວັນປູກຕົ້ນໄມ້ແຫ່ງຊາດ ປະຈໍາປີ 2022 ໃຫ້ເປັນຂະບວນການຢ່າງກວ້າງຂວາງ, ຂະແໜງປ່າໄມ້ ໄດ້ມີການເຄື່ອນໄຫວອອກແຮງງານອະນາໄມລວມຕາມສໍານັກງານອົງການ, ຕິດປ້າຍໂຄສະນາ ຫລື ຂໍ້ຄວາມກ່ຽວກັບວັນປູກຕົ້ນໄມ້ແຫ່ງຊາດ, ໄດ້ຜັນຂະຫຍາຍເນື້ອໃນແຈ້ງການຂອງກະຊວງກະສິກໍາ ແລະ ປ່າໄມ້ລົງສູ່ບັນດາເມືອງ ແລະ ຫ້ອງການກະສິກໍາ-ປ່າໄມ້ໃນ 10 ຕົວເມືອງທີ່ຂຶ້ນກັບແຂວງ. ພ້ອມນັ້ນ, ກໍໄດ້ມີການກະກຽມໃນດ້ານກໍາລັງຄົນ ພ້ອມທັງແບ່ງຄວາມຮັບຜິດຊອບໃຫ້ແຕ່ລະສະຫາຍພາຍໃນຂະແໜງ ເພື່ອລົງປະສານສົມທົບໃນແຕ່ລະເມືອງເພື່ອເຮັດໃຫ້ວຽກງານເປັນຂະບວນຟົດຟື້ນ.
ສໍາລັບແຜນການເກັບແກ່ນເບ້ຍໄມ້ປະຈໍາປີ 2022 ຕາມແຜນການແມ່ນໃຫ້ໄດ້ 600 ກິໂລ, ມາຮອດປັດຈຸບັນ ປະຕິບັດໄດ້ 823,26 ກິໂລ ເທົ່າກັບ 137% (ລື່ນແຜນການ 37%), ພາກລັດໄດ້ 40,16 ກິໂລ ແລະ ປະຊາຊົນໄດ້ 744,10 ກິໂລ; ວຽກກ້າເບ້ຍໄມ້ຕາມແຜນການໃຫ້ໄດ້ 653.600 ເບ້ຍ, ປະຕິບັດໄດ້ 3.638.500 ເບ້ຍ. ໃນນັ້ນ, ພາກລັດໄດ້ 2.700 ເບ້ຍ (ໄມ້ດູ່ ແລະ ແຕ້ຂ່າ), ປະຊາຊົນໄດ້ 278.800 ເບ້ຍ (ຢາງພາລາ), ບໍລິສັດໄດ້ 3.350.000 ເບ້ຍ (ໄມ້ວິກ). ດ້ານວຽກປູກໄມ້ຕາມແຜນການທົ່ວແຂວງໃຫ້ໄດ້ 1.139 ເຮັກຕາ, ມີແຜນປູກແລ້ວໃນວັນທີໃນວັນທີ 1 ມິຖຸນາ 2022 ທົ່ວແຂວງມີ 10 ເຮັກຕາ, ປະຊາຊົນ 2 ເຮັກຕາ, ບໍລິສັດ 8 ເຮັກຕາ.
ໂອກາດນີ້, ທ່ານ ສັນຕິສຸກ ພົມມະແສງ ກໍໄດ້ຮຽກຮ້ອງມາຍັງຜູ້ປະກອບການ,ນັກທຸລະກິດຕະຫລອດເຖິງປະຊາຊົນລາວບັນດາເຜົ່າ ຈົ່ງໄດ້ເຂົ້າມີສ່ວນຮ່ວມໃນການປູກຕົ້ນໄມ້ ແຕ່ມື້ນີ້ເປັນຕົ້ນໄປ ເພື່ອເລັ່ງໃສ່ຍຸດທະສາດປ່າໄມ້ຮອດປີ 2025 ໃຫ້ມີຄວາມປົກຫຸ່ມ 70% ໃນຂອບເຂດພື້ນທີ່ທົ່ວປະເທດ ຕາມແຜນນະໂຍບາຍທີ່ລັດຖະບານໄດ້ວາງໄວ້. ພາຍຫລັງທີ່ປູກແລ້ວ ໃຫ້ທຸກພາກສ່ວນ ທັງພາກລັດ ແລະ ເອກະຊົນ, ບັນດາຜູ້ປະກອບການທຸລະກິດ, ປະຊາຊົນບັນດາເຜົ່າ ພ້ອມກັນເອົາໃຈໃສ່ບົວລະບັດຮັກສາ ເພື່ອເຮັດໃຫ້ຕົ້ນໄມ້ ທີ່ພວກເຮົາໄດ້ລົງທຶນປູກ ງອກງາມ ແລະ ຈະເລີນເຕີບໂຕ.
