ຊີເກມຄັ້ງທີ 31 ນັກກີລາຍິງປືນທີມຊາດລາວ ຮ່ວມຊີງ 4 ຫລຽນຄຳ
ທ່ານ ໄຊຍະ ສີສານ ຫົວໜ້າຄູຝຶກກີລາຍິງປືນທີມຊາດລາວ ກ່າວວ່າ: ນັກກີລາທັງ 6 ຄົນ, ຍິງ 3 ຄົນ ທີ່ສ່ວນຫລາຍເປັນນັກກີລາເກົ່າ ໄດ້ຝຶກຊ້ອມແຕ່ຕົ້ນເດືອນມີນາ 2022 ເປັນຕົ້ນມາ ຊຶ່ງມາຮອດປັດຈຸບັນເຫັນວ່າ: ນັກກິລາທຸກຄົນ ໄດ້ພັດທະນາດີຂຶ້ນ. ແນວໃດກໍດີໃນຊີເກມປີນີ້ ພວກເຮົາຍັງບໍ່ໄດ້ວາງມາດຖານສູງເກີນໄປເພາະຈະບີບນັກກີລາ, ແຕ່ສຳຄັນທີ່ສຸດຄືເນັ້ນການຝຶກດ້ານເຕັກນິກ, ພະລະກຳລັງ ແລະ ການຝຶກສະມາທິດ້ານຈິດໃຈ ເພື່ອໃຫ້ທຸກຄົນສາມາດທຳລາຍສະຖິຕິຂອງຕົນເອງເປັນຫລັກ.
ມະຫະກຳກີລາຊີເກມຄັ້ງທີ 31 ທີ່ ສສ ຫວຽດນາມ ເປັນເຈົ້າພາບປີນີ້, ສປປ ລາວ ຈະສົ່ງຄະນະນຳ, ຄູຝຶກ ແລະ ນັກກິລາ 500 ກວ່າຄົນ ໂດຍຈະຮ່ວມແຂ່ງຂັນ 29 ປະເພດກີລາ. ສຳລັບກີລາຍິງປືນ, ລາວ ນັກກີລາ 6 ຄົນ, ຍິງ 3 ຄົນຮ່ວມຊີງ 4 ຫລຽນຄຳ ປະເພດປືນເປົ້າເລື່ອນ 10 ແມັດດ່ຽວຍິງ-ຊາຍ ແລະ ປະເພດທີມຍິງ-ທີມຊາຍ ຊຶ່ງຈະເລີ່ມແຂ່ງຂັນໃນວັນທີ 20-22 ພຶດສະພານີ້. ຂະນະທີ່ນັກກີລາຍິງປືນທີມຊາດລາວ ຈະອອກເດີນທາງໃນວັນທີ 3 ພຶດສະພາ 2022.
