ປະຊາຊົນລາວ ຖືກເຄາະຮ້າຍເສຍຊີວິດຈາກລະເບີດບໍ່ທັນແຕກ 40 ຄົນ/ປີ

ພັນໂທ ຄອນແກ້ວ ອໍລະດົມ ຫົວໜ້າການທະຫານກອງກວດກູ້ລະເບີດເພື່ອມະນຸດສະທຳ 58 ລາຍງານເມື່ອບໍ່ດົນນີ້ວ່າ: ຊຸມປີຜ່ານມາ, ປະຊາຊົນ ຖືກເຄາະຮ້າຍຈາກລະເບີດບໍ່ທັນແຕກທີ່ຕົກຄ້າງແຕ່ປາງສົງຄາມຢູ່ສປປ ລາວ ສະເລ່ຍ 40 ຄົນຕໍ່ປີເນື່ອງຈາກ ລະຫວ່າງຊຸມປີ 1964-1973, ເຮືອບິນຂອງອາເມລິກາ ໄດ້ຂົນລະເບີດມາຖິ້ມໃສ່ແຜ່ນດິນລາວຫລາຍກວ່າ 580.000 ຖ້ຽວ, ບັນຈຸລູກລະເບີດເກືອບ 3 ລ້ານໂຕນ ໃນນີ້ມີລະເບີດລູກຫວ່ານ 270 ລ້ານໜ່ວຍ ແລະ ຊະນິດອື່ນໆໂດຍໃນຈຳນວນນີ້ ຍັງມີລູກລະເບີດ 30% ຍັງບໍ່ທັນແຕກ ແລະ ຢັ່ງຢາຍຢູ່ພື້ນທີ່ຕ່າງໆໃນທົ່ວປະເທດ.

ຫລັງສົງຄາມສິ້ນສຸດລົງ, ປະຊາຊົນລາວ ບາດເຈັບ ແລະ ເສຍຊີວິດຫລາຍກວ່າ 50.000 ຄົນ ແລະ ຫລາຍຄົນກາຍເປັນຄົນພິການຖາວອນ. ປັດຈຸບັນ, ຍັງມີປະຊາຊົນຈຳນວນໜຶ່ງຮູ້ເທົ່າບໍ່ເຖິງການ ເມື່ອພົບເຫັນລະເບີດແລ້ວກໍທຳລາຍມັນດ້ວຍຕົນເອງເຮັດໃຫ້ລະເບີດແຕກໃສ່ສົ່ງຜົນໃຫ້ມີຜູ້ເສຍຊີວິດ ແລະ ພິການເພີ່ມຂຶ້ນແຕ່ລະປີ.

ພັນໂທ ຄອນແກ້ວ ກ່າວອີກວ່າ: ແຂວງທີ່ມີລະເບີດຫລາຍກວ່າໝູ່ແມ່ນແຂວງຊຽງຂວາງ, ສະຫວັນນະເຂດ ແລະ ແຂວງສາລະວັນຕາມລໍາດັບ; ນອກນັ້ນ, ບາງເຂດບໍ່ມີຂໍ້ມູນການຖິ້ມລະເບີດ, ແຕ່ພົບເຫັນລະ ເບີດບໍ່ທັນແຕກ ໂດຍສະເພາະຢູ່ເຂດເມືອງສັງທອງ ແລະ ເມືອງປາກງື່ມນະຄອນຫລວງວຽງຈັນ. ຈາກການເຫັນໄດ້ໄພອັນຕະລາຍຈາກລູກລະເບີດບໍ່ທັນແຕກ, ພັກ-ລັດຖະບານ ໄດ້ເອົາໃຈໃສ່ຊີ້ນຳກອງກວດກູ້ລະເບີດເພື່ອມະນຸດສະທຳ 58 ກຳນົດເອົາຂົງເຂດກະສິກຳເປັນບູລິມະສິດ ໂດຍສະເພາະຢູ່ເມືອງຄຳເກີດ ແຂວງບໍລິຄຳໄຊ ແລະ ບາງເຂດຂອງແຂວງວຽງຈັນເພື່ອບໍ່ໃຫ້ກະສິກອນເປັນຜູ້ຖືກເຄາະຮ້າຍ.