ທ່ານ ບຸນໂຈມ ອຸບົນປະເສີດ ເຂົ້າຮ່ວມກອງປະຊຸມທາງໄກລັດຖະມົນຕີການເງິນອາຊຽນ ແລະ ຜູ້ວ່າການທະນາຄານກາງອາຊຽນ

ໃນວັນທີ 12 ພຶດສະພາ 2022 ຜ່ານມານີ້, ທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນ ພ້ອມດ້ວຍຄະນະໄດ້ເຂົ້າຮ່ວມກອງປະຊຸມທາງໄກລັດຖະມົນຕີການເງິນອາຊຽນ ແລະ ຜູ້ວ່າການທະນາຄານກາງອາຊຽນ+3 ຄັ້ງທີ 25 (25th AFMGM+3), ໂດຍການເປັນປະທານຮ່ວມຂອງທ່ານ ຮອງນາຍົກ, ລັດຖະມົນຕີການເງິນກຳປູເຈຍ ແລະ ລັດຖະມົນຕີການເງິນ ສປ ຈີນ; ມີລັດຖະມົນຕີການເງິນ, ຜູ້ວ່າການທະນາຄານກາງຈາກປະເທດສະມາຊິກອາຊຽນ+3, ພ້ອມດ້ວຍບັນດາຜູ້ແທນຈາກອົງການຈັດຕັ້ງສາກົນທີ່ກ່ຽວຂ້ອງເຂົ້າຮ່ວມ.

ກອງປະຊຸມໄດ້ແລກປ່ຽນຄໍາຄິດເຫັນກ່ຽວກັບສະພາບເສດຖະກິດໂລກ ແລະ ປຶກສາຫາລືດ້ານນະໂຍບາຍຂອງພາກພື້ນ (Economic Review and Policy Dialogue) ແລະ ສືບຕໍ່ປຶກສາຫາລືວຽກບູລິມະສິດການສ້າງຄວາມເຂັ້ມແຂງການຮ່ວມມືດ້ານການເງິນອາຊຽນ+3 (ASEAN+3 Financial Cooperation Process), ບັນຫາທີ່ສໍາຄັນດັ່ງກ່າວແມ່ນໄດ້ຄົ້ນຄວ້າປຶກສາຫາລືດ້ານວິຊາການເອກະພາບກັນຂັ້ນພື້ນຖານໃນກອງປະຊຸມ ASEAN+3 ຄັ້ງວັນທີ 1 ເມສາ 2022 ແລະ ໄດ້ນໍາມາສະເໜີເພື່ອຮັບຮອງໃນກອງປະຊຸມລະດັບສູງໃນວັນທີ 12 ພຶດສະພາ 2022.

ກອງປະຊຸມ ໄດ້ຮັບຟັງການລາຍງານການຕີລາຄາສະພາບເສດຖະກິດມະຫາພາກ ແລະ ການໃຫ້ຄໍາແນະນໍາດ້ານນະໂຍບາຍສຳພື້ນອາຊຽນ+3, ຊຶ່ງນໍາສະເໜີໂດຍກອງທຶນສາກົນ (IMF), ທະນາຄານພັດທະນາອາຊີ (ADB), ອົງການຕິດຕາມເສດຖະກິດມະຫາພາກອາຊຽນ+3 (AMRO). ໂດຍລວມເຫັນວ່າສະພາບໃນປີ 2022, ການຄາດຄະເນເສດຖະກິດພາກພື້ນອາຊຽນ+3 ແມ່ນຂະຍາຍຕົວຢູ່ໃນລະດັບ 4,7 ສ່ວນຮ້ອຍ ແລະ ອັດຕາເງິນຟີ້ຢູ່ໃນລະດັບ 3,5ສ່ວນຮ້ອຍ; ເຖິງແມ່ນວ່າຈະມີທິດທາງການເຕີບໂຕທີ່ຂ້ອນຂ້າງດີໃນໄລຍະຜ່ານມາພາຍຫຼັງທີ່ນໍາໃຊ້ມາດຕະການ ແລະ ນະໂຍບາຍທີ່ເຂັ້ມງວດ, ແຕ່ເນື່ອງຈາກສະພາບໂຄວິດທີ່ຍັງສືບຕໍ່ລະບາດ ແລະ ສະພາບດ້ານການເມືອງເຮັດໃຫ້ຫລາຍປະເທດສະມາຊິກອາດຈະຍັງໄດ້ຮັບຜົນກະທົບທາງດ້ານເສດຖະກິດ, ການຄ້າ ແລະ ການລົງທຶນ, ລວມທັງກະແສການເໜັງຕິງຄ່າເງິນເຟີ້ທີ່ມີທ່ອ່ຽງສູງຂຶ້ນ. ຕໍ່ບັນຫາດັ່ງກ່າວ,ປະເທດສະມາຊິກອາຊຽນ+3 ກໍໄດ້ໃຫ້ຄໍາໝັ້ນສັນຍາ ແລະ ສະເໜີໃຫ້ສືບຕໍ່ເພີ່ມທະວີການຮ່ວມມືກັນດ້ານການເງິນຂອງພາກພື້ນ ເພື່ອພ້ອມກັນຂ້າມຜ່ານຄວາມຫຍຸ້ງຍາກທາງດ້ານເສດຖະກິດຮ່ວມກັນ.

ກອງປະຊຸມໄດ້ຮັບຮອງແຜນງົບປະມານ ແລະ ບຸກຄະລາກອນສົກປີ 2023 ຂອງອົງການຕິດຕາມເສດຖະກິດມະຫາພາກອາຊຽນ+3 (AMRO), ໄດ້ເຫັນດີຕໍ່ການທົບທວນແຜນທິດທາງຍຸດທະສາດພາຍໃຕ້ວິໄສທັດຮອດປີ 2030 ເພື່ອຍົກສູງຂີດຄວາມສາມາດທາງດ້ານບຸກຄະລາກອນຂອງອົງການAMRO. ທີ່ສໍາຄັນກອງປະຊຸມໄດ້ຍ້ອງຍໍຊົມເຊີຍການປະຕິບັດໜ້າທີ່ຂອງຜູ້ອຳນວຍການ AMRO ຜູ້ເກົ່າ, ທີ່ຈະໝົດວ່າລະໃນເດືອນ ພຶດສະພາ 2022 ແລະ ກ່າວຕ້ອນຮັບຜູ້ອຳນວຍການອົງການ AMROຜູ້ໃໝ່ທີ່ໄດ້ຮັບການເລືອກຕັ້ງຈະເຂົ້າມາດໍາລົງຕໍາແໜ່ງປະຕິບັດໜ້າທີ່ປ່ຽນແທນ, ຊຶ່ງກອງປະຊຸມກໍເຊື່ອໝັ້ນໃນການສືບຕໍ່ບໍລິຫານ ແລະ ຄຸ້ມຄອງອົງການ AMRO ໃຫ້ເຂັ້ມແຂງຂຶ້ນຕາມເປົ້າໝາຍ. ໄດ້ສະແດງສະໜັບສະໜູນຕໍ່ກັບບັນດາການຄົ້ນຄວ້າວຽກງານການສ້າງກົນໄກການກູ້ຢືມ ພາຍໃຕ້ຂໍ້ລິເລີ່ມຊຽງໃໝ່ເປັນກົນໄກຫຼາຍຝ່າຍ (CMIM), ເພື່ອຮັບໃຊ້ໃນວຽກງານການແກ້ໄຂສະພາບຄ່ອງເງິນຕາຕ່າງປະເທດແລະດຸນຊໍາລະເງິນລະຫວ່າງປະເທດ (BOP), ໂດຍສະເພາະການປັບປຸງຄູ່ມືແນະນໍາການຈັດຕັ້ງປະຕິບັດ ທີ່ໄດ້ມີກົນໄກໃໝ່ໃນປ່ອຍກູ້ເປັນສະກຸນເງິນທ້ອງຖິ່ນ (LCY-P), ການກໍານົດເພດານອັດຕາດອກເບ້ຍ(Margin). ພ້ອມນີ້, ກໍໄດ້ຮັບຮອງຜົນສຳລັດຂອງການທົດລອງການກູ້ຄັ້ງທີ 12 ແລະ ແຜນການທົດລອງກູ້ຢືມຄັ້ງທີ 13.

ກອງປະຊຸມໄດ້ຮັບຊາບຄວາມຄືບໜ້າການຈັດຕັ້ງປະຕິບັດແຜນໄລຍະກາງຂອງວຽກງານຂໍ້ລິເລີ່ມຕະຫຼາດພັນທະບັດອາຊີ 2019-2022 (ABMIRoadMap) ໃນການພັດທະນາ ແລະ ສົ່ງເສີມການອອກພັນທະບັດເປັນສະກຸນເງິນທ້ອງຖິ່ນຂອງປະເທດສະມາຊິກອາຊຽນ+3 ໂດຍສະເພາະການປະເມີນສິ່ງທ້າທາຍທີ່ຍັງຄົງຄ້າງ ໃນການພັດທະນາຕະຫລາດພັນທະບັດ ແລະ ການລົງທຶນໃນພື້ນຖານໂຄງລ່າງ. ພ້ອມທັງ, ຊົມເຊີຍຄວາມຄືບໜ້າຂອງການຈັດຕັ້ງປະຕິບັດຂອງຄະນະປະສານງານວຽກງານການຊ່ວຍເຫລືອດ້ານວິຊາກາ (TACT) ເພື່ອຊ່ວຍພັດທະນາຕະຫລາດພັນທະບັດຂອງປະເທດສະມາຊິກ.

ກອງປະຊຸມໄດ້ຮັບຮູ້ຄວາມພະຍາຍາມ ແລະ ຄວາມຄືບໜ້າຂອງບັນດາຄະນະຄົ້ນຄວ້າໃນວຽກງານຂໍ້ລິເລີ່ມໃໝ່ການຮ່ວມມືໃນອະນາຄົດຂອງອາຊຽນ+3, ຊຶ່ງບັນດາຄະນະຄົ້ນຄວ້າກໍໄດ້ສຸມໃສ່ປຶກສາຫາລື ແລະ ສ້າງຄວາມເຂັ້ມແຂງດ້ານບຸກຄະລາກອນຜ່ານການຈັດຝຶກອົບຮົມ ແລະ ສ້າງນິຕິກໍາ (ເປັນຕົ້ນແມ່ນການສ້າງ Concept Paper) ເພື່ອຊຸກຍູ້ໃຫ້ແກ່ການສ້າງຄວາມເຂັ້ມແຂງການຮ່ວມມືດ້ານການເງິນອາຊຽນ+3. ນອກນັ້ນ, ກອງປະຊຸມຍັງໄດ້ຊົມເຊີຍ 2 ຫົວຂໍ້ຄົ້ນຄວ້າໃຫມ່ ຄື: ກາລະໂອກາດ ແລະສິ່ງທ້າທາຍຕໍ່ການສົ່ງເສີມເຕັກໂນໂລຊີການເງິນໃນພາກພື້ນແລະວຽກງານການເງິນໃນໄລຍະຂ້າມຜ່ານ ເພື່ອສົ່ງເສີມການພັດທະນາແບບສີຂຽວ.

ໃນກອງປະຊຸມ, ທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນ ໄດ້ກ່າວຄໍາເຫັນຕໍ່ກອງປະຊຸມຂັ້ນສູງໂດຍໄດ້ເນັ້ນໃຫ້ເຫັນໄດ້ເຖິງຄວາມສຳຄັນວຽກງານການຮ່ວມມືດ້ານການເງິນຂອງພາກພື້ນອາຊຽນ+3 ເພື່ອຊ່ວຍເຫລືອ ແລະ ຮ່ວມມືກັນໃນການຟື້ນຟູເສດຖະກິດມະຫາພາກ ແລະ ສ້າງສະຖຽນລະພາບທາງດ້ານການເງິນໃຫ້ມີຄວາມໝັ້ນທ່ຽງ. ພ້ອມນີ້, ກໍໄດ້ແຈ້ງຕໍ່ກອງປະຊຸມກ່ຽວກັບ ຄວາມພະຍາຍາມຂອງລັດຖະບານ ສປປ ລາວ, ກໍຄື ການຈັດຕັ້ງປະຕິບັດວຽກງານບູລິມະສິດໃນວາລະແຫ່ງຊາດ ເພື່ອປັບປຸງການຄຸ້ມຄອງການເງິນພາກລັດ, ປະກອບສ່ວນຊຸກຍູ້ວຽກງານການຄຸ້ມຄອງເສດຖະກິດມະຫາພາກ, ການສ້າງຄວາມເຂັ້ມແຂງວຽກງານການບໍລິຫານໜີ້ສິນສາທາລະນະ, ການປະຕິຮູບນະໂຍບາຍຄຸ້ມຄອງການເກັບລາຍຮັບພາສີ-ອາກອນດ້ວຍລະບົບທັນສະໄໝແລະການຮັດກຸມດ້ານລາຍຈ່າຍງົບປະມານເພື່ອແກ້ໄຂບັນຫາຫຍຸ້ງຍາກທາງດ້າານເສດຖະກິດ-ການເງິນ.

ພ້ອມນີ້, ກໍໄດ້ຍົກໃຫ້ເຫັນເຖິງທ່າແຮ່ງທີ່ຈະເປັນການຂະຫຍາຍຕົວທາງດ້ານເສດຖະກິດຂອງ ສປປ ລາວ ໃນຕໍ່ໜ້າ ຈາກບັນດາໂຄງການລົງທຶນຕ່າງໆເຂົ້າໃນພື້ນຖານໂຄງລ່າງໃໝ່ໆທີ່ຈະເປັນເງື່ອນໄຂໃນການສ້າງທ່າແຮງອໍານວຍຄວາມສະດວກໃນການບໍລິການຂົນສົ່ງສິນຄ້າສົ່ງອອກ-ນໍາເຂົ້າຜ່-+ານເສັ້ນທາງລົດໄຟລາວ-ຈີນ (ທີ່ໄດ້ເລີ່ມເປີດນໍາໃຊ້ແຕ່ທ້າຍປີ 2021ມາເຖິງປະຈຸບັນ), ເຂດບໍລິການຂົນສົ່ງທ່າບົກ (Dry port), ການສ້າງເມືອງທັນສະໄໝ(Smart City),ລວມທັງການຂຸດຄົ້ນບໍ່ແຮ່-ຊັບພະຍາກອນທໍາມະຊາດ,ຊຸກຍູ້ໃຫ້ມີການຟື້ນຕົວໃນຂະແໜງອຸດສາຫະກໍາ-ການຄ້າ, ການທ່ອງທ່ຽວ ແລະ ອື່ນໆ..ພາຍຫຼັງທີ່ມີການເປີດປະເທດໃນປີ 2022.

ສະນັ້ນ, ການຄາດຄະເນການເຕີບໂຕໃນປີ 2022 ຂອງສປປ ລາວ ຄາດຄະເນວ່າຈະຢູ່ໃນລະດັບ 4,5%. ໃນນັ້ນ,ຈະສົ່ງຜົນໃຫ້ມີລາຍຮັບເພີ່ມຂຶ້ນປະມານ 14,35% ຫຼື 16,44% ຂອງ GDP. ຄາດຄະເນການຂາດດຸນງົບປະມານແມ່ນຈະຕໍ່ລົງຢູ່ໃນລະດັບ 1,61% ຂອງ GDP.