ແຂວງຫຼວງພະບາງ ເກັບລາຍຮັບສ່ວຍສາອາກອນ ງວດ 1 ໄດ້ 56,58 ຕື້ກີບ ບໍ່ບັນລຸແຜນ

ໃນບົດສະຫຼຸບວຽກງານສ່ວຍສາອາກອນງວດ 1 ປີ 2022 ຊີ້ໃຫ້ເຫັນວ່າ:

ການຄຸ້ມຄອງເກັບລາຍຮັບອາ ກອນ ໄດ້ສືບຕໍ່ຄຸ້ມຄອງຖານຂໍ້ມູນຫົວໜ່ວຍທຸລະກິດແຕ່ປີ 2021 ມາເປັນພື້ນຖານເກັບລາຍຮັບປີ 2022 ພ້ອມທັງກວດກາຖານຂໍ້ມູນຄືນງວດ 1 ສໍາເລັດໂດຍພື້ນຖານ ໂດຍທົ່ວແຂວງມີຫົວໜ່ວຍທຸລະກິດ 8.594 ຫົວໜ່ວຍ ທຽບໃສ່ປີຜ່ານມາເພີ່ມຂຶ້ນ 1.401 ຫົວໜ່ວຍ ຫລື 19%, ໃນນີ້ຫົວໜ່ວຍທີ່ມີລາຍຮັບ 50 ລ້ານກີບລົງມາມີ 1.894 ຫົວໜ່ວຍ, ຫົວໜ່ວຍທີ່ມີລາຍຮັບ 50-400 ລ້ານກີບມີ 5.024 ຫົວໜ່ວຍ, ຫົວໜ່ວຍທີ່ມີລາຍຮັບເກີນ 400 ລ້ານກີບມີ 1.676 ຫົວໜ່ວຍ.

ສຳລັບຄວາມຄືບໜ້າການກຳນົດເງື່ອນໄຂຫົວໜ່ວຍທຸລະກິດຕາມແຈ້ງການຂອງລັດຖະມົນຕີກະຊວງການເງິນ ເລກທີ 3117/ກງ ແລະ 3211/ກງ ປະຕິບັດໄດ້ 4.189 ຫົວໜ່ວຍ ບັນລຸ 48,74%, ໃນນີ້ ຫົວໜ່ວຍທີ່ມີລາຍຮັບ 50 ລ້ານກີບລົງມາມີ 1.695 ຫົວໜ່ວຍ, ຫົວໜ່ວຍທີ່ມີລາຍຮັບ 50-400 ລ້ານກີບມີ 2.223 ຫົວໜ່ວຍ, ຫົວໜ່ວຍທີ່ມີລາຍຮັບ 400 ລ້ານຂຶ້ນໄປ 271 ຫົວໜ່ວຍ, ຫົວໜ່ວຍທີ່ເປັນພື້ນຖານເກັບລາຍຮັບຕົວຈິງປີ 2022 ມີ 6.069 ຫົວໜ່ວຍ, ໃນນີ້ການຜະລິດ 297 ຫົວໜ່ວຍ, ການຄ້າ 1.567 ຫົວໜ່ວຍ, ການບໍລິການໂຮງແຮມ, ຣີສອດ, ເຮືອນພັກ, ທ່ອງທ່ຽວ, ຮ້ານອາຫານ ແລະ ບໍລິການອື່ນໆ 6.102 ຫົວໜ່ວຍ.

ໃນບົດສະຫລຸບ ຍັງລະບຸອີກວ່າ: ຕາມແຜນການປີ 2022 ຈະເກັບລາຍຮັບໃຫ້ໄດ້ 351,99 ຕື້ກີບ, ແຕ່ໃນງວດ 1 ເກັບໄດ້ພຽງແຕ່ 56,58 ຕື້ກີບ ບັນລຸ 89,31% ຂອງແຜນການງວດ ຫລື 16,08% ຂອງແຜນການປີ, ໃນນີ້ຂັ້ນແຂວງໄດ້ 48,43 ຕື້ກີບ ບັນລຸ 92,92% ຂອງແຜນການງວດ ແລະ 16,72% ຂອງແຜນການປີ, ນະຄອນ ແລະ 11 ເມືອງໄດ້ 8,15 ຕື້ກີບ ບັນລຸ 72,61% ຂອງແຜນການງວດ ແລະ 13,07% ຂອງແຜນການປີ.

ສັງລວມແລ້ວລາຍຮັບງວດ 1 ບໍ່ບັນລຸຕາມແຜນການ ຍ້ອນບໍ່ໄດ້ເກັບອາກອນຈາກ ບໍລິສັດ ວາບດາຕາ ຢູ່ເມືອງຊຽງເງິນ.