ລາວ ເປີດນໍາໃຊ້ລະບົບແຈ້ງພາສີປະຕູດຽວແຫ່ງຊາດຢູ່ດ່ານພາສີສາກົນບໍ່ເຕັນ
May 25, 2022 - 10:41 AM
ດ່ານພາສີສາກົນບໍ່ເຕັນ ແຂວງຫລວງນໍ້າທາ ໄດ້ເປີດນໍາໃຊ້ລະບົບແຈ້ງພາສີປະຕູດຽວແຫ່ງຊາດ ເຂົ້າສູ່ການຄຸ້ມຄອງນໍາເຂົ້າ-ສົ່ງອອກສິນຄ້າຢ່າງເປັນທາງການໃນວັນທີ 23 ພຶດສະພານີ້ ເຊິ່ງເຮັດໃຫ້ຂະແໜງ ການພາກລັດ ແລະ ພາກທຸລະກິດການນໍາເຂົ້າ, ສົ່ງອອກ ແລະ ການຂົນສົ່ງສິນຄ້າຜ່ານແດນປະຕິບັດຂັ້ນຕອນການຂໍອະນຸຍາດ, ການອອກໃບອະນຸຍາດຕາມລະບຽບກົດໝາຍຂອງແຕ່ລະຂະແໝງການທີ່ກ່ຽວຂ້ອງໃຫ້ຖືກຕ້ອງຕາມລະບຽບການຂອງກົມນໍາເຂົ້າ ແລະ ສົ່ງອອກຢ່າງມີສະຖຽນລະພາບ ທັງເປັນການເພີ່ມທະວີອໍານວຍຄວາມສະດວກທາງການຄ້າໃນການຫັນເປັນທັນສະໄໝ.
ທ່ານນາງ ອິນທະສອນ ໄຊຍະນາສີ ຜູ້ປະສານງານລະບົບແຈ້ງພາສີປະຕູດຽວ ຮຽກຮ້ອງທຸກພາກສ່ວນນຳໃຊ້ລະບົບແຈ້ງພາສີປະຕູດຽວ ເພື່ອພັດທະນາລະບົບດັ່ງກ່າວສໍາເລັດຕາມແຜນການ ແລະ ສາມາດຮັບໃຊ້ວິຊາສະເພາະຂອງແຕ່ລະຂະແໜງການລັດ ແລະ ບັນດາຜູ້ປກອບການນໍາເຂົ້າສົ່ງອອກສິນຄ້າທີ່ກ່ຽວ ຂ້ອງຢ່າງມີປະສິດທິຜົນສູງສຸດ.
