ວຽກງານທີ່ທິດທາງແຜນການຈຸດສຸມຂອງລັດຖະບານ ໃນເດືອນພຶດສະພາ 2022

ກອງປະຊຸມລັດຖະບານ ສະໄໝສາມັນ ປະຈຳເດືອນເມສາ 2022 ໄດ້ເປີດຂຶ້ນຢ່າງເປັນທາງການ ໃນຕອນເຊົ້າຂອງວັນທີ 26 ເມສາ ແລະ ປິດລົງ ໃນວັນທີ 27 ເມສາ ນີ້ ທີ່ສໍານັກງານນາຍົກລັດຖະມົນຕີ, ພາຍໃຕ້ການເປັນປະທານຂອງທ່ານ ພັນຄໍາ ວິພາວັນ ນາຍົກລັດຖະມົນຕີ ມີບັນດາທ່ານ ຮອງນາຍົກລັດຖະມົນຕີ, ສະມາຊິກລັດຖະບານ ແລະ ຜູ້ຕາງໜ້າຈາກບັນດາກະຊວງ ເຂົ້າຮ່ວມ ຢ່າງພ້ອມພຽງ.

ກອງປະຊຸມຄັ້ງນີ້ ໄດ້ປຶກສາຫາລື, ຄົົ້ນຄວ້າ, ຕົກລົງ ແລະ ມີທິດຊີ້ນຳ ຕໍ່ຫົວຂໍ້ ທີ່ສໍາຄັນ ໃນການແກ້ໄຂບັນຫາລວມຂອງຊາດ ພ້ອມທັງວາງທິດທາງແຜນວຽກຈຸດສຸມ ໃນເດືອນພຶດສະພາ 2022, ກອງປະຊຸມໄດ້ມີທິດຊີ້ນຳດັ່ງນີ້:

1. ດ້ານເສດຖະກິດ-ສັງຄົມ
– ສືບຕໍ່ຊຸກຍູ້ ແລະ ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ປີ 2022 ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດ ໃຫ້ແຂງແຮງ ແລະ ມີຜົນໄດ້ຮັບຕົວຈິງຫລາຍຂຶ້ນກວ່າເກົ່າ, ໃນນັ້ນໃຫ້ສຸມໃສ່ບາງວຽກງານຈໍານວນໜຶ່ງ ເປັນຕົ້ນ ສຸມໃສ່ການເກັບລາຍຮັບງົບປະມານຂອງລັດ ໃຫ້ໄດ້ຕາມແຜນການທີ່ວາງໄວ້, ໃນນັ້ນໃຫ້ສຸມໃສ່ຄົ້ນຄວ້າແຫລ່ງລາຍຮັບໃໝ່ ແລະ ການຫັນການເກັບລາຍຮັບເປັນທັນສະໄໝ ໂດຍສະເພາະ ການຫັນການເກັບລາຍຮັບຢູ່ບັນດາດ່ານສາກົນທົ່ວປະເທດ.
– ສືບຕໍ່ຕິດຕາມ ແລະ ຊຸກຍູ້ການເຮັດທົດລອງການຂຸດຄົ້ນແຮ່ທາດ ໂດຍຊຸກຍູ້ໃຫ້ບັນດາບໍລິ ສັດທີ່ໄດ້ຮັບອະນຸຍາດເຮັດທົດລອງແຮ່ເຫລັກ ຮີບຮ້ອນດໍາເນີນການຂຸດຄົ້ນ ແລະ ສົ່ງອອກເພື່ອໃຫ້ສາມາດເກັບລາຍຮັບໄດ້ໄວ, ພ້ອມກັນນັ້ນ ໂຄງການໃດທີ່ມີການທັບຊ້ອນເນື້ອທີ່ກໍ່ໃຫ້ແກ້ໄຂຢູ່ຂັ້ນຂະແໜງການ ແລະ ທ້ອງຖິ່ນ ໃຫ້ສໍາເລັດກ່ອນ ຈຶ່ງສະເໜີລັດຖະບານ ພິ ຈາລະນາ;
– ສືບຕໍ່ປະຕິຮູບບັນດາບໍລິສັດ, ລັດວິສາຫະກິດຕາມມະຕິ ຂອງລັດຖະບານສະບັບເລກທີ10/ລບ, ລົງວັນທີ 15 ຕຸລາ 2021 ໃຫ້ສໍາເລັດໂດຍໄວ, ໃນນັ້ນໃຫ້ສຸມໃສ່ປະຕິຮູບລັດວິສາຫະກິດໄຟຟ້າລາວ, ລັດວິສາຫະການບິນລາວ.

– ປັບປຸງຮູບແບບການເຄື່ອນໄຫວແລະ ການດໍາເນີນທຸລະກິດຂອງ ລັດວິສາຫະກິດຫວຍພັດທະນາລາວ ເພື່ອເຮັດໃຫ້ການເກັບລາຍຮັບເພີ່ມຂຶ້ນ;

– ສືບຕໍ່ປະຕິບັດນະໂຍບາຍປະຢັດ ໂດຍສະເພາະການປະຢັດລາຍຈ່າຍບໍລິຫານ, ລາຍຈ່າຍສໍາລັບການຈັດຊື້ ຖ້າບໍ່ຈໍາເປັນແທ້ກໍໃຫ້ເລື່ອນໄປກ່ອນ, ການ ເຄື່ອນໄຫວວຽກງານຢູ່ຕ່າງປະເທດ ຖ້າບໍ່ຈໍາເປັນແທ້ກໍອາດມອບໃຫ້ ເອກະອັກຄະລັດຖະທູດຂອງ ສປປ ລາວ ທີ່ຢູ່ປະເທດນັ້ນ ເຂົ້າຮ່ວມແທນ ຫລື ເຂົ້າຮ່ວມໃນຮູບແບບກອງປະຊຸມທາງໄກ. ພ້ອມກັນນັ້ນ, ກໍຮີບຮ້ອນຈັດຕັ້ງປະຕິບັດດໍາລັດວ່າດ້ວຍລົດຂອງລັດ ໃຫ້ເປັນຮູບປະທໍາໂດຍໄວ.

– ສືບຕໍ່ປັບປຸງສະພາບແວດລ້ອມການລົງທຶນ ໃຫ້ດີກວ່າເກົ່າ ເພື່ອດຶງດູດນັກລົງທຶນຕ່າງປະເທດເຂົ້າມາ ສປປ ລາວ ຫລາຍຂຶ້ນ, ຊຸກຍູ້ບັນດາໂຄງການລົງ ທຶນຂະໜາດໃຫຍ່ ໂດຍສະເພາະໂຄງການກໍ່ສ້າງທາງດ່ວນ, ເຂດເສດຖະກິດພິເສດ ແລະໂຄງການສໍາຄັນອື່ນໆ ໃຫ້ໄດ້ຮັບການຈັດຕັ້ງປະຕິບັດໂດຍໄວ.

– ຮີບຮ້ອນກໍານົດ ແລະ ຈັດຕັ້ງປະຕິບັດມາດຕາການຕ່າງໆ ໃນການຄຸ້ມຄອງອັດຕາແລກປ່ຽນ ໃຫ້ມີສະຖຽນລະພາບໂດຍໃຫ້ມີມາດຕະການສະເພາະໜ້າ, ມາດຕະການໄລຍະກາງ ແລະ ໄລຍະຍາວ ທັງມີກົນໄກ ແລະ ວິທີການຄຸ້ມຄອງໃຫ້ລະອຽດ ແລະ ຮັດກຸມ
– ຮີບຮ້ອນກໍານົດມາດຕະການທີ່ຈໍາເປັນ ໃນການແກ້ໄຂການເພີ່ມຂຶ້ນ ຂອງລາຄານໍ້າມັນເຊື້ອໄຟ ເພື່ອຫລຸດຜ່ອນຄວາມກົດດັນຕໍ່ລາຄາສິນຄ້າ ກໍຄື ອັດຕາເງິນເຟີ້.

2. ວຽກງານ ປກຊ-ປກສ ທົ່ວປວງຊົນຮອບດ້ານຢ່າງຕັ້ງໜ້າ, ເພີ່ມທະວີການແກ້ໄຂປະກົດການຫຍໍ້ທໍ້ຕ່າງໆໃນສັງຄົມ ໃຫ້ຫລຸດໜ້ອຍຖອຍລົງ ໂດຍສະເພາະການແກ້ໄຂບັນຫາຢາເສບຕິດ ແລະ ອຸບັດເຫດຕາມຖະໜົນຫົນທາງ.

3. ດ້ານກະສິກຳ
– ສືບຕໍ່ຊຸກຍູ້ການຜະລິດລະດູຝົນ ເພື່ອຮັບປະກັນຄວາມໝັ້ນຄົງດ້ານສະບຽງອາຫານ ໃຫ້ໄດ້ຕາມແຜນ ແລະ ສົ່ງອອກເປັນສິນຄ້າຕາມເງື່ອນໄຂຂອງແຕ່ລະທ້ອງຖິ່ນ ໂດຍກໍານົດບັນຊີໂຄງການຕົວຈິງທີ່ຈະສົ່ງເສີມ ແລະ ດຶງດູດການລົງທຶນໃຫ້ລະອຽດ.

4. ດ້ານສາທາລະນະສຸກ
– ສືບຕໍ່ຈັດຕັ້ງປະຕິບັດມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດຂອງພະຍາດໂຄວິດ-19 ໃນເງື່ອນໄຂໃໝ່.
– ພ້ອມທັງຮີບຮ້ອນຈັດຕັ້ງປະຕິບັດມາດຕາການຜ່ອນຜັນ ສໍາລັບການເຂົ້າ-ອອກ ສປປ ລາວ ເພື່ອເປີດຮັບນັກທ່ອງທ່ຽວ ໂດຍໃຫ້ເບິ່ງບົດຮຽນຂອງບັນດາປະເທດອ້ອມຂ້າງ ແລະ ຮັບປະກັນກະກຽມຄວາມພ້ອມຂອງແຕ່ລະພາກສ່ວນ ເພື່ອໃຫ້ສາມາດຟື້ນຟູເສດຖະກິດໄດ້ໄວຂຶ້ນ;

5. ດ້ານການປົກຄອງ
ສືບຕໍ່ກະກຽມຄວາມພ້ອມກອງປະຊຸມສະຫລຸບຕີລາຄາວຽກງານກໍ່ສ້າງຮາກຖານການເມືອງ, ພັດທະນາຊົນນະບົດ, ການແຂ່ງຂັນ-ຍ້ອງຍໍຮັກຊາດແລະພັດທະນາ;
ສືບຕໍ່ລົງຕິດຕາມ, ຊຸກຍູ້ ແລະ ແກ້ໄຂວຽກງານຕົວຈິງຢູ່ທ້ອງຖິ່ນໃຫ້ເປັນປົກກະຕິ, ຖ້າມີບັນຫາໃດຫຍຸ້ງຍາກກໍໃຫ້ຮີບຮ້ອນແກ້ໄຂໃຫ້ໄວ ໂດຍສະເພາະບັນຫາທີ່ຕິດພັນກັບການສົ່ງອອກສິນຄ້າ.

6. ດ້ານການຕ່າງປະເທດ
– ສືບຕໍ່ຕິດຕາມຢ່າງໃກ້ຊິດຕໍ່ກັບສະພາບການພາກພື້ນ ແລະ ສາກົນ ໂດຍມີການວິເຄາະວິໄຈຢ່າງເລິກເຊິ່ງ ກ່ຽວກັບຄວາມສ່ຽງ ແລະ ທ່າອ່ຽງຜົນກະທົບດ້ານຕ່າງໆຕໍ່ປະເທດເຮົາ.
– ສືບຕໍ່ສ້າງສະພາບແວດລ້ອມທີ່ເອື້ອອໍານວຍໃຫ້ແກ່ການຮ່ວມມືໃນພາກພື້ນ ແລະ ສາກົນ ເພື່ອຍາດແຍ່ງເອົາການສະໜັບສະໜູນ ແລະ ການຮ່ວມມືໃຫ້ແກ່ການສ້າງສາພັດທະນາປະເທດເຮົາ. ພ້ອມດຽວກັນນີ້, ສຸມໃສ່ຈັດຕັ້ງປະຕິບັດຜົນການພົບປະລະຫວ່າງຜູ້ນໍາພັກ-ລັດປະເທດເຮົາ ກັບປະເທດເພື່ອນມິດຕ່າງໆ ລວມທັງສົນທິສັນ ຍາທີ່ປະເທດເຮົາເປັນພາຄີ ໃຫ້ໄດ້ຮັບຜົນສໍາເລັດເປັນຢ່າງດີ.