ປະກາດການຈັດຕັ້ງຄະນະບໍລິຫານງານ ສະພາວິຊາຊີບນັກບັນຊີ ແລະ ນັກກວດສອບ

ໃນວັນທີ 18 ພຶດສະພາ 2022 ຜ່ານມານີ້, ໄດ້ຈັດພິທີປະກາດການຈັດຕັ້ງຄະນະບໍລິຫານງານສະພາວິຊາຊີບນັກບັນຊີ ແລະ ນັກກວດສອບ (ສວ-ບກລ) ແລະ ມອບຮັບໜ້າທີ່ປະທານສະພາວິຊາຊີບນັກບັນຊີ ແລະ ນັກກວດສອບລະຫວ່າງຜູ້ເກົ່າ ແລະ ຜູ້ໃໝ່.

ໂດຍການເປັນກຽດເຂົ້າຮ່ວມເປັນປະທານຂອງທ່ານ ປອ ພູທະນູເພັດ ໄຊສົມບັດ ຮອງລັດຖະມົນຕີກະ ຊວງການເງິນ, ມີທ່ານ ນາງ ດາວອນ ທອງຈັນ ຫົວໜ້າກົມຄຸ້ມຄອງການບັນຊີ ກະຊວງການເງິນ, ມີຄະນະບໍລິຫານງານສະພາວິຊາຊີບນັກບັນຊີ ແລະ ນັກກວດສອບ, ພ້ອມດ້ວຍພະນັກງານວິຊາການສະພາວິຊາຊີບນັກບັນຊີ ແລະ ນັກກວດສອບເຂົ້າຮ່ວມ.

ໃນພິທີໄດ້ຜ່ານຂໍ້ຕົກລົງ ສະບັບເລກທີ 1264/ກງ, ລົງວັນ 10 ພຶດສະພາ 2022 ວ່າດ້ວຍການແຕ່ງຕັ້ງຄະນະບໍລິຫານງານຊຸດໃໝ່ຂອງສະພາວິຊາຊີບນັກບັນຊີ ແລະ ນັກກວດສອບ, ຊຶ່ງປະກອບດ້ວຍ 9 ທ່ານ, ໂດຍ ເຫັນດີແຕ່ງຕັ້ງ: ທ່ານ ສອນໄຊ ສີລາເພັດ ຈາກບໍລິສັດ SKNP ເປັນປະທານ, ທ່ານ ບຸນເຫຼືອ ດາວວິໄລ ຈາກກົມຄຸ້ມຄອງການບັນຊີ ກະຊວງການເງິນ ເປັນຮອງປະທານ, ທ່ານ ຄໍາປິວ ທິບພະວົງພັນ ຈາກບໍລິສັດທີ່ປຶກສາ ແລະ ບໍລິການ ແອັກມິນ ຈໍາກັດຜູ້ດຽວ ເປັນຮອງປະທານ.

ທ່ານ ສົມຈິດ ອິນທິລາດວົງສີ ຈາກສະຖາບັນການເງິນ-ການບັນຊີ, ທ່ານ ນາງມະນີສຸກ ໄຊຍະວົງສາ ຈາກບໍລິສັດ ເອເອເອັສ ຈໍາກັດ, ທ່ານ ພອນມະນີ ສີສົມພົງ ຈາກບໍລິສັດຈະເລີນເຊກອງພະລັງງານ ຈໍາກັດຜູ້ດຽວ, ທ່ານ ນາງ ປັນຍາທິບ ວົງສຸລິ ຈາກບໍລິສັດ BSP Leasing Lao ຈໍາກັດ, ທ່ານ ນາງ ຄໍາແຫວນ ຈິນດາວົງ ຈາກບໍລິສັດ ເອັສພີເຄ ຈໍາກັດ ແລະ ທ່ານ ນາງ ມະໄລພອນ ບີຈາລັນ ຈາກບໍລິສັດ FREEBALANCE Inc ປະເທດການາດາ ເປັນກຳມະການ.

ພ້ອມດຽວກັນນີ້, ຍັງໄດ້ມອບ-ຮັບໜ້າທີ່ປະທານສະພາວິຊາຊີບນັກບັນຊີ ແລະ ນັກກວດສອບ, ລະຫວ່າງທ່ານ ປອ ນາງ ພິລານີ ພິດສະໄໝ ປະທານສະພາວິຊາຊີບນັກບັນຊີ ແລະ ນັກກວດສອບຜູ້ເກົ່າ ແລະ ທ່ານ ສອນໄຊ ສີລາເພັດ ປະທານສະພາວິຊາຊີບນັກບັນຊີ ແລະ ນັກກວດສອບຜູ້ໃໝ່, ເພື່ອສືບຕໍ່ຊີ້ນໍາວຽກງານຄະນະບໍລິຫານງານສະພາວິຊາຊີບນັກບັນຊີ ແລະ ນັກກວດສອບ, ໃຫ້ມີບົດບາດສໍາຄັນໃນການປະກອບສ່ວນຢ່າງຕັ້ງໜ້າເຂົ້າໃນການປັບປຸງບັນດານິຕິກຳ,ກໍ່ສ້າງນັກຊ່ຽວຊານບັນຊີ, ເພື່ອຕອບສະໜອງຄວາມຮຽກຮ້ອງຕ້ອງການຂອງສັງຄົມ ແລະ ເປັນເສນາທິການຊ່ວຍວຽກໃຫ້ແກ່ກະຊວງການເງິນໃນການພັດທະນາວິຊາຊີບການບັນຊີ ແລະ ກວດສອບໃຫ້ມີຄຸນນະ ພາບເທົ່າທຽມກັບພາກພື້ນ ແລະ ສາກົນ.

ໃນໂອກາດນີ້, ທ່ານ ປອ ພູທະນູເພັດ ໄຊສົມບັດ ຮອງລັດຖະມົນຕີກະຊວງການເງິນ, ໄດ້ຕີລາຄາສູງ ແລະ ຊົມເຊີຍຕໍ່ກັບຜົນການດຳເນີນການເຄື່ອນໄຫວວຽກງານຂອງສະພາວິຊາຊີບນັກບັນຊີ ແລະ ນັກກວດສອບໃນໄລຍະຜ່ານມາ, ພ້ອມທັງໄດ້ໃຫ້ທິດຊີ້ນໍາໂອ້ລົມກັບບັນດາຄະນະບໍລິຫານງານຊຸດໃໝ່, ເພື່ອນໍາໄປເປັນແນວທາງປັບປຸງພັດທະນາວິຊາຊີບການບັນຊີໃນຕໍ່ໜ້າໃຫ້ດີຂຶ້ນເທື່ອລະກ້າວ, ເປັນການປະກອບສ່ວນຊ່ວຍພັດທະນາວິຊາຊີບການບັນຊີ ແລະ ກວດສອບໃຫ້ເຂັ້ມແຂງ.