ອັບອາຍຜົນງານບໍ່ດີ, ແມນຢູ ຍົກເລີກຈັດງານມອບລາງວັນປະຈຳປີຂອງສະໂມສອນ

ສື່ໃນອັງກິດ ລາຍງານວ່າ : ແມນເຊສເຕີ ຢູໄນເຕັດ ໄດ້ຍົກເລີກຈັດງານມອບລາງວັນປະຈຳປີຂອງສະໂມສອນຕາມຄຳຮຽກຮ້ອງຂອງນັກເຕະໃນທີມ ຫລັງເຮັດຜົນງານໄດ້ຕົກຕຳ່ໃນລະດູການນີ້.

ສຳລັບ ແມນເຊສເຕີ ຢູໄນເຕັດ ໂຊຟອມໄດ້ຫນ້າຜິດຫວັງໃນລະດູການນີ້ ດ້ວຍການບໍ່ສາມາດຄວ້າແຊ໊ມລາຍການໃດໆມາຄອງໄດ້ເລີຍ ລວມໄປເຖິງພາດໄປຫລິ້ນໃນບານເຕະຢູຟາ ແຊ໊ມປຽນລີກ ລະດູການໜ້າ.

ນອກຈາກນັ້ນແລ້ວ ແມນຢູ ທີ່ປັດຈຸບັນຢູ່ໃນອັນດັບ 6 ຂອງຕາຕະລາງສ່ຽງທີ່ຈະຖືກ ເວສແຮມ ຢູໄນເຕັດ ແຊງຄວ້າໂຄຕ້າໄປຫລິ້ນຢູໂຣປາ ລີກ ລະດູການຫນ້າໃນເກມສຸດທ້າຍນຳອີກ.

ຈາກຜົນງານທີ່ເກີດຂຶ້ນເຮັດໃຫ້ຫລ້າສຸດ ສື່ໃນອັງກິດ ລະບຸວ່າ ແມນເຊສເຕີ ຢູໄນເຕັດ ໄດ້ຍົກເລີກການຈັດງານມອບລາງວັນປະຈຳປີຂອງສະໂມສອນ ທີ່ຈະມີການມອບລາງວັນນັກເຕະດີເດ່ັນແຫ່ງປີ, ນັກເຕະທີມສຳຮອງດີເດັ່ນແຫ່ງປີ ແລະ ນັກເຕະທີມເຍົາວະຊົນດີເດ່ັນແຫ່ງປີ ເປັນຕົ້ນ ຕາມການຮຽກຮ້ອງຂອງນັກເຕະໃນທີມ ທີ່ອັບອາຍເກີນກວ່າຈະຈັດງານດັ່ງກາວໄດ້.

ທັງນີ້ ບໍ່ວ່າລະດູການຈະຈົບລົງແນວໃດ ແມນຢູ ຈະເຮັດສະຖິຕິເກັບຄະແນນໄດ້ຫນ້ອຍທີ່ສຸດນັບຕັ້ງແຕ່ພວກເຂົາລົງແຂ່ງຂັນໃນພຣີເມຍລີກ ນັບຕັ້ງແຕ່ລະດູການ 1992-93.