ຝີຕຸ່ມລີງລະບາດແລ້ວໃນ 15 ປະເທດ WHO ຄາດ ພົບຜູ້ຕິດເຊື້ອເພີ່ມຂຶ້ນ ຈາກການກວດສອບເພີ່ມໃນຫລາຍປະເທດ
ອົງການອະນາໄມໂລກ (WHO) ເປີດເຜີຍຄວາມຄືບໜ້າສະຖານະການແພ່ລະບາດຂອງພະຍາດຝີຕຸ່ມລີງ ໂດຍພົບວ່າການລະບາດກຳລັງຄ່ອຍໆປາກົດຂຶ້ນ ແລະ ຄາດວ່າຈະພົບຜູ້ຕິດເຊື້ອພະຍາດນີ້ເພີ່ມຂຶ້ນ ຈາກການຂະຫຍາຍການກວດສອບ ແລະ ເຝົ້າລະວັງໃນຫລາຍປະເທດທີ່ຍັງບໍ່ພົບການລະບາດ.
ຈົນຮອດປັດຈຸບັນມີລາຍງານຈຳນວນຜູ້ຕິດເຊື້ອແລ້ວຫລາຍກວ່າ 100 ຄົນ ໃນ 15 ປະເທດ ທັງຢູ່ເອີຣົບ, ອາເມລິກາ, ການາດາ ແລະ ອົດສະຕຣາລີ ໂດຍອິດສະລາແອນ, ສະວິດ ແລະ ໂອຕຣິດ ເປັນ 3 ປະເທດຫລ້າສຸດທີ່ມີລາຍງານຢືນຢັນການລະບາດ ເຊິ່ງຢູ່ອິດສະລາແອນ ແລະ ສະວິດພົບຜູ້ຕິດເຊື້ອ 1 ຄົນ ທີ່ເດີນທາງໄປຕ່າງປະເທດເມື່ອບໍ່ດົນມານີ້.
ຂະນະທີ່ WHO ລະບຸວ່າ: ຈາກຂໍ້ມູນທີ່ມີຢູ່ສະແດງໃຫ້ເຫັນວ່າການຕິດຕໍ່ຈາກຄົນສູ່ຄົນນັ້ນເກີດຂຶ້ນໃນກຸ່ມຄົນທີ່ມັກສຳຜັດໃກ້ຊິດກັບຜູ້ຕິດເຊື້ອທີ່ມີອາການ ເຊິ່ງ WHO ກຳລັງດຳເນີນງານເພື່ອໃຫ້ຂໍ້ແນະນຳໃນການປ້ອງກັນບຸກຄະລາກອນທາງການແພດ ແລະ ເຈົ້າໜ້າທີ່ໃນແນວໜ້າທີ່ມີຄວາມສ່ຽງເຊັ່ນ: ພະນັກງານອະນາໄມ.
ສຳລັບພະຍາດຝີຕຸ່ມລີງນັ້ນບໍ່ມີທ່າອ່ຽງຈະແພ່ລະບາດຈາກຄົນສູ່ຄົນໄດ້ງ່າຍ ແລະ ອາການນັ້ນມັກບໍ່ຮຸນແຮງ ເຊິ່ງປະຊາຊົນທີ່ຕິດເຊື້ອມັກຈະເຊົາພາຍໃນ 2 ຫາ 4 ອາທິດ ໂດຍບໍ່ຕ້ອງໄປປິ່ນປົວຢູ່ໂຮງໝໍ, ແຕ່ບາງຄົນມີອາການຮຸນແຮງເຖິງຂັ້ນເສຍຊີວິດໄດ້.
ຜ່ານມາການແພ່ລະບາດຂອງໄວຣັສຊະນິດນີ້ພົບເລື້ອຍໃນພື້ນທີ່ຫ່າງໄກຂອງອາຟຣິກາກາງ ແລະ ອາຟຣິກາຕາເວັນຕົກ. ຂະນະທີ່ການລະບາດທີ່ເກີດຈາກການສຳຜັດໃກ້ຊິດທາງຮ່າງກາຍ ເຮັດໃຫ້ການຄວບຄຸມ ແລະ ປ້ອງກັນການລະບາດສາມາດເຮັດໄດ້ຂ້ອນຂ້າງງ່າຍ ດ້ວຍມາດຕະການຕ່າງໆເຊັ່ນ: ການແຍກກັກຕົວ ຫລື ປະຕິບັດຕາມຫລັກສຸຂະອະນາໄມ.
ເຖິງຢ່າງໃດກໍຕາມ, ທ່ານ ເດວິດ ເຮແມນ (David Heymann) ນັກລະບາດວິທະຍາຂອງ WHO ເປີດເຜີຍວ່າ: “ສິ່ງທີ່ເບິ່ງວ່າກຳລັງເກີດຂຶ້ນໃນຕອນນີ້ ຄືມັນໄດ້ລະບາດສູ່ປະຊາຊົນໃນຮູບແບບທາງເພດ ຫລື ທາງອະໄວຍະວະເພດ ແລະ ກຳລັງແພ່ລະບາດເຊັ່ນດຽວກັບພະຍາດຕິດຕໍ່ທາງເພດສຳພັນ ເຊິ່ງມີການຂະຫຍາຍການລະບາດໄປທົ່ວໂລກ”.
ອ້າງອີງ:
- https://www.bbc.com/news/health-61540474
- https://www.aljazeera.com/news/2022/5/22/who-expects-more-cases-of-monkeypox-to-emerge-globally
- https://thenewdaily.com.au/news/world/2022/05/23/monkeypox-switzerland-austria-israel/
- https://www.who.int/emergencies/disease-outbreak-news/item/2022-DON385
