ບອນມັສ ຊະນະ ຟໍເຣສ ຄວ້າໂຄຕ້າເລື່ອນຊັ້ນສູ່ພຣີເມຍລີກ ທີມທີ 2 ຕໍ່ຈາກຟູແລມ

ບອນມັສ ເປີດບ້ານເອົາຊະນະ ນັອດຕິງ ແຮມ ຟໍເຣສ ຮັບປະກັນຮອງແຊ໊ມລີກ ເດິ ແຊ໊ມປຽນຊິບ ພ້ອມຄວ້າໂກຕ້າເລື່ອນຊັ້ນສູ່ພຣີເມຍລີກ ອັງກິດ ລະດູການຫນ້າ ເປັນທີມທີ 2.

ການແຂ່ງຂັນບານເຕະລີກ ເດິ ແຊ໊ມປຽນຊິບ ອັງກິດ ເມື່ອຄືນວັນອັງຄານທີ 3 ພຶດສະພາ ບອນມັສ ຮອງຜູ້ນຳຂອງຕາຕະລາງ ເປີດບ້ານຕ້ອນຮັບການມາຢາມຂອງ ນັອດຕິງແຮມ ຟໍເຣສ ທີມອັນດັບ 3 ຂອງຕາຕະລາງ.

ຜົນປາກົດວ່າ ບອນມັສ ເອົາຊະນະ ນັອດຕິງແຮມ ຟໍເຣສ ໄປຫວຸດຫວິດ 1-0 ໂດຍ ບອນມັສ ໄດ້ປະຕູໃນນາທີ 83 ຈາກການຍິງຂອງ ຄີບເຟີ ມົວ.

ທັງນີ້ ຈາກໄຊຊະນະດັ່ງກ່າວເຮັດໃຫ້ ບອນມັສ ເກັບເພີ່ມເປັນ 85 ຄະແນນ ຮັບປະກັນຕຳແຫນ່ງຮອງແຊ໊ມ ລີກ ເດິ ແຊ໊ມປຽນຊິບ ຮຽບຮ້ອຍ ໂດຍມີຄະແນນຫລາຍກວ່າ ຟໍເຣສ ທີມອັນດັບ 3 ແລະ ຮັດເດີຟິລ ທີມອັນດັບ 4 ຢູ່ 6 ຄະແນນ ແລະ ເຫລືອການແຂ່ງຂັນອີກນັດດຽວ ເຮັດໃຫ້ ບອນມັສ ກາຍເປັນທີມທີ 2 ທີ່ໄດ້ເລື່ອນຊັ້ນສູ່ພຣີເມຍລີກ ອັງກິດ ລະດູການຫນ້າ ຕໍ່ຈາກຟູແລມ.