ລາວ-ຫວຽດນາມ ແລກປ່ຽນບົດຮຽນດ້ານເສດຖະກິດ ແລະ ການເຕີບໂຕສີຂຽວ

ວັນທີ 12 ພິດສະພາ 2022 ທີ່ຜ່ານມາ, ທ່ານນາງ ບຸນຄຳ ວໍລະຈິດ ລັດຖະມົນຕີກະຊວງຊັບພະຍາກອນທຳມະຊາດ ແລະສິ່ງແວດ ລ້ອມ, ທ່ານ ເຈິນ ເຖາະ ດັດ (Tran Tho Dat)ປະທານຄະນະກຳມະການຄົ້ນຄວ້າວິຊາການ ມຊຫວຽດ ນາມ ແລະ ທ່ານ ດິງ ດຶກ ເຈືອງ (Dinh Duc Truong)ຄະນະບໍດີຄະນະສິ່ງແວດລ້ອມ, ການປ່ຽນແປງ ດິນຟ້າອາກາດ ແລະ ການພັດທະນາຕົວເມືອງ ມຊ ຫວຽດນາມ ໄດ້ແລກປ່ຽນບົດຮຽນຮ່ວມກັນໃນຫົວຂໍ້ “ເສດຖະກິດສີຂຽວ ແລະ ການເຕີບໂຕສີຂຽວ” ໂດຍສອງຝ່າຍໄດ້ສະເໜີການຈັດຕັ້ງປະຕິບັດບັນດານະໂຍ ບາຍ ແລະ ການ ປະຕິບັດຕົວຈິງກ່ຽວກັບເສດຖະກິດສີຂຽວ ແລະ ການເຕີບໂຕສີຂຽວ ໃນໄລຍະຜ່ານມາພ້ອມທັງໄດ້ແລກປ່ຽນວິຊາການຮ່ວມກັນ ເປັນຕົ້ນຄວາມກ້າວໜ້າ, ຂໍ້ສະດວກ, ຂໍ້ຫຍຸ້ງຍາກ ແລະໂອກາດ ການຈັດຕັ້ງປະຕິບັດວຽກງານຮ່ວມກັນໃນອະນາຄົດ.

ທ່ານນາງ ບຸນຄຳ ວໍລະຈິດ ເນັ້ນໃຫ້ທັງ 2 ຝ່າຍຮ່ວມກັນສຶກສາ ແລະ ຄົ້ນຄວ້າການພັດທະນາສີຂຽວ, ສະອາດ ແລະ ຍືນຍົງ ເພື່ອຊ່ວຍເຮັດໃຫ້ນະໂຍບາຍການພັດທະນາຕາມທິດສີຂຽວ ແລະ ຍືນຍົງຂອງ ສປປ ລາວ ສາມາດຈັດຕັ້ງປະຕິບັດຕົວຈິງໄດ້ໃນອະນາຄົດ.