ການລະບາດຂອງຕັກແຕນຢູ່ 5 ແຂວງພາກເໜືອເຮັດໃຫ້ເນື້ອທີ່ການຜະລິດຖືກກະທົບ 6.200  ກວ່າເຮັກຕາ

ກະຊວງກະສິກໍາ ແລະ ປ່າໄມ້ ໃຫ້ຮູ້ວ່າ: ການຄວບຄຸມການລະບາດຂອງຕັກແຕນໃນ 5 ແຂວງພາກເໜືອ, 42 ເມືອງ, 399 ບ້ານ, 973 ຈຸດ ຄາດວ່າຈະມີເນື້ອທີ່ການຜະລິດໄດ້ຮັບກະທົບປະມານ 6.200 ກວ່າເຮັກຕາ, ປັດຈຸບັນສາມາດສີດຢາກໍາຈັດໂຕອ່ອນສໍາເລັດໃນ 24 ເມືອງ, 183 ບ້ານ, 614 ຈຸດໃນເນື້ອທີ່ປະມານ 1,500 ກວ່າເຮັກຕາ, ໂດຍລັດຖະບານໄດ້ອະນຸມັດງົບປະມານ 11,4 ຕື້ກີບ ເພື່ອນໍາໃຊ້ເຂົ້າໃນວຽກງານດັ່ງກ່າວໃຫ້ມີປະສິດທິຜົນ.

ກະຊວງກະສິກໍາ ແລະ ປ່າໄມ້ ໃຫ້ຮູ້ອີກວ່າ: ມາຮອດປັດຈຸບັນທົ່ວປະເທດສາມາດປັກດໍານາປີຂອງຕົນສໍາເລັດແລ້ວ 747.830 ເຮັກຕາ, ເທົ່າກັບ 91% ຂອງແຜນການ, ໃນນັ້ນສະເພາະນະຄອນຫລວງວຽງຈັນສາມາດປັກດໍາແລ້ວ 47.298 ເຮັກຕາເທົ່າກັບ 90% ຂອງແຜນການ ແລະ ເຂດຈຸດສຸມອື່ນໆ 1.466 ເຮັກຕາເທົ່າກັບ 92% ຂອງແຜນການ. ສໍາລັບການປູກພືດລະດູຝົນບັນລຸໄດ້ແລ້ວ 294,978 ເຮັກຕາເທົ່າກັບ 39% ຂອງແຜນການວາງໄວ້.