ການປັບຂຶ້ນປີ້ເຂົ້າຊົມແຫລ່ງທ່ອງທ່ຽວ ແມ່ນເປັນໄປຕາມລະບຽບການ ແຕ່ກໍຍິນດີຮັບຟັງສັງຄົມ ແລະ ຈະສະເໜີຂັ້ນເທິງ ເພື່ອພິຈາລະນາຜ່ອນຜັນຕາມຄວາມເໝາະສົມ
ທ່ານ ນາງ ວິໄລວອນ ຈັນທະລາຕີ, ຫົວໜ້າພະແນກ ຖວທ ນະຄອນຫລວງວຽງຈັນ ໄດ້ຊີ້ແຈງ ກ່ຽວກັບການປັບຂຶ້ນຄ່າເຂົ້າຊົມຫໍພິພິທະພັນ 3 ແຫ່ງໃນນະຄອນຫລວງວຽງຈັນ ຜ່ານວິທະຍຸກະຈາຍສຽງແຫ່ງຊາດລາວ ວ່າ: ການປັບຂຶ້ນຄ່າເຂົ້າຊົມແຫລ່ງມໍລະດົກແຫ່ງຊາດ ທັງ 3 ແຫ່ງ ແມ່ນປະຕິບັດຕາມ ໝວດທີ 3 ມາດຕາ 39 ຂອງລັດຖະບັນຍັດປະທານປະເທດ, ສະບັບ ເລກທີ 002/ປປທ, ລົງວັນທີ 17 ມິຖຸນາ 2021 ວ່າດ້ວຍຄ່າທໍານຽມ ແລະ ຄ່າບໍລິການ, ລວມເຖີງແຈ້ງການແນະນໍາຂອງ ກະຊວງ ຖວທ ວ່າດ້ວຍຄ່າທໍານຽມ ແລະ ຄ່າບໍລິການ ໃນຂະແໜງ ຖວທ ສະບັບເລກທີ 09, ລົງວັນທີ 7 ມັງກອນ 2022 ແລະ ແຈ້ງການຂອງຫ້ອງການ ກະຊວງ ຖວທ ສະບັບເລກທີ 13, ລົງວັນທີ 12 ມັງກອນ 2022 ວ່າດ້ວຍການຈັດຕັ້ງປະຕິບັດການເກັບຄ່າທໍານຽມ ແລະ ຄ່າບໍລິການຂອງຂະແໜງ ຖວທ ຕາມລັດຖະບັນຍັດປະທານປະເທດ, ສະບັບເລກທີ 002/ປປທ.
ສະນັ້ນ ພະແນກ ຖວທ ນະຄອນຫລວງວຽງຈັນ ໄດ້ປຶກສາຫາລືກັນໃນຂັ້ນວິຊາການກ່ຽວກັບປະຕິບັດຕາມນິຕິກໍາດັ່ງກ່າວ, ຈາກນັ້ນ ໄດ້ຄົ້ນຄ້ວາປຶກສາຫາລືຮ່ວມກັບພະແນກການເງິນ ນະຄອນຫລວງວຽງຈັນ ໃນຫລາຍຂັ້ນຕອນ ແລະ ໄດ້ຕົກລົງຮ່ວມກັນວ່າຕ້ອງໄດ້ຈັດຕັ້ງປະຕິບັດ ເພາະມັນເປັນລະບຽບກົດໝາຍທີ່້ຕ້ອງໄດ້ປະຕິບັດ ໂດຍເຫັນດີໃຫ້ເລີ່ມຈັດຕັ້ງປະຕິບັດການປັບຂຶ້ນຄ່າເຂົ້າຊົມແຫລ່ງມໍລະດົກແຫ່ງຊາດ ທັງ 3 ແຫ່ງດັ່ງກ່າວ ນັບແຕ່ວັນທີ 1 ມິຖຸນາ 2022 ເປັນຕົ້ນໄປ ແລະ ໄດ້ອອກແຈ້ງ ສະບັບເລກທີ 565/ຖວທ.ນວ, ລົງວັນທີ 6 ພຶດສະພາ 2022 ໃຫ້ບັນດາບໍລິສັດທ່ອງທ່ຽວ ກໍຄືສັງຄົມຮູ້ກ່ອນລ່ວງໜ້າ 1 ເດືອນ.
ທ່ານກ່າວຕື່ມວ່າ: ການປັບຂຶ້ນຄ່າເຂົ້າຊົມ ຫໍພຣະແກ້ວ, ວັດສີສະເກດ ແລະ ພຣະທາດຫຼວງ ໃນຄັ້ງນີ້ ຈະບໍ່ກະທົບຕໍ່ການເຂົ້າຊົມຂອງນັກທ່ອງທ່ຽວ ເນື່ອງຈາກແຫລ່ງທ່ອງທ່ຽວໃນລາວທີ່ເປັນມໍລະດົກແຫ່ງຊາດ ສະເພາະຕ່າງປະເທດແມ່ນເກັບໃນລາຄາ 30.000 ກີບ/ຄົນ ກ່ອນແລ້ວ, ຍົກເວັ້ນຢູ່ຫໍພຣະແກ້ວ, ວັດສີສະເກດ ແລະ ພຣະທາດຫຼວງ ທີ່ຜ່ານມາບໍ່ທັນໄດ້ປັບຂຶ້ນເທື່ອ.
ຢ່າງໃດກໍຕາມ ການປັບລາຄາດັ່ງກ່າວ ອາດມີຜົນກະທົບຕໍ່ບໍລິສັດທ່ອງທ່ຽວເຊິ່ງໄດ້ສ້າງລາຍການທ່ອງທ່ຽວທີ່ໄດ້ກໍານົດລາຄາຄ່າໃຊ້ຈ່າຍທີ່ອາດຕ້ອງໄດ້ຂາຍໃນລາຄາເກົ່າ ແລະ ສ້າງຄວາມຫຍຸ້ງຍາກໃຫ້ບໍລິສັດທ່ອງທ່ຽວ ເຊີ່ງຜູ້ປະກອບການໄດ້ສະເໜີມາຍັງພະແນກວ່າຍັງບໍ່ທັນແທດເໝາະຖ້າຈະປັບລາຄາໃໝ່ໃນເວລານີ້ ເພາະຍັງເປັນໄລຍະຟື້ນຟູການທ່ອງທ່ຽວຍ້ອນການລະບາດຂອງພະຍາດໂຄວິດ-19. ຢ່າງໃດກໍຕາມ ທາງພະແນກ ຖວທ ນະຄອນຫລວງວຽງຈັນ ມີຄວາມຈໍາເປັນຕ້ອງໃຫ້ຜູ້ປະກອບການທົດລອງຈັດຕັ້ງປະຕິບັດໄປກ່ອນ ເພາະມີລັດຖະບັນຍັດ ແລະ ແຈ້ງການທີ່ກ່ຽວຂ້ອງຂອງຂັ້ນເທີງອອກມາແລ້ວ.
ສຳລັບການປັບຂຶ້ນລາຄາຄັ້ງນີ້ມີພຽງ ຫໍພຣະແກ້ວ, ວັດສີສະເກດ ແລະ ພຣະທາດຫຼວງ ເທົ່ານັ້ນ ທີ່ໄດ້ປັບຂຶ້ນຄ່າເຂົ້າຊົມຄືນໃໝ່, ສ່ວນສະຖານທີ່ທ່ອງທ່ຽວແຫ່ງອື່ນໆ ໃນນະຄອນຫລວງວຽງຈັນ ແມ່ນຍັງເກັບໃນລາຄາເກົ່າຕາມທີ່ເຄີຍປະຕິບັດມາ, ພ້ອມນີ້ ທ່ານຮຽກຮ້ອງໃຫ້ປະຊາຊົນ, ຫົວໜ່ວຍທຸລະກິດ ກໍຄື ບັນດາບໍລິສັດທ່ອງທ່ຽວ ເຂົ້າໃຈກ່ຽວກັບການປັບຂຶ້ນຄ່າເຂົ້າຊົມສະຖານທີ່ທ່ອງທ່ຽວໃນຄັ້ງນີ້ ແມ່ນບໍ່ໄດ້ເຮັດຕາມພາລະການແຕ່ຢ່າງໃດ, ແຕ່ໄດ້ເຮັດຕາມລະບຽບກົດໝາຍຕາມທີ່ລັດຖະບານກໍານົດອອກ ແລະ ມີນິຕິກໍາເປັນບ່ອນອີງຢ່າງຊັດເຈນ.
ຢ່າງໃດກໍຕາມ ໃນການປະຕິບັດຕົວຈິງຖ້າບັນດາບໍລິສັດບໍ່ມີຄວາມພ້ອມ ແມ່ນສາມາດສະເໜີຜ່ານທາງສະມາຄົມທີ່ກ່ຽວຂ້ອງ ເຊິ່ງທາງພະແນກ ຍິນດີຮັບຟັງ ແລະ ຈະສະເໜີຂັ້ນເທີງເພື່ອພິຈາລະນາຜ່ອນຜັນຕາມຄວາມເໝາະສົມໃນຕໍ່ໜ້າ.
